༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། ཕྱི་ལོ་ ༢༠༡༡ ཟླ་ ༡༡ ཚེས་ ༥ ཉིན་རྡ་ས་དབུས་སྨན་རྩིས་ཁང་གི་ཚོགས་ཁང་དུ་སྨན་རྩིས་ཁང་སྨན་སྦྱོར་སྡེ་ཚན་གྱི་རིན་ཆེན་དངུལ་ཆུ་བཙོ་བཀྲུ་ཆེན་མོ་ཐེངས་དྲུག་པ་ལེགས་གྲུབ་ཟིན་པའི་རྟེན་འབྱུང་མཛད་སྒོ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང། སྨན་རྩིས་ཁང་གི་འགན་འཛིན་ཚེ་དབང་རྟ་མགྲིན་ལགས། སྨན་རམས་པ་པདྨ་རྡོ་རྗེ་ལགས། སྨན་པའི་ལྷན་ཚོགས་ཀྱི་འགན་འཛིན་ཚེ་རིང་ཐག་གཅོད་ལགས། སྨན་སྦྱོར་འགན་འཛིན་སྨན་རམས་པ་འཇམ་དབྱངས་བཀྲིས་ལགས། སྡེ་ཚན་ཁག་གི་འགན་འཛིན་དང་སྨན་སྦྱོར་ཁང་གི་སྨན་པ་དང་ལས་བྱེད་རྣམ་པ་བཅས་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གིས་མར་མེ་ཞལ་ཕྱེ་གནང་རྗེས་རྟེན་འབྲེལ་གྱི་གསོལ་ཇ་འབྲས་སིལ་ཕུལ་ཏེ་གཡུ་ཐོག་གསོལ་འདེབས་གསུང་འདོན་གནང་། དེ་ནས་སྨན་སྦྱོར་འགན་འཛིན་སྨན་རམས་པ་འཇམ་དབྱངས་བཀྲིས་ལགས་ཀྱིས་དངུལ་ཆུ་བཙོ་ཐལ་གནང་བའི་བརྒྱུད་རིམ་དང་ལས་བསྡོམས་སྒྲོགས་སྦྱང་རྗེས་ཐེངས་འདིའི་དངུལ་ཆུ་བཙོ་ཐལ་ཚད་ལྡན་བྱུང་བའི་མཚོན་དོན་ཆེད་སྨན་སྦྱོར་འགན་འཛིན་གྱིས་དངུལ་ཆུ་བཙོ་ཐལ་གྷ་རམ་གསུམ་ལྷན་ཚོགས་དེའི་སར་མཆོད་རྗེས་སྐུ་མགྲོན་རྣམས་ལ་རིན་ཆེན་རིལ་བུའི་ཕུད་མང་སྦྱོར་བཅུ་ཆག་རེ་ཕུལ། སྐུ་མགྲོན་གཙོ་བོ་མཆོག་གིས་དངུལ་ཆུ་བཙོ་ཐལ་འདུལ་སྦྱོང་གི་ལས་མི་རྣམས་ལ་ཕྱག་རྟགས་གནང་གྲུབ་བསྟུན་དབུས་སྨན་རྩིས་ཁང་གི་འགན་འཛིན་ཚེ་དབང་རྟ་མགྲིན་ལགས་ཀྱིས་བོད་ཀྱི་གསོ་རིག་ནང་དངུལ་ཆུའི་འདུལ་སྦྱོང་ནི་ཁྱད་དུ་འཕགས་པའི་སྨན་སྦྱོར་ལག་ལེན་ཞིག་ཡིན་པ་དང་། ཕྱི་རྒྱལ་འགས་དངུལ་ཆུའི་སྐོར་བཤད་པ་དེ་ནི་བོད་ཀྱི་རིག་གཞུང་ལ་ཆ་རྒྱུས་མེད་པ་ཞིག་ཡིན་སྐོར་གསུང་བཤད་གནང་། དེ་རྗེས་སྐུ་མགྲོན་གཙོ་བོ་མཆོག་གིས་ལམ་སྟོན་གསུང་བཤད་གནང་བའི་སྙིང་དོན་ནི། སྲོལ་རྒྱུན་གྱི་རིག་གཞུང་ཕུན་སུམ་ཚོགས་པ་འདིས་འགྲོ་བ་མིའི་རིགས་ལ་ཕན་བདེའི་དགོས་མཁོར་ཆགས་པའི་འདུལ་སྦྱོང་གི་ལག་ལེན་དེ་དག་མི་ཉམས་བརྒྱུད་འཛིན་བྱེད་དགོས་པའི་ཐོག་ཕྱི་ལུགས་དང་བོད་ལུགས་གསོ་རིག་གཉིས་ཟུང་འབྲེལ་གྱི་ལེགས་ཆ་གང་ཡོད་བསྡུ་ལེན་བྱེད་དགོས་པའི་སྐོར་སོགས་ཀྱིས་གསུང་བཤད་གནང་རྗེས་སྨན་སྦྱོར་འགན་འཛིན་གཞོན་པ་སྨན་རམས་པ་ངག་དབང་བཟོད་པ་ལགས་ཀྱིས་ཐུགས་རྗེ་ཆེ་ཞུས་ཏེ་མཁྱེན་པའི་རང་གཟུགས་གསུང་འདོན་བཞིན་གྲོལ་བ་བཅས།
དངུལ་ཆུ་བཙོ་བཀྲུ་ཆེན་མོའི་ལག་ལེན་བརྒྱུད་རིམ་ནི་རྒྱ་གར་འཕགས་པའི་ཡུལ་དུ་ཕྱི་ལོའི་སྔོན་གྱི་ལོ་ ༦༠༠ ནས་དར་སྤེལ་བྱུང་སྟེ་མགོན་པོ་ཀླུ་སྒྲུབ་སོགས་བརྒྱུད་བོད་དུ་གཡུ་ཐོག་རྙིང་མ་ཡོན་ཏན་མགོན་པོའི་སྐབས་ལག་ལེན་གབ་སྦས་ཀྱི་ཚུལ་དུ་དར་སྤེལ་རིམ་པས་བྱུང་བ་ཞིག་དང་། བཙན་བྱོལ་དུ་ཐོག་མར་ཕྱི་ལོ་ ༡༩༨༢ ལོར་༸གོང་ས་མཆོག་གི་ཐུགས་བཞེད་ལྟར་ཕོ་བྲང་དུ་སྐུའི་བླ་སྨན་བསྟན་འཛིན་ཆོས་གྲགས་ལགས་ཀྱིས་འགན་འཁུར་གཙོ་བོ་བཞེས་པའི་ཐོག་དངུལ་ཆུ་འདུལ་སྦྱོང་གི་ཕྱག་ལེན་ཐོག་མ་དེ་གནང་སྟེ། ད་རེས་ཐེངས་དྲུག་པ་ཡིན་པ་མ་ཟད། སྨན་རྩིས་ཁང་ནས་ཐོན་སྐྱེད་བྱེད་བཞིན་པའི་གལ་ཆེའི་རིན་ཆེན་རིགས་ཁག་ལྔ་ཙམ་ལ་སྨན་སྦྱོར་གྱི་ནུས་པ་གཙོ་བོར་ཐོན་པར་མེད་ཐབས་མེད་པ་ཞིག་ཡིན་འདུག་པ་བཅས། །