༢༠༡༡ ཟླ་ ༡༠ ཚེས་ ༧ རེས་གཟའ་པ་སངས།
༄༅།  །འདི་གར་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཕྱི་ཟླ་ ༡༠ ཚེས་ ༥ ཉིན་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་སྐུ་ཚབ་དོན་གཅོད་ཀྱི་མཚན་ཐོག་ནས་ད་ལྟའི་བོད་ནང་གི་ཛ་དྲག་གི་གནས་སྟངས་ལ་གཞིགས་ཏེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་བྷན་ཀི་མུན་(Ban Ki-moon) མཆོག་དང་།  མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཚང་མར་བོད་ནང་གི་མིག་སྔའི་ཛ་དྲག་གནས་སྟངས་ལ་ངེས་པར་དུ་ཐུགས་སྣང་ཡོང་བའི་སྙན་ཞུ་ཞིག་ཕུལ་ཡོད། ཞུ་སྙན་དེའི་ནང་།  བར་ལམ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པས་སླར་ཡང་གཅེས་པའི་རང་སྲོག་དོར་ནས་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་སྲིད་བྱུས་ལ་ངོ་རྒོལ་བྱས་པའི་གནས་ཚུལ་གྱི་བྱུང་རིམ་ཁ་གསལ་མདོར་བསྡུས་དང་། ངོ་རྒོལ་གྱི་ལས་འགུལ་ལ་རྒྱ་ནག་གཞུང་གིས་བྱ་ཐབས་གང་འདྲ་བཟུང་ཡོད་མེད།  ཀིརྟི་དགོན་པ་གཙོ་བོར་གྱུར་བའི་གཞིས་ལུས་མི་མང་གིས་གལ་སྲིད་རྒྱ་ནག་གཞུང་གིས་མུ་མཐུད་དམ་བསྒྲགས་ཀྱི་སྲིད་བྱུས་བཟུང་བ་ཡིན་ན་ཁོང་ཚོའི་བསམ་བློ་གཏོང་སྟངས་གང་འདྲ་ཡིན་མིན།  གནས་ཚུལ་མིག་མཐོང་ལག་ཟིན་བྱུང་མཁན་གྱིས་ལྟ་སྟངས་ག་རེ་ཡིན་པ་བཅས་ངོ་སྤྲོད་སྙིང་བསྡུས་དང་འབྲེལ་གཙོ་བོ་འབོད་སྐུལ་དོན་ཚན་གསུམ་ཞུས་ཡོད།  དེ་ཡང་འཛམ་གླིང་མཉམ་འབྲེལ་རྒྱལ་ཚོགས་ནས་ ༡༽ད་ལྟའི་བོད་ནང་གི་གནས་སྟངས་ལ་ཐུགས་འཚབ་ཡོད་པའི་གསལ་བསྒྲགས་གནང་སྐྱོང་ཡོང་བ། ༢༽རང་སྲོག་དོར་ནས་ངོ་རྒོལ་བྱེད་མཁན་གསོན་པོར་གནས་པ་རྣམས་འཕྲལ་དུ་གློད་བཀྲོལ་ཡོང་བའི་འབོད་སྐུལ་ཞུ་གནང་ཡོང་བ། ༣༽བོད་མདོ་སྨད་རྔ་བ་རྫོང་དང་། ཀིརྟི་དགོན་པས་གཙོས་བོད་ནང་བཟུང་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་འགྱུར་བ་གཏོང་དགོས་པའི་བསམ་ཚུལ་གསལ་སྟོན་དགོས་པའི་འབོད་སྐུལ་གནང་ཡོད། དེ་དང་ཕྱོགས་མཚུངས་སྐུ་ཚབ་དོན་གཅོད་ཀྱིས་ས་གནས་བོད་རིགས་སྤྱི་མཐུན་ཚོགས་པ་ཡོངས་ལ་ཡང་གོང་གི་གནས་ཚུལ་འགྲེལ་བརྗོད་དང་འབྲེལ་རང་རང་གནས་ཚུལ་ས་གནས་ཀྱི་གཞུང་དང་། གྲོས་ཚོགས། ས་གནས་དཔོན་རིགས་བཅས་ལ་རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་དམ་བསྒྲགས་ཅན་གྱི་སྲིད་བྱུས་འཕྲལ་དུ་མཚམས་འཇོག་དགོས་པའི་ཛ་དྲག་གི་ཞུ་སྐུལ་དགོས་པ་དང་ས་རྟགས་བསྡུ་ལེན།  དེ་བཞིན་ཞི་བའི་ལས་འགུལ་སྤེལ་བའི་ལམ་ནས་བོད་ནང་གི་ཛ་དྲག་གནས་སྟངས་ལ་སེམས་འཚབ་ཡོད་པའི་རྣམ་འགྱུར་སྟོན་དགོས་པ་སོགས་ཀྱི་འབོད་སྐུལ་ནན་པོ་གནང་ཡོད་པ་བཅས། །