༢༠༡༡ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༩ ཉིན་སྔ་དྲོ་ཆུ་ཚོད་ ༦།༠༠ ནས་འགོ་འཛུགས་ཀྱིས་ཆུ་ཚོད་ ༡༢ རིང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་ས་གནས་འགོ་འཛིན་ལས་ཁུངས་ཀྱིས་གོ་སྒྲིག་ཐོག་གཞིས་མི་རྣམས་དང། དགེ་འདུན་པ། སློབ་ཕྲུག བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་བཅས་ཁྱོན་མི་གྲངས་ ༨༧༥༤ ཙམ་གྱིས་བོད་ནང་གཞིས་ལུས་བོད་མི་ཚོས་འུ་ཐུག་ཐབས་ཟད་ངང་རང་སྲོག་དོར་ཏེ་རྒྱ་ནག་གཞུང་གིས་བོད་ནང་འཛིན་པའི་དྲག་རྩུབ་ཅན་གྱི་སྲིད་བྱུས་དེ་དག་ལ་ངོ་རྒོལ་དང་རང་སྲོག་ཞུགས་མེར་བསྒྲོན་མཁན་ཚོར་གདུང་སེམས་མཉམ་སྐྱེ་དང་རྒྱབ་སྐྱོར་མཚོན་ཆེད་སྨོན་ལམ་གསུང་འདོན་དང་ཟས་བཅད་ངོ་རྒོལ་གནང་ཡོད། སྨོན་ལམ་གསུང་འདོན་དང་ཟས་བཅད་ངོ་རྒོལ་དེ་བཞིན་དགའ་ལྡན་བླ་སྤྱི་དང། འབྲས་སྤུངས་བླ་སྤྱི། གཞིས་གྲོང་གསུམ་པར་གསར་སྐྲུན་བྱས་པའི་སྤྱི་མཐུན་མཉམ་འབྲེལ་གྱི་ཚོང་ཁང་གསར་པ་བཅས་སུ་ཚོགས་ཡོད་པ་མ་ཟད། ཕྱི་ལོ་ ༢༠༡༡ ཟླ་ ༡༠ ཚེས་ ༢༠ དང་ ༢༡ བཅས་མདོར་ན་ཉིན་གསུམ་རིང་བསྟུད་མར་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེ་ཆེད་ལས་འགུལ་སྤེལ་ཡོད། ལྷག་པར་ཕྱི་ཚེས་ ༢༠ དང་ ༢༡ ཉིན་མོན་གྷོ་འདོད་རྒུ་གླིང་གི་ས་གནས་བོད་མི་སྤྱི་དང་ལྷག་པར་འབྲས་སྤུངས་དང་དགའ་ལྡན་གཙོ་བོར་གྱུར་བའི་རིས་སུ་མ་ཕྱེ་བའི་ཆོས་སྡེ་ཁག་གི་ནང་སློབ་གཉེར་གནང་བཞིན་པའི་ཧི་མཱ་ལ་ཡའི་རི་རྒྱུད་ཀྱི་དགེ་འདུན་པ་དང་བཙུན་མ་བཅས་བསྡོམས་མི་གྲངས་ ༡༠༠༠༠ ནས་ ༡༡༠༠༠ ཙམ་གྱིས་སྨོན་ལམ་གསུང་འདོན་དང་མར་མེ་ཁྲོམ་སྐོར་གནང་ཡོད། གདུང་སེམས་མཉམ་སྐྱེའི་ལས་འགུལ་ཉིན་གསུམ་རིང་ས་གནས་བོད་མིའི་ཚོང་ཁང་དང་ཟ་ཁང་ཡོངས་རྫོགས་སྒོ་བརྒྱབ་ཡོད་པ་མ་ཟད། བོད་མིའི་གླ་ཆེད་རླང་འཁོར་སོགས་ཀྱང་འགྲུལ་བཞུད་མཚམས་འཇོག་བྱས་ཏེ་གདུང་སེམས་མཉམ་སྐྱེ་ཞུས་ཡོད་པ་བཅས།།