༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༡ ནས་ ༢༥ བར་ཉིན་གྲངས་ལྔ་རིང་སྦིར་དང་སིམ་ལ་བོད་མི་སྡོད་སྒར་ཁག་ཏུ་གཟིགས་སྐོར་དུ་ཕེབས་ཡོད།
དེ་ཡང་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཕྱི་ཚེས་ ༢༡ ཉིན་རྡ་ས་ནས་སྦིར་ས་གནས་སུ་ཕེབས་འབྱོར་གནང་རྒྱུ། དེ་ནས་ཕྱི་ཚེས་ ༢༢ ཉིན་སྦིར་ནས་སིམ་ལར་ཕེབས་ཐོན་གྱིས་སིམ་ལར་ས་གནས་འཐུས་ཚོགས་ཀྱི་ཚོགས་གཙོ་དང་ལས་སྣེ་རྣམས་ཀྱི་ལྷན་བཞུགས་མོལ་ཚོགས་འདུ་འཚོགས་རྒྱུ་ཡིན་འདུག དེ་བཞིན་སིམ་ལར་བོད་མི་གནས་སྡོད་བྱེད་ས་རང་བཙན་ཀེམ་དུ་གཟིགས་ཞིབ་གནང་རྒྱུ་མ་ཟད། ཁྲིམས་རྩོད་པ་ཤར་ཝན་ཌོག་ར་དང་ལྷན་ཐུགས་འཕྲད་ཀྱིས་བོད་མིའི་སྡོད་སྒར་རང་བཙན་ཀེམ་གྱི་དཀའ་རྙོག་ཐོག་གོ་བསྡུར་གནང་རྒྱུ། ཕྱོགས་མཚུངས་མངའ་སྡེའི་དཔོན་རིགས་རྣམས་དང་ཐུག་འཕྲད་གནང་རྒྱུ་ཡིན་འདུག
ད་ཐེངས་ནང་སྲིད་བཀའ་བློན་མཆོག་སིམ་ལ་ཁུལ་དུ་ཕེབས་དགོས་དོན་གཙོ་བོ་ནི། སིམ་ལར་རང་བཙན་ཀེམ་ཞེས་པའི་ས་ཆ་ཞིག་ཡོད་པ་དེར་བོད་པའི་ཁྱིམ་ཚང་བདུན་བཅུ་དོན་གྲངས་ཙམ་དེ་སྔ་ནས་གནས་སྡོད་བྱེད་བཞིན་ཡོད་འདུག་ཀྱང། ས་ཆ་དེ་རྒྱ་གར་གཞུང་གིས་ཁྲིམས་མཐུན་གྱི་ཐོག་ནས་བོད་མི་་ཚོར་གནང་བ་ཞིག་མིན་ནའང། ཐོག་མར་བོད་མི་རྣམས་གནས་སྡོད་བྱེད་སྐབས་དེའི་ས་གནས་དཔོན་རིགས་རྣམས་ལ་ཆོག་མཆན་ཞུས་ཏེ་བཀའ་འཁྲོལ་ཐོབ་པ་ལྟ་བུ་ཞིག་རེད་འདུག འོན་ཀྱང་ལོ་ཤས་གོང་ནས་བོད་མི་ཚོར་ས་ཆ་དེ་སྟོང་པ་བཟོ་དགོས་སྐོར་གནས་ཚུལ་མང་དག་ཅིག་བྱུང་མཐར། གནད་དོན་དེའི་ཐོག་ཁྲིམས་ཐོག་ནས་ཁ་མཆུ་བརྒྱབ་སྟེ་ལོ་ཤས་ཕྱིན་ཡོད། སྔ་ལོར་ཁྲིམས་ཐོག་ནས་བོད་མི་རྣམས་ལ་ས་ཆ་དེ་སྟོང་པ་བཟོ་དགོས་ལུགས་ཐག་གཅོད་བྱུང་ཡང་བོད་མི་རྣམས་ལ་མངའ་སྡེ་གཞུང་གི་རོགས་རམ་ཐོག་ས་ཆ་ཞིག་སྤྲོད་དགོས་པའི་ཐག་གཅོད་ཀྱང་བྱུང་འདུག རང་བཙན་ཀེམ་ཞེས་པའི་ས་ཆ་དེ་རླངས་འཁོར་འགྲོ་སའི་ལམ་ཞིག་ཆགས་ཡོད་སྟབས། མངའ་སྡེ་གཞུང་ནས་རླངས་འཁོར་འཇོག་སའི་ཐོག་བརྩེགས་གཉིས་གསུམ་ཅན་ཞིག་རྒྱག་རྒྱུའི་འཆར་གཞི་བཏིངས་ནས་ལས་འགོ་བརྩམས་ཡོད། ཁོང་ཚོས་ལས་ཀ་བྱེད་སྐབས་བོད་མི་རྣམས་ཀྱི་སྡོད་གནས་ལ་གནོད་སྐྱོན་ཕོག་གི་ཡོད་པར་བརྟེན། གནས་ཚུལ་དེ་དག་སྐོར་སྲུང་བར་ཞུས་པ་དང་ཆབས་ཅིག་ཁྲིམས་ཁང་དུའང་གནད་དོན་དེའི་སྐོར་ཞུས་ཡོད། ཛ་དྲག་གི་གནས་སྟངས་དེའི་ཐད་ཁྲིམས་རྩོད་པ་ཐུག་འཕྲད་ཀྱིས་གནད་དོན་དེའི་ཐོག་ཁྲིམས་ཐོག་གི་གནས་བབ་སྐོར་གོ་བསྡུར་གནང་རྒྱུ་དང། དེ་བཞིན་མངའ་སྡེའི་དཔོན་རིགས་རྣམས་ལ་གནད་དོན་དེའི་སྐོར་བཀའ་སྡུར་གནང་ཆེད་ཕེབས་པ་ཞིག་ཡིན་འདུག་པ་བཅས།།