ཕྱི་ལོ་ ༢༠༡༡ ཟླ་ ༡༠ ཚེས་ ༢༠ རེས་གཟའ་ཕུར་བུ།
༄༅། །འདི་གར་ཉི་ཧོང་སྐུ་ཚབ་དོན་ཁང་གི་གནས་ཚུལ་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༡༩ རེས་གཟའ་ལྷག་པའི་ཉིན་ཉི་ཧོང་རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཇོན་ཇི་ནང་པའི་ལྷ་ཁང་དུ་ཉི་ཧོང་ས་གནས་བོད་རིགས་ཚོགས་པ་དང་། ཉི་ཧོང་བོད་དོན་རྒྱབ་སྐྱོར་བ་རྣམས་ཀྱིས་ཉེ་ལམ་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་ཁམས་རྟའུ་ཉ་མཚོ་དགོན་པ་དང་། དེ་བཞིན་རྔ་པ་ཁུལ་གྱི་བཙུན་དགོན་བདེ་ཆེན་ཆོས་འཁོར་གླིང་སོགས་ཀྱི་སྐྱ་སེར་ཁྱོན་རྒྱལ་གཅེས་པ་དགུས་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་ཙམ་མ་ཟད། བོད་ནང་རང་དབང་དགོས་པ་དང་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་དགོས་པའི་འབོད་ཚིགས་སྒྲོག་བཞིན་རང་ལུས་མེར་སྲེག་གཏོང་མཁན་མི་ལྔ་རྐྱེན་འདས་ཕྱིན་པ་དང་གསོན་པོ་བཞི་ཡོད་པ་རྣམས་ཀྱི་ཆེད་མཆོད་འབུལ་སྨོན་ལམ་ཚོགས་ཡོད། སྐབས་དེར་ཉི་ཧོང་དང་ཤར་ཨེ་ཤི་ཡའི་སྐུ་ཚབ་ལྷག་པ་མཚོ་མགོ་ལགས་ཀྱིས་སྨོན་ལམ་མཆོད་འབུལ་དང་འབྲེལ་བའི་ངོ་སྤྲོད་གསུང་བཤད་སྐབས་བོད་ནང་རྒྱ་ནག་གཞུང་གིས་དམ་བསྒྲགས་ཀྱི་སྲིད་བྱུས་མུ་མཐུད་ལག་བསྟར་བྱེད་བཞིན་པར་བརྟེན། ད་ལྟའི་ཆར་བོད་མི་ཚོ་འུ་ཐུག་ཐབས་ཟད་ཀྱི་གནས་སུ་གྱར་ཡོད་པ་དང། དེར་བརྟེན་བོད་མིའི་དཀའ་ངལ་རྣམས་རྒྱལ་སྤྱི་སྟེང་ཤེས་རྟོགས་ཡོང་སླད་བོད་མི་སེར་སྐྱ་དགུ་པོས་རང་ལུས་ཞུགས་འབུལ་གནང་ཡོད་སྐོར་དང་། བོད་ནང་ཕྱི་ཚུལ་ཙམ་ལས་དོན་དངོས་ཐོག་བོད་མི་ཚོ་དམག་ཁྲིམས་འོག་གནས་ཡོད་སྟབས་དུས་རྟག་ཏུ་རྒྱ་ནག་གཞུང་གི་ཉེས་རྟོག་དམག་མིས་འཛིན་བཟུང་དང་མནར་བཅོད་བཏང་ཡོང་བསམ་པའི་འཇིགས་སྣང་འོག་གནས་བཞིན་ཡོད་སྐོར་སོགས་ཀྱི་གསལ་བཤད་གནང། ཕྱོགས་མཚུངས་སྐབས་དེར་ཉི་ཧོང་ནང་པའི་མཐུན་ཚོགས་ཀྱི་མཁན་པོ་སྐུ་ཞབས་ཀོ་བྷ་ཡ་ཤི་མཆོག་གིས་བོད་ནང་བོད་མི་ཚོའི་འགྲོ་བ་མིའི་ཐོབ་ཐང་བརྡལ་བཤིག་གཏོང་བཞིན་པའི་ད་ལྟའི་ཛ་དྲག་གི་གནས་སྟངས་དེར་ཉི་ཧོང་གསར་འགྱུར་བརྒྱུད་ལམ་ཁག་གིས་གསལ་སྟོན་མ་བྱས་པའི་གནས་སྟངས་དེར་བློ་ཕམ་བྱུང་ཚུལ་གསུངས་པ་མ་ཟད། ཉི་ཧོང་གསར་འགྱུར་བརྒྱུད་ལམ་དང་མང་ཚོགས་རྣམས་ཀྱིས་བོད་མི་ཚོའི་རང་དབང་དང་དྲང་བདེན་ལ་རྒྱབ་སྐྱོར་གདུང་སེམས་མཉམ་སྐྱེ་ཐོག་རྒྱབ་སྐྱོར་གནང་དགོས་པའི་འབོད་སྐུལ་ཞུས་ཡོད། དེ་བཞིན་སྐབས་དེར་ཁོང་གིས་ཉི་ཧོང་ནང་པའི་མཐུན་ཚོགས་ཀྱིས་ རྒྱལ་ས་ཊོཀ་ཁྱོའི་ནང་རྟེན་གཞི་བྱས་པའི་ཕྱི་རྒྱལ་གསར་འགྱུར་ལས་ཁང་(Foreign Correspondent Club)དུ་གསར་འགོད་ལྷན་ཚོགས་ཤིག་སྐོང་ཚོགས་གནང་སྟེ་ཕྱི་ནང་གསར་འགྱུར་བརྒྱུད་ལམ་ཁག་ལ་བོད་ནང་དེང་སྐབས་བོད་མི་ཚོའི་གནས་སྟངས་ངོ་མ་ཇི་ཡིན་གསལ་བཤད་གནང་རྒྱུ་ཡིན་སྐོར་གསུངས་ཡོད། སྨོན་ལམ་གསུང་འདོན་སྐབས་སྒྲོལ་མ་དང་བཛྲ་གུ་རུ། བདེན་ཚིག་སྨོན་ལམ། ཤེས་རབ་སྙིང་པོ་བཅས་གསུང་འདོན་གནང་ཡོད་པ་མ་ཟད། ཉི་ཧོང་བོད་རང་དབང་སློབ་ཕྲུག་ཚོགས་པས་བོད་ཀྱི་གནད་དོན་སེལ་ཆེད་རྒྱལ་སྤྱིའི་གཞུང་འབྲེལ་བརྒྱུད་ལམ་ནས་ཐད་ཀར་ཐེ་བྱུས་ཐོག་རྒྱབ་སྐྱོར་གནང་དགོས་པའི་ལས་འགུལ་གཞི་རྒྱ་ཆེ་བ་ཞིག་སྤེལ་བཞིན་པའི་ལས་འགུལ་དེའི་ཆ་ཤས་སུ་མིང་རྟགས་བསྡུ་རུབ་ཀྱི་ལས་འགུལ་སྤེལ་ཡོད། སྨོན་ལམ་གསུང་འདོན་གྱི་མཇུག་བསྡོམས་སྐབས་ ཉི་ཧོང་བོད་རིགས་ས་གནས་མཐུན་ཚོགས་ཀྱི་ཚོགས་གཙོ་སྐུ་ཞབས་བློ་བཟང་ཡེ་ཤེས་ལགས་ཀྱིས་ཚོགས་བཅར་བ་རྣམས་ལ་ཐུགས་རྗེ་ཆེ་ཞུས་པ་དང་སྦྲགས་བོད་ནང་དྲང་བདེན་དང་རང་དབང་སླར་གསོ་ཡོང་སླད་བོད་མི་ཚོར་རྒྱབ་སྐྱོར་མུ་མཐུད་གནང་རོགས་ཞེས་འབོད་སྐུལ་ཞུས་ཡོད་པ་བཅས།།
