༢༠༡༡ ཟླ་ ༨ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༢༧ ཉིན་སྦ་ར་སིའི་སྐུ་ཚབ་དོན་ཁང་གི་རྩིས་པ་དྲུང་གཞོན་བཀྲིས་ལགས་རྒྱུན་རིང་ནད་མནར་གྱི་རྐྱེན་པས་ཡུལ་དེའི་གྲོང་ཁྱེར་གྱི་སྨན་ཁང་ཞིག་ཏུ་ཉིན་རྒྱབ་ཆུ་ཚོད་ ༡༢།༡༠ ཙམ་ལ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བརྟེན། ཕྱི་ཚེས་ ༢༩ ཉིན་ཕྱེད་ཡོལ་ཆུ་ཚོད་ ༣ ནས་ ༤ བར་དབུས་བོད་མིའི་སྒྲིག་འཛུགས་ཀྱི་ལས་བྱེད་གསོལ་ཚང་ཡང་སྟེང་ཚོགས་ཁང་དུ་སྲི་ཞུ་བ་ལས་བྱེད་རྣམས་ཚང་འཛོམས་ཐོག་ཆུ་ཚོད་གཅིག་རིང་སྨོན་ལམ་གསུང་འདོན་གནང་ཡོད།
དེ་ཡང་སྐབས་དེར་བཀའ་ཁྲི་བློ་བཟང་སེང་གེ་མཆོག་གིས་དམ་པ་དེའི་ལོ་རྒྱུས་མདོ་ཙམ་གསལ་བཤད་གནང་གྲུབ་མཚམས་དབུས་བོད་མིའི་སྒྲིག་འཛུགས་ཀྱི་ལས་བྱེད་པ་ཡོངས་ནས་མྱ་ངན་གུས་དུད་ཀྱི་ངག་བཅད་སྐར་མ་གཅིག་གནང་སྟེ་ཉིན་རྒྱབ་ཆུ་ཚོད་ ༤ ནས་ ༥ བར་དབུས་བོད་མིའི་སྒྲིག་འཛུགས་ཀྱི་ལས་ཁུངས་རྣམས་སྒོ་བརྒྱབ་ཡོད།
དེ་ཡང་ཚེ་འདས་བཀྲིས་ལགས་ཀྱི་ལོ་རྒྱུས་སྙིང་བསྡུས་ནི། ཁོང་རྒྱ་གར་བྱང་ཕྱོགས་སིམ་ལ་བོད་མིའི་གཞིས་སྒར་དུ་ཕ་མཁས་བཙུན་དང་། མ་ལྷག་མཆོག་གཉིས་སུ་ཕྱི་ལོ་ ༡༩༦༦ ལོར་སྐྱེས། མ་སུ་རི་གཏན་སློབ་ནས་འཛིན་གྲྭ་བཅུ་གཉིས་ཐོན་པ་དང་།
ཕྱི་ལོ་ ༡༩༨༩ ལོར་གཞུང་ཞབས་ནང་འཛུལ་ཞུགས་གནང་སྟེ་ཟླ་དྲུག་ཚོད་ལྟའི་ཐོག་རྩིས་པར་བསྐོ་གཞག་གིས་འབིར་བོད་ཚོགས་གཞིས་ལས་ཁང་དུ་ཕྱག་ལས་གནང་།
ཕྱི་ལོ་ ༡༩༩༠ ལོར་གངས་སྐྱིད་ལས་བྱེད་གསོལ་ཚང་གི་རྩིས་པར་གནས་སྤོས་དང་། ཕྱི་ལོ་ ༡༩༩༡ ལོར་དཔལ་འབྱོར་ལས་ཁུངས་ཀྱི་ལས་ངོར་བསྐོ་གཞག་གནང་། ཕྱི་ལོ་ ༡༩༩༢ ལོར་ལས་དྲུང་གནས་རིམ་དུ་བསྐོ་གཞག་དང་། ཕྱི་ལོ་ ༡༩༩༣ ལོར་ལས་དོར་གནས་སྤར་གྱིས། ཕྱི་ལོ་ ༡༩༩༤ ལོར་ནང་སྲིད་ལས་ཁུངས་ཀྱི་ལས་དོར་གནས་སྤོས་གནང་། ཕྱི་ལོ་ ༡༩༩༦ ལོར་སྡེ་འགན་དུ་གནས་སྤར་གྱིས་ནང་སྲིད་ལས་ཁུངས་སུ་རང་འཇགས་དང་། ཕྱི་ལོ་ ༡༩༩༩ ལོར་ནང་སྲིད་ལས་ཁུངས་ཀྱི་དྲུང་ལས་ལས་འགན་དུ་བསྐོ་གཞག་གནང་། ཕྱི་ལོ་ ༢༠༠༢ ལོར་དྲུང་གཞོན་གྱིས་གནས་རིམ་གནས་སྤར་གྱི་དབུས་སྣེ་ལེན་ཁང་གི་རྩིས་པར་གནས་སྤོས་དང་། ཕྱི་ལོ་ ༢༠༠༤ ལོར་ནང་སྲིད་ལས་ཁུངས་སུ་དྲུང་གཞོན་དུ་གནས་སྤོས་གནང་། ཕྱི་ལོ་ ༢༠༠༨ ལོར་ཕ་རན་སི་དང་སྦར་སིལ་དོན་ཁང་དུ་གནས་སྤོས་ཀྱི་རྩིས་པའི་ལས་འགན་དུ་ལས་འགན་བཞེས་མུས་ཀྱིས་ལོ་ངོ་ ༢༢ རིང་སྲི་ཞུའི་ཞབས་འདེགས་ཞུས་ཡོད་།
འོན་ཀྱང་ཡིད་སྐྱོ་དགོས་པ་ཞིག་ལ་སྙུན་གཞིའི་ནད་མནར་གྱིས་རྐྱེན་པས་ཕྱི་ལོ་ ༢༠༡༡ ཟླ་ ༨ ཚེས་ ༢༧ ཉིན་རྒྱབ་འདས་གྲོངས་སུ་གྱུར་འདུག་པ་བཅས།།
