༢༠༡༡ ཟླ་ ༧ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༢༠ ཉིན་རྡ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་འོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ལྷོ་ཕྱོགས་གཞིས་ཆགས་ཁག་ལྔ་དང་། གཞན་ཡང་མན་པར་དང་བྷན་ཌར་གཞིས་ཆགས་བཅས་ནས་ཁྱོན་མི་གྲངས་ ༦༠ ཙམ་གྱིས་ཟབ་སྦྱོང་ནང་མཉམ་ཞུགས་བྱས་ཡོད། ཉིན་གསུམ་གྱི་ཟབ་སྦྱོང་དེའི་རིང་མོན་གྷོ་ས་འཐུས་ཀྱི་ཚོགས་མི་རྣམས་དང་རང་བདེན་ཚོགས་ཆུང་གི་ཚོགས་མི་རྣམ་པ། ས་གནས་གཞོན་ནུ་དང་བུད་མེད་ཚོགས་པའི་ཚོགས་མི་བཅས་ཀྱང་ཕེབས་ཡོད། ཟབ་སྦྱོང་དབུ་འབྱེད་སྐབས་མོན་གྷོ་ས་གནས་འགོ་འཛིན་དཔལ་ལྡན་དོན་གྲུབ་ལགས་ཀྱིས་གསུང་དོན། ཟབ་སྦྱོང་བ་རྣམས་ཀྱིས་རང་གནས་སུ་ཕེབས་ཏེ་བོད་མི་གཞོན་སྐྱེས་ཚོར་མང་གཙོ་དང་འགྲོ་བ་མིའི་ཐོབ་ཐང་སོགས་ཀྱི་སྐོར་གོ་རྟོགས་རྒྱ་གང་ཆེ་སྤེལ་ཐུབ་རྒྱུའི་འབད་བརྩོན་གནང་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་གསུངས། གཞན་ཡང་སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་དེང་སྐབས་བོད་མི་ཚོས་མང་གཙོའི་གོ་རྟོགས་འཕེལ་རྒྱས་ཐོག་བཙན་བྱོལ་བོད་མིའི་མང་གཙོའི་ལམ་སྲོལ་ནང་མཉམ་ཞུགས་གནང་རྒྱུ་དེ་སྔར་ལས་ཚགས་ཚུད་པ་དང་ཚད་མཐོ་བ་ཞིག་ཡོང་ཐུབ་པ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་སོགས་ཟབ་སྦྱོང་དང་འབྲེལ་བའི་ངོ་སྤྲོད་ཀྱི་གསུང་བཤད་གནང།
ཕྱོགས་མཚུངས་དབུས་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་རྒྱལ་སྤྱིའི་ནང་བོད་ཀྱི་གནས་བབ་ཇི་འདྲ་ཡིན་སྐོར་དང་དེང་སྐབས་ཕྱི་ནང་རྒྱ་རིགས་མང་པོས་བོད་དོན་ལ་རྒྱབ་སྐྱོར་ཤུགས་ཆེ་རུ་འགྲོ་བཞིན་ཡོད་པ་དེ་ཧ་ཅང་གལ་ཆེན་པོ་ཆགས་ཡོད་སྐོར་དང་། བོད་ཀྱི་ཁོར་ཡུག་གི་གནས་སྟངས་དེ་འཛམ་གླིང་གི་སྣེ་གསུམ་པ་ཞེས་ངོས་འཛིན་བྱེད་བཞིན་ཡོད་སྐོར། དེ་བཞིན་ཨེ་ཤི་ཡའི་མི་མང་ས་ཡ་མང་པོའི་འཚོ་གནས་དང་འབྲེལ་བ་ཆགས་པར་བརྟེན་བོད་ཀྱི་ཆུ་ཆེན་དེ་དག་སྲུང་སྐྱོབ་བྱེད་རྒྱུ་ཧ་ཅང་གལ་ཆེ་ཡིན་སྐོར་སོགས་ཀྱི་གསུང་བཤད་གནང་།
མཐར་ཚོགས་བཅར་བ་རྣམས་ཀྱིས་དྲི་བར་ལན་འདེབས་གནང་ཡོད་པ་བཅས།།