༢༠༡༡ ཟླ་ ༡༡ ཚེས་ ༢༥ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཕྱི་ ༡༡ ཚེས་ ༢༥ ཉིན་རྒྱ་གར་རྒྱལ་ས་ལྡི་ལིའི་མོ་ཏི་ལལ་ནེ་ཧེ་རུ་མཱག་ཅེས་པའི་ས་གནས་སུ་རྒྱལ་སྤྱིའི་བུད་མེད་བསྟི་གནས་ཁང་དང་། བུད་མེད་ཀྱི་ནུས་སྟོབས་ཞེས་པའི་རྒྱལ་སྤྱིའི་བུད་མེད་ཐེབས་རྩ་གཉིས་ནས་བུད་མེད་ཀྱི་ནུས་སྟོབས་ཞེས་པའི་གཟེངས་རྟགས་(Shakti Award)དེ་བཀའ་ཟུར་རྗེ་བཙུན་པདྨ་མཆོག་ལ་ཕུལ་འདུག     དེ་ཉིན་ཕྱི་དྲོ་མཛད་སྒོའི་སྐབས་རྒྱ་གར་དབུས་གཞུང་གི་རིག་གཞུང་དང་དབུལ་ཕོངས་ལྟ་སྐྱོང་བློན་ཆེན་མཆོག་གཙོས་ཕྱི་རྒྱལ་བའི་གནད་ཡོད་མི་སྣ་སྐུ་མགྲོན་བརྒྱ་ཕྲག་བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གིས་འགྲེལ་བརྗོད་གནང་བའི་ནང་བཀའ་ཟུར་རྗེ་བཙུན་པདྨ་མཆོག་གིས་ལྷག་བསམ་རྣམ་དག་ཐོག་བོད་ཕྲུག་ལྟ་སྐྱོང་གི་རླབས་ཆེན་བྱ་གཞག་ལ་བསྔགས་བརྗོད་གནང་ཡོད་པ་དང་། དེ་རྗེས་བཀའ་ཟུར་རྗེ་བཙུན་པདྨ་མཆོག་གིས་གསུང་བཤད་གནང་དོན། ང་རང་བྱ་དགའ་ལེན་རྒྱུར་དགའ་པོ་མེད་ཀྱང་། ད་རེས་གཟེངས་རྟགས་འདི་ནི་བོད་ཁྱིམ་ལས་བྱེད་ཡོངས་ཀྱིས་བོད་ཕྲུག་ལ་ལྟ་སྐྱོང་ཆེད་དཀའ་ངལ་བསྐྱོན་པའི་ངོས་འཛིན་ཐོག་གནང་བ་ཞིག་ཡིན་པར་བརྟེན་ཧ་ཅང་དགའ་པོ་བྱུང་། ཞེས་སོགས་ཀྱི་གསུང་བཤད་གནང་ཡོད།  ད་ཐེངས་བཀའ་ཟུར་རྗེ་བཙུན་པདྨ་མཆོག་ལ་གཟེངས་རྟགས་ཕུལ་དོན་ནི་བཙན་བྱོལ་ནང་གི་བོད་པའི་བུད་མེད་དང་། དབང་པོ་སྐྱོན་ཅན། དྭ་ཕྲུག་བཅས་ལ་ལྷག་བསམ་རྣམ་དག་ཐོག་ནས་ལྟ་སྐྱོང་གནང་མཁན་གྱི་བུད་མེད་མིག་དཔེ་ཅན་ཞིག་ཡིན་པར་བརྟེན་ནས་ཕུལ་བ་ཞིག་ཡིན་འདུག་པ་བཅས། །