༢༠༡༡ ཟླ་ ༡༡ ཚེས་ ༤ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཀོ་ཡ་སན་གཙུག་ལག་སློབ་གྲྭའི་ཚོགས་ཁང་ཆེན་མོའི་ནང་ཉི་ཧོང་གི་དངོས་ཁམས་ཚན་རིག་པ་གྲགས་ཅན་ཧ་རོ་ས་ཇི་ལགས་དང་ཀླད་ཁམས་ཚན་རིག་པ་གྲགས་ཅན་ཀེ་ནི་ཆི་རོ་མོ་གི་ལགས། གློག་ཀླད་འཕྲུལ་འཁོར་གྱི་ཉམས་ཞིབ་པ་ན་ཏཱ་ལི་ཡ། དེ་བཞིན་ཉི་ཧོང་གསང་སྔགས་ཀྱི་ཆོས་ཉམས་ལེན་པ་དང་ལྷན་ཚོགས་ཐུན་གཉིས་རིང་ནང་ཆོས་ནས་སྐུ་བཞི་ལས་ཡེ་ཤེས་ཆོས་སྐུའི་རྣམ་གཞག་དང་ཆོས་གང་ཡིན་རྒྱུ་རྐྱེན་ལ་མ་ལྟོས་པར་རང་ངོས་ནས་གྲུབ་པ་རྡུལ་ཙམ་ཡང་མེད་ཚུལ་སོགས་ཀྱི་བཀའ་སློབ་སྩལ་དོན། གལ་ཏེ་ང་ཚོས་དུས་ཚོད་ལ་དཔྱད་པ་བྱས་པ་ཡིན་ན། ཆོས་གཞན་ལ་མ་ལྟོས་པར་རང་དབང་གིས་གྲུབ་པའི་དུས་ཚོད་གཅིག་འཇོག་མི་ཐུབ། འདས་པའི་དུས་ཚོད་ནི་དྲན་པའི་ཡུལ་རེད། མ་འོངས་པའི་དུས་ཚོད་ནི་འབྱུང་རྒྱུ་ཡིན། དེར་བརྟེན་ད་ལྟའི་དུས་འདི་ཧ་ཅང་གི་གལ་ཆེན་པོ་ཆགས་ཡོད་ཅེས་བཀའ་སློབ་སྩལ། ཕྱོགས་མཚུངས་སྐབས་དེར་ཉི་ཧོང་གི་ཚན་རིག་པ་ཚོས་ཚན་རིག་ཐོག་ནས་རིག་རྒྱུན་གྱི་རྫས་ཕྲ་མོ་སོགས་ཀྱི་སྐོར་འགྲེལ་བརྗོད་གནང་ཡོད།
ཉིན་རྒྱབ་༸གོང་ས་མཆོག་གིས་ཀོ་ཡ་སན་གཙུག་ལག་སློབ་གྲྭའི་དགེ་ལས་རྣམས་ལ་མཇལ་ཁ་སྩོལ་སྐབས་ལོ་ངོ་ ༡༢༥ སོན་པ་ཀོ་ཡ་སན་གཙུག་ལག་སློབ་ཁང་དེའི་གཙོ་འཛིན་སྐུ་ཞབས་ཕུ་ཇི་ཏ་ཀོ་ཀན་མཆོག་ཀྱང་ཕེབས་ཡོད།
སྐབས་དེར་མགོན་པོ་གང་ཉིད་མཆོག་གིས་ཉི་ཧོང་པ་ཚོས་བོད་བརྒྱུད་ནང་བསྟན་ནས་གསུངས་པའི་ལེགས་བཤད་དེར་ཧ་ཅང་དོ་སྣང་ཆེན་པོ་བྱེད་བཞིན་ཡོད་པར་བརྟེན། འབྱུང་འགྱུར་ཉི་ཧོང་ནང་དར་བའི་ནང་ཆོས་ཀྱི་ཉམས་ལེན་དང་བོད་བརྒྱུད་ནང་བསྟན་གཉིས་ཟུང་འབྲེལ་ཐོག་སློབ་སྦྱོང་བྱ་རྒྱུའི་ལས་འཆར་ཞིག་བང་སྒྲིག་ཐུབ་ན་དགེ་མཚན་ཆེན་པོ་ཡོད་པ་དང། ལས་འཆར་དེའི་ཆེད་རྒྱ་གར་ནས་བོད་པའི་ནང་ཆོས་ཀྱི་མཁས་དབང་ཁག་གཅིག་དང་ཉི་ཧོང་གཙུག་ལག་སློབ་དཔོན་དབར་བགྲོ་གླེང་དེ་འདྲ་གོ་སྒྲིག་སླད་འབད་བརྩོན་བྱ་རྒྱུ་ཧ་ཅང་གལ་ཆེན་ཡིན་སྐོར་བཀའ་སློབ་སྩལ་བ་མ་ཟད།
བོད་མི་ཚོར་ལོ་ངོ་དྲུག་ཅུ་ལྷག་ཙམ་རིང་བོད་ནང་ཆོས་དད་རང་དབང་མེད་པ་མ་ཟད། བཙན་བྱོལ་དུ་དཀའ་ངལ་འོག་གནས་ཡོད། འོན་ཀྱང་བོད་མི་ཚོས་ལོ་ངོ་བརྒྱ་ཕྲག་ནས་དར་བའི་རང་གི་རྩ་ཆེའི་རིག་གཞུང་རྒྱུན་འཛིན་ཐུབ་ཡོད་སྐོར་དང། ཨེ་ཤི་ཡའི་ནང་པའི་ཡུལ་གྲུ་ཕན་ཚུན་ལེགས་བཤད་བརྗེ་ལེན་བྱ་རྒྱུ་ཧ་ཅང་གལ་ཆེ་ཆགས་ཡོད། དེར་བརྟེན་མི་གྲངས་ཐེར་འབུམ་ ༡།༣ ཙམ་ཡོད་པའི་རྒྱ་ནག་ཡུལ་དེ་འབྱུང་འགྱུར་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་རྒྱུར་ཧ་ཅང་གལ་ཆེན་པོ་ཆགས་ཡོད། ང་ཚོས་ཨེ་ཤི་ཡའི་ནང་པའི་ཡུལ་གྲུ་ཕན་ཚུན་ཞི་བདེ་དང་འཆམ་མཐུན་གྱི་སྤྱི་ཚོགས་ཤིག་བསྐྲུན་ཐུབ་ཚེ་རིམ་པས་ཞི་བདེ་དང་བདེ་སྐྱིད་ལྡན་པའི་འཛམ་གླིང་ཞིག་ངེས་པར་དུ་བསྐྲུན་ཐུབ་ཅེས་བཀའ་སློབ་སྩལ།
གཞན་ཡང་སྐབས་དེར་ཀོ་ཡ་སན་གཙུག་ལག་སློབ་གྲྭས་༉༸གོང་ས་མཆོག་ལ་འབྱུང་འགྱུར་སླར་ཡང་ཆིབས་སྒྱུར་བསྐྱང་གནང་ཡོང་བའི་ཇི་ལྟར་གསོལ་འདེབས་ཞུས་དོན་ལྟར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ཉི་ཧོང་མང་ཚོགས་རྣམས་དང་ལྷག་པར་ཀོ་ཡ་སན་མི་མང་ཚོས་ངོས་ལ་ཧ་ཅང་སེམས་ཐག་ཉེ་པོ་དང་དགའ་མོས་ཆེན་པོ་བྱས་བྱུང་བས་ངོས་རང་སླར་ཡང་ཡོང་རྒྱུ་ཡིན་ཞེས་བཀའ་ལན་སྩལ།
