༢༠༡༡ ཟླ་ ༡༡ ཚེས་ ༡ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༣༡ ཉིན་༸གོང་ས་མཆོག་གིས་ཉི་ཧོང་གི་གྲོང་ཁྱེར་ཀོ་ཡ་སན་དུ་རྟེན་གཞི་བྱས་པའི་ཀོ་ཡ་སན་གཙུག་ལག་སློབ་གྲྭ་བཙུགས་ཏེ་ལོ་ངོ་ ༡༢༥ འཁོར་བའི་དུས་དྲན་མཛད་སྒོར་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་ཏེ་ཉི་ཧོང་གི་དགེ་འདུན་པ་གཞོན་སྐྱེས་ཚོར་བཀའ་སློབ་དང་ཁོང་ཚོའི་དྲི་བར་བཀའ་ལན་ཡང་མཛད་ཡོད། དེ་ཡང་མགོན་པོ་གང་ཉིད་མཆོག་གིས་སྐབས་དེར་ཉི་ཧོང་པ་ཚོས་འཛམ་གླིང་དམག་ཆེན་གཉིས་པའི་གཏོར་སྐྱོན་འོག་རྒྱལ་ཁབ་ནང་དངོས་པོའི་འཛུགས་སྐྲུན་བསྐྱར་གསོ་ཐུབ་པ་ལྟར་ཐེངས་འདིར་ཡང་། རང་བྱུང་གོད་ཆག་འོག་མི་ནོར་ཕྱུགས་གསུམ་ལ་གོད་ཆག་ཧ་ཅང་ཚབས་ཆེ་ཕོག་ཡོད་ནའང་ཉི་ཧོང་པ་ཚོས་སྙིང་སྟོབས་ཆེན་པོས་ཁང་ཁྱིམ་སོགས་བསྐྱར་གསོ་ལེགས་གྲུབ་ཐུབ་པར་བསྔགས་བརྗོད་མཛད། གཞན་ཡང་སྐབས་དེར་ཉི་ཧོང་ནང་པའི་དགེ་འདུན་པ་གཞོན་སྐྱེས་ཚོའི་དྲི་བར་མགོན་པོ་གང་ཉིད་མཆོག་གིས་བཀའ་ལན་མཛད་པ་དང་སྦྲགས་བཀའ་སློབ་སྩལ་དོན། ངོས་རང་ཁྱེད་ཚོའི་སེམས་ཐག་ཉེ་བའི་ཆོས་གྲོགས་ཤིག་ཡིན་པ་མ་ཟད། ནང་པའི་རྗེས་འབྲང་པ་གཅིག་མཚུངས་ཡིན་པའི་ཆ་ནས་ཉེ་ལམ་ཁྱེད་ཚོར་རང་བྱུང་གི་གོད་ཆག་ཕོག་སྟེ་དཀའ་ངལ་མྱོང་བཞིན་པའི་སྐབས། ངོས་ཀྱིས་གདུང་སེམས་མཉམ་སྐྱེ་ཞུ་རྒྱུ་བྱུང་བར་ཧ་ཅང་དགའ་སྤོབས་བྱུང་ཞེས་བཀའ་སློབ་སྩལ། ཕྱོགས་མཚུངས་སྐབས་དེར་ཉི་ཧོང་པ་རྣམས་དཀའ་ངལ་དེ་འདྲ་མྱངས་དགོས་པའི་རྒྱུ་མཚན་གང་ཡིན་གྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། དེ་ནི་འཛམ་གླིང་ས་གཞིའི་གནས་བབ་ལ་འགྱུར་བ་འགྲོ་བཞིན་ཡོད་པ་དང་གོ་ལའི་ཚ་དྲོ༞ས་འཕེལ་བ། དེ་བཞིན་ང་ཚོས་ཚེ་རབས་སྔོན་མར་བསགས་པའི་སྡིག་པའི་འབྲས་བུ་སོགས་ལས་བྱུང་བ་ཞིག་ཡིན། དེར་བརྟེན་སྤྱི་མཐུན་གྱི་བསོད་ནམས་གསོག་ཐུབ་པ་ཡིན་ན་ལས་ངན་གྱི་འབྲས་བུ་དག་རྒྱུ་རེད། སྤྱི་མཐུན་གྱི་བསོད་ནམས་གསོག་པར་གཞན་གཅེས་འཛིན་གྱི་བསམ་པ་དགོས། འོན་ཀྱང་འཛམ་གླིང་ནང་དཀའ་ངལ་དང་རྙོག་གྲ་དེ་ཚོ་ཚང་མ་མིས་བཟོས་པ་ཤ་སྟག་ཡིན་པ་གསལ་པོ་རེད། དེར་བརྟེན་དཀའ་ངལ་སེལ་རྒྱུའི་ཐབས་ལམ་དེ་ཡང་ང་ཚོའི་ལག་ཏུ་ཡོད་པ་རེད་ཅེས་སོགས་ཀྱི་བཀའ་སློབ་སྩལ།།