༢༠༡༡ ཟླ་ ༡༡ ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཀོ་ཡ་སན་དུ་རྟེན་གཞི་བྱས་པའི་ཀོ་ཡ་སན་གཙུག་ལག་སློབ་གྲྭའི་ནང་ཉི་ཧོང་གཙོ་བོར་གྱུར་བའི་དད་ལྡན་མང་ཚོགས་ ༩༠༠ ཙམ་ལ་རྡོ་དབྱིངས་བཀའ་དབང་གི་སྔོན་འགྲོའི་ཆོ་ག་དང་འབྲེལ་བའི་རྗེས་གནང་སྩལ་བ་དང་སྦྲགས་བཀའ་སློབ་སྩལ་དོན། ངོས་རང་ཉི་ཧོང་ནང་པའི་བླ་ཆེན་ཀོ་བྷོ་སྡའི་ཤི་མཆོག་གིས་ནང་ཆོས་དར་སྤེལ་གནང་སའི་ཀོ་ཡ་སན་གྱི་གནས་བྱིན་རླབས་ཅན་འདིར་ཡོང་རྒྱུ་བྱུང་བ་དགའ་སྤོབས་བྱུང། ང་ཚོས་ནང་སེམས་ལ་བསྒྱུར་བཅོས་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། རྒྱུ་ནོར་དབང་ཤུགས་དང་དངུལ་རྐྱང་པས་ནང་སེམས་ལ་ཞི་བདེ་སྐྲུན་མི་ཐུབ་པ་མ་ཟད། རང་གཅེས་འཛིན་གྱི་བསམ་བློ་ཁོ་ནས་རང་ཉིད་ལ་དོན་དམ་གྱི་བདེ་སྐྱིད་སྐྲུན་མི་ཐུབ། དཀའ་ངལ་ཚང་མ་རང་གཅེས་འཛིན་གྱི་བསམ་བློ་ཤུགས་ཆེ་དྲགས་པ་ལས་བྱུང་བ་རེད། དོན་དམ་གྱི་བདེ་སྐྱིད་དེ་གཞན་གཅེས་འཛིན་གྱི་བསམ་པ་ལས་སྐྱེ་ཐུབ། དེང་སྐབས་ཚན་རིག་པ་ཚོས་མིའི་བདེ་སྡུག་དང་འབྲེལ་བའི་སེམས་ཚོར་གྱི་རྣམ་གཞག་ལ་དོ་སྣང་གསར་པ་ཞིག་སྤྲོད་བཞིན་ཡོད་ཅེས་སོགས་ཀྱི་བཀའ་སློབ་སྩལ། སྐབས་དེར་རྣམ་གྲྭ་ཕན་བདེ་ལེགས་བཤད་གླིང་གི་དགེ་འདུན་པ་བརྒྱད་ཀྱིས་རྡུལ་མཚོན་དཀྱིལ་འཁོར་བཞེང་རྒྱུའི་མཚོན་པའི་བཀའ་དབང་གི་སྔོན་འགྲོའི་ཆོ་ག་རྣམས་གྲ་སྒྲིག་ལེགས་པར་ཞུས་ཡོད། སང་ཉིན་རྡོ་དབྱིངས་ཀྱི་བཀའ་དབང་དངོས་གཞི་སྩལ་རྒྱུ་ཡིན་འདུག་པ་བཅས།།
