༢༠༡༡ ཟླ་ ༩ ཚེས་ ༢༩ རེས་གཟའ་ཕུར་བུ།
༄༅། །ཉེ་ལམ་སྐབས་ ༡༥ མདོ་སྨད་སྤྱི་འཐུས་རྒྱལ་རོང་ཟླ་བ་ཚེ་རིང་ལགས་གློ་བུར་དུ་བསྙུན་མནར་བྱུང་རྗེས་གཤག་གཅོད་བཏང་ཡང་དྲག་སྐྱེད་མ་བྱུང་བར་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་བཀའ་ཤག་གི་ལམ་སྟོན་འོག ཕྱི་ལོ་ ༢༠༡༡ ཟླ་ ༩ ཚེས་ ༢༩ རེས་གཟའ་ཕུར་བུའི་ཉིན་རྒྱབ་ཆུ་ཚོད་ ༢ ཐོག་ལས་བྱེད་གསོལ་ཐབས་ཡང་སྟེང་ཚོགས་ཁང་དུ་བཀའ་བློན་ཁྲི་པ་མཆོག་གིས་གཙོས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་གིས་གཙོས་ལས་བྱེད་ཚང་འཛོམས་ཐོག་ཚེ་འདས་དེ་ཉིད་ཀྱི་ཆེད་སྨོན་ལམ་གསུང་འདོན་གནང་ཡོད། སྐབས་དེར་ཐོག་མར་བཀའ་བློན་ཁྲི་པ་མཆོག་གིས་ཚེ་འདས་དམ་པ་དེ་ཉིད་ཀྱི་སྐུ་ཚེའི་ལོ་རྒྱུས་སྙིང་བསྡུས་ཤིག་སྒྲོག་སྦྱངས་གནང་རྗེས་ཚང་མས་སྨོན་ལམ་གསུང་འདོན་གནང་ཡོད་པ་མ་ཟད། ཆུ་ཚོད་ ༣ ནས་དམ་པ་ཁོང་ལ་མྱ་ངན་གུས་འདུད་མཚོན་ཆེད་བོད་མིའི་སྒྲིག་འཛུགས་ཀྱི་ལས་ཁུངས་ཁག་སྒོ་བརྒྱབ་ཡོད་པ་བཅས།།
མདོ་སྨད་སྤྱི་འཐུས་རྒྱལ་རོང་ཟླ་བ་ཚེ་རིང་དམ་པ་དེའི་ཆེད་བོད་མིའི་སྒྲིག་འཛུགས་ཀྱིས་མྱ་ངན་དང་སྨོན་ལམ་གསུང་འདོན་གནང་བ།
གསར་གནས།
འབྲེལ་གནས།
