༢༠༡༡ ཟླ་ ༧ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༦ ཉིན་ཨ་རིའི་སྲིད་འཛིན་སྐུ་ཞབ་བྷ་རཀ་ཨོ་བྷ་མ་མཆོག་དང་༸གོང་ས་སྐྱབས་མགོན་ཆེན་པོ་མཆོག་མཇལ་འཕྲད་ལེགས་པར་གྲུབ་བསྟུན་ཨ་རིའི་སྲིད་འཛིན་གྱི་ཕོ་བྲང་དཀར་པོ་ནས་དབུ་ཁྲིད་རྣམ་གཉིས་ཀྱི་མཇལ་འཕྲད་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་འཁོད་དོན། སྲིད་འཛིན་མཆོག་གིས་དེ་རིང་སྔ་དྲོ་ཕོ་བྲང་དཀར་པོའི་ནང་བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་ ༡༤ མཆོག་དང་མཇལ་འཕྲད་གནང་ཡོད། སྐབས་དེར་སྲིད་འཛིན་མཆོག་གིས་འཛམ་གླིང་ཕྱོགས་མཐའ་ཀུན་ཏུ་བོད་མིའི་ཐུན་མིན་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་ཆེད་རྒྱབ་སྐྱོར་ཤུགས་ཆེ་གནང་རྒྱུ་ཡིན་པ་བསྐྱར་ནན་ཐོག་གསལ་བཤད་ཞུས་ཡོད། ཕྱོགས་མཚུངས་སྲིད་འཛིན་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་ཡོད་པའི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་གལ་ཆེ་ཡིན་སྐོར་གསུངས་ཡོད། སྲིད་འཛིན་མཆོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ཐོག་ནས་གྲོས་མོལ་གྱིས་ལམ་ནས་བོད་ཀྱི་གནད་དོན་སེལ་ཆེད་དབུ་མའི་ལམ་གྱི་ཐབས་ལམ་དེར་བསྔགས་བརྗོད་གནང་བ་དང་ཆབས་ཅིག བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་སུ་གཏོགས་པ་ལས་རང་བཙན་གྱི་རྒྱལ་ཁབ་གཅིག་ལ་ངོས་འཛིན་མི་བྱེད་པའི་ཨ་རིའི་ཆབ་སྲིད་ཀྱི་ལངས་ཕྱོགས་དེ་བསྐྱར་བཤད་གནང་བ་དང་སྦྲགས་ཡུན་རིང་སོང་བའི་བོད་རྒྱའི་གནད་དོན་དེ་ཕྱོགས་གཉིས་ཀས་ཐད་ཀར་གྲོས་མོལ་ལམ་ནས་སེལ་ཐུབ་ཚེ་བོད་རྒྱ་གཉིས་ཀར་ཁེ་ཕན་ཡོད་སྐོར་གསུངས་ཡོད། དེ་བཞིན་སྲིད་འཛིན་མཆོག་གིས་ཨ་རི་དང་རྒྱ་ནག་གཉིས་མཉམ་འབྲེལ་ཐོག་བྱ་རྒྱུའི་ཚོང་དོན་གྱི་འབྲེལ་ལམ་དེ་གལ་ཆེར་རྩི་བཞིན་ཡོད་སྐོར་གསུངས་ཡོད།  དེ་བཞིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་རང་བཙན་རྩོད་ཀྱི་མེད་སྐོར་དང་རྒྱ་ནག་དཔོན་རིགས་ཚོ་དང་ཁོང་གི་སྐུ་ཚབ་དབར་གང་མྱུར་གྲོས་མོལ་བསྐྱར་མཐུད་ཡོང་རྒྱུའི་ཐུགས་རེ་འཆང་བཞིན་ཡོད་སྐོར་བཀའ་སྩལ་ཡོད་སྐོར་གྱི་གསར་འགོད་གསལ་བསྒྲགས་སྤེལ་ཡོད།