༢༠༡༡ ཟླ་ ༧ ཚེས་ ༨ རེས་གཟའ་པ་སངས།

༄༅། །ཕྱི་ལོ་ ༢༠༡༡ ཟླ་ ༧ ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་མི་སེར་རྒྱལ་ཁབ་ཀྱི་སྲིད་དོན་ཚོགས་པ་ (Republic) དང་མང་གཙོ་ཚོགས་པ་ (Democrat) བཅས་ཐུན་མོང་གི་ཚབ་ཞུས་ཏེ་གྲོས་ཚོགས་ཀྱི་ཚོགས་གཙོ་སྐུ་ཞབས་ཇོན་བྷོ་ཨེ་ནར་ (John Boehner) མཆོག་གིས་ཨ་རིའི་གྲོས་ཚོགས་སུ་ (Congress) ཇི་ལྟར་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་ཡོད། སྐབས་དེར་མགོན་པོ་གང་ཉིད་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་་པི་ལོ་སི་ (Nancy Pelosi) མཆོག་དང་ཨེ་ལི་ཡ་ན་ རོ་སི་ ལེ་ཊི་ནན་ (Ileana Ros-Lehtinen) མཆོག  ཧོ་ཝཌ་ཨེལ་ བར་མན་ (Howard L. Berman) མཆོག

པར་ལེན་ཆོས་འབྱོར།

ཁ་རེ་སི་མི་ཐི་ (Christ Smith) མཆོག ནི་ཏ་ ལོ་ཝེ་ (Nita Lowey) མཆོག ཕ་རེན་ཀི་  ཝུལ་ཕི། (Frank Wolf) མཆོག་བཅས་གྲོས་ཚོགས་འཐུས་མི་བདུན་ཙམ་དང་མཇལ་འཕྲད་མཛད་སྐབས་བོད་དང་རྒྱ་ནག་བཅས་ཀྱི་གནད་དོན་ཐད་གསུང་མོལ་མཛད་ཡོད།  སྐབས་དེར་གྲོས་ཚོགས་འཐུས་མི་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་བ་མེད་པའི་བཞེངས་ཕྱོགས་དེར་བསྔགས་བརྗོད་དང་རྒྱབ་སྐྱོར་ཤུགས་ཆེ་ཞུས་འདུག
དེ་རྗེས་༸གོང་ས་མཆོག་དང་ཚོགས་གཙོ་སྐུ་ཞབས་ཇོན་བྷོ་ཨེ་ནར་མཆོག ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་་པི་ལོ་སི་ མཆོག་བཅས་ལྷན་ཞུགས་ཐོག་གསར་འགོད་པ་ཚོར་གསལ་བསྒྲགས་མཛད་ཡོད།

པར་ལེན་ཆོས་འབྱོར་ལགས།

དེ་ཡང་ཐོག་མར་ཚོགས་གཙོ་སྐུ་ཞབས་ཇོན་ བྷོ་ཨེ་ནར་ མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཨ་རིའི་གྲོས་ཚོགས་ཁང་དུ་གདན་ཞུས་ལྟར་ཆིབས་སྒྱུར་བཀའ་དྲིན་བསྐྱངས་པར་ང་ཚོར་ཆེ་མཐོང་ཆེན་པོ་ཐོབ་བྱུང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཨ་རིའི་མི་མང་དབར་ཡུན་རིང་ནས་མཛའ་བརྩེའི་འབྲེལ་ལམ་དམ་ཟབ་ཡོད་པར་བརྟེན། ཁོང་གྲོས་ཚོགས་སུ་གདན་ཞུ་གནང་རྒྱུ་ཡིན་པ་དེ་སྔ་ས་ནས་ཚོད་དཔག་ཐུབ་ཀྱི་ཡོད་སྟབས་གནད་དོན་དེར་ཧང་སངས་དགོས་དོན་གང་ཡང་མེད། དེར་བརྟེན་ཁོང་གྲོས་ཚོགས་སུ་གདན་ཞུ་ཞུས་པ་དེ་འགྲིག་པ་ཞིག་ཡིན་པ་ངས་བསམ་བཞིན་ཡོད།

བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ས་གནས་གང་དུ་ཆིབས་སྒྱུར་བསྐྱངས་རུང་ངལ་བ་ཁྱད་གསོད་ཀྱིས་བྱམས་བརྩེ་དང་བཟོད་བསྲན། འཚེ་བ་མེད་པ། དྲང་བདེན། རང་དབང་སོགས་འགྲོ་བ་མིའི་རིན་ཐང་གོང་མཐོར་གཏོང་རྒྱུར་ཐུགས་བརྩོན་མཛད་བཞིན་པའི་མཛད་རྗེས་དེའི་རིན་ཐང་དེ་དག་ལ་གཙིགས་ཆེར་འཛིན་བཞིན་པའི་ཨ་རི་རྒྱལ་ཁབ་ཀྱིས་ཡི་རང་ཞུ་བཞིན་ཡོད། བོད་མི་ཚོར་རྒྱབ་སྐྱོར་བྱེད་རྒྱུའི་ཆོད་སེམས་དེས་ཨ་རིའི་གྲོས་ཚོགས་ཀྱི་ཆབ་སྲིད་ཚོགས་པ་གཉིས་པོ་ (Republic and Democrat) འདིར་ཨ་རིའི་གྲོས་ཚོགས་སུ་མཉམ་འཛོམས་ཐུབ་པ་བྱུང་ཡོད། འབྱུང་འགྱུར་ཡང་ཆབ་སྲིད་ཚོགས་པ་གཉིས་པོས་མཉམ་རུབ་ཐོག་དུས་ཡུན་ཇི་ཙམ་འགོར་མིན་ལ་མ་ལྟོས་པར་བོད་མིའི་རྩ་དོན་བསྒྲུབ་རྒྱུར་རྒྱབ་སྐྱོར་མུ་མཐུད་ཞུ་ཐུབ་པའི་རེ་བ་ཞུ་བཞིན་ཡོད་ཅེས་གསུང་བཤད་གནང་འདུག
དེ་ནས་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་་པི་ལོ་སི་ མཆོག་གིས་ཚོགས་གཙོ་མཆོག་ལ་ཐེངས་འདིར་༸གོང་ས་མཆོག་གྲོས་ཚོགས་སུ་གདན་ཞུ་གནང་བར་ཐུགས་རྗེ་ཆེ་ཞུས་པ་དང་སྦྲགས། ༸གོང་ས་མཆོག་སྐུ་གཞོན་ནུའི་སྐབས་དེ་སྔའི་ཨ་རིའི་སྲིད་འཛིན་སྐུ་ཞབས་ཕེ་རན་ཀི་ལིན་རུ་སུ་ཝིལ་ཌི་ (President Franklin Roosevelt) མཆོག་གིས་ཆུ་ཚོད་གཅིག་ཕྱག་རྟགས་སུ་སྩལ་སྐོར་དང། དེ་རྗེས་ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི་ཌབ་ལུ་བྷུ་ཤུ་མཆོག་གིས་ཨ་རིའི་སྲིད་འཛིན་གྱི་གསེར་གྱི་གཟེངས་རྟགས་འབུལ་ལམ་ཞུས་པ་མ་ཟད། ཨ་རིའི་སྲིད་འཛིན་ལས་ཐོག་སྐུ་ཞབས་བྷ་རཀ་ཨོ་བྷ་མ་མཆོག་གིས་༸གོང་ས་མཆོག་ཕོ་བྲང་དཀར་པོའི་ནང་མཇལ་འཕྲད་མཛད་ཡོད་སྐོར་སོགས་ཀྱི་གསུང་བཤད་གནང་གྲུབ་མཚམས།

༸གོང་ས་མཆོག་གིས་གསར་འགོད་པ་ཚོར་བཀའ་སློབ་སྩལ་དོན།  ངོས་ལ་དམིགས་བསལ་གང་ཡང་ཞུ་རྒྱུ་མེད། ངོས་རང་ཐེངས་འདིར་ཨ་རིའི་རྒྱལ་ས་ཝ་ཤིང་ཊོན་དུ་ཡོང་རྒྱུའི་དགོས་དམིགས་གཙོ་བོ་དེ་ནང་ཆོས་ནས་གསུངས་པའི་བྱིན་རླབས་ཆེ་བའི་བརྒྱུད་ཀྱི་ཆོས་འབྲེལ་ཆེད་ཡོང་བ་ཞིག་ཡིན། ངོས་རང་འདིར་བསླེབས་རྗེས་ངོས་ཀྱི་གྲོགས་པོ་རྙིང་པོ་ཚོ་དང་ཐུག་འཕྲད་བྱེད་རྒྱུ་དེ་ངོས་ཀྱི་ལས་འགན་ཞིག་ཆགས་ཀྱི་ཡོད། ལྷག་པར་ཚོགས་ཁང་འདིས་ང་ཚོར་རྟག་ཏུ་བློ་སྤོབས་བསྐྲུན་བཞིན་འདུག་པས་འདིར་འདུས་ཁྱེད་རྣམས་ཚང་མར་ཐུགས་རྗེ་ཆེ་ཞུ་རྒྱུ་ཡིན་ཞེས་བཀའ་སློབ་སྩལ་བ་མ་ཟད། མགོན་པོ་གང་ཉིད་མཆོག་གིས་ཉེ་ལམ་བོད་མིའི་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་དགོས་པའི་རྒྱུ་མཚན་རྣམས་གསལ་བཤད་མཛད་དོན། ཆོས་དཔོན་དང་རྒྱལ་པོ་རྒྱལ་མོས་རྒྱལ་ཁབ་ཀྱི་དབུ་ཁྲིད་བྱེད་རྒྱུའི་དུས་ཚོད་དེ་ནི་ད་ཆ་ཡོལ་ཟིན་པ་ཞིག་ཡིན་པ་ངོས་ཀྱིས་བསམ་བཞིན་ཡོད། ཆོས་སྲིད་གཉིས་ཀྱི་སྒྲིག་འཛུགས་སོ་སོར་ཐ་དད་འབྱེད་དགོས་པ་གལ་ཆེན་པོ་རེད་ཅེས་བཀའ་སློབ་སྩལ་བ་དང་སྦྲགས། མགོན་པོ་གང་ཉིད་མཆོག་སྐུ་གཞོན་ནུའི་དུས་ནས་བོད་ཀྱི་སྤྱི་ཚོགས་དེ་བཞིན་མང་གཙོའི་ལམ་ལ་བསྒྱུར་གནང་མཛད་རྒྱུའི་དགོངས་བཞེས་ཡོད་པར་བརྟེན།  ད་ལྟ་ཆབ་སྲིད་ཀྱི་ཐུགས་འགན་ལས་རྒན་ཡོལ་ཆ་ཚང་ཕེབས་རྒྱུའི་དགོངས་གཞི་དེ་གློ་བུར་གྱི་ཐག་གཅོད་ཅིག་མིན་སྐོར་སོགས་ཀྱི་བཀའ་སློབ་སྩལ། སྐབས་དེར་༸གོང་ས་མཆོག་དང་ལྷན་དབུས་བོད་མིའི་སྒྲིག་འཛུགས་ཀྱི་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་སྐབས་གསུམ་པའི་བཀའ་ཁྲིར་འདེམས་ཐོན་བྱུང་བ་མཁས་དབང་བློ་བཟང་སེང་གེ་མཆོག ༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག དེ་བཞིན་སྐུ་སྒེར་ཟུང་དྲུང་བསྟན་འཛིན་སྟག་ལྷ་ལགས་བཅས་ལྷན་བཅར་ཞུས་ཡོད་པ་བཅས།།