༢༠༡༡ ཟླ་ ༡༡ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡༦ རེས་གཟའ་ལྷག་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་ཇམ་མུའི་ནང་༸ཞབས་སོར་འཁོད་བསྟུན་གསར་འགོད་པ་ཁག་གཅིག་གིས་དྲི་བར་བཀའ་ལན་སྩལ་དོན། སྔ་ལོ་ངོས་ལ་མགྲོན་འབོད་བྱས་པ་ལྟར་ངོས་རང་འདིར་ཡོང་རྒྱུའི་ཁས་ལེན་བྱས་པ་ཡིན། གང་ཡིན་བརྗོད་ན་གནའ་དུས་སུ་ནང་ཆོས་ཤུགས་ཆེ་དར་བའི་ས་གནས་འདི་ལྟ་བུ་ནས་དར་གོས་ལམ་ (Silk Route) བརྒྱུད་དེ་རྒྱ་ནག་དང་ཉི་ཧོང། ཀོ་རི་ཡ་སོགས་ཀྱི་ནང་དུ་ནང་ཆོས་དར་ཁྱབ་ཧ་ཅང་ཆེན་པོ་བྱུང་ཡོད། ངོས་ལ་ཆ་བཞག་ན་རྒྱ་གར་གྱི་བྱམས་པ་དང་བརྩེ་བའི་བསླབ་བྱ་སོགས་གཞན་ལ་བརྡ་ལན་སྤྲོད་མཁན་གྱི་བང་ཆེན་ལྟ་བུ་ཞིག་ཡིན་པ་བརྗོད་ཀྱི་ཡོད། དར་གོས་ལམ་རྒྱུད་ནས་ཤར་ཨེ་ཤི་ཡའི་རྒྱལ་ཁབ་ནང་ནང་ཆོས་ཁྱབ་
སྤེལ་བྱུང་ཡོད་པ་མ་ཟད། གནའ་དུས་སྐབས་བོད་ནས་རྒྱ་གར་ལ་ཀ་ཤི་མིར་བརྒྱུད་ནས་མ་གཏོགས་ལམ་གཞན་སིཀ་ཀིམ་སོགས་ནས་མེད། དེར་བརྟེན་བྱུང་རབས་ལོ་རྒྱུས་ཐོག་ཇམ་མུ་ཀ་ཤི་མི་རིའི་ས་གནས་འདི་བཞིན་ཧ་ཅང་གལ་ཆེན་པོ་ཆགས་ཡོད། ཕྱོགས་མཚུངས་ངོས་རང་ས་གནས་གང་དུ་ཕྱིན་ཡང་དུས་རབས་ ༢༠ པ་དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་པ་མ་ཟད། རྡུལ་ཕྲན་མཚོན་ཆས་གནོད་འཚེ་ཆེན་པོ་བཟོས་ཡོད་ཅེས་བརྗོད་བཞིན་ཡོད། དེ་བཞིན་མི་གྲངས་ས་ཡ་ ༢༠༠ ཙམ་དམར་གསོད་བཏང་ཡོད་སྐོར་ལོ་རྒྱུས་སྨྲ་བ་འགའ་རེས་བརྗོད་ཀྱི་ཡོད། འཚེ་བའི་ལས་ཚབས་ཆེ་དེ་ལྟ་བུ་བྱས་རྗེས་སྤྱི་ཚོགས་ནང་ཞི་བདེ་ལྷིང་འཇགས་དང་བདེ་སྐྱིད་ཆེ་རུ་སོང་ཡོད་ན་འཚེ་བའི་བྱ་སྤྱོད་སྤེལ་བ་དེས་འགྲིག་པ་ལྟ་བུ་ཆགས་ཀྱང། དོན་དངོས་ཐོག་གནས་སྟངས་དེ་འདྲ་རྩ་བ་ནས་ཆགས་མེད། དེར་བརྟེན་ད་ཆ་དུས་རབས་ ༢༡ འདི་བཞིན་ཆོས་ཁས་ལེན་མིན་ལ་མ་ལྟོས་པར་འཛམ་བུ་གླིང་འདི་ང་ཚོའི་ཁྱིམ་ཚང་ཡིན་པར་བརྟེན། ང་ཚོ་ཚང་མས་ལོ་ངོ་སྟོང་ཕྲག་རིང་ནས་དར་བའི་རྒྱ་གར་གྱི་སྲོལ་རྒྱུན་ཆོས་ལུགས་མཐུན་སྒྲིལ་དང་འཚེ་བ་མེད་པའི་བསླབ་བྱ་དེ་དག་འབྲེལ་བ་ཧ་ཅང་ཆེན་པོ་ཆགས་ཡོད་ཅེས་སོགས་ཀྱི་བཀའ་ལན་སྩལ་ཡོད་པ་བཅས།།
