༢༠༡༡ ཟླ་ ༧ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་ཁམས་དཀར་མཛེས་ཁུལ་དུ་རྒྱ་ནག་གཞུང་གིས་དྲག་ཆས་ཉེན་རྟོག་པས་དྲག་སྤྱོད་དང་བཙོན་འཇུག་རབ་དང་རིམ་པ་བྱས་དང་བྱེད་བཞིན་ཡོད་ནའང་བོད་མི་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཕྱི་ཟླ་ ༧ ཕྱི་ཚེས་ ༥ ཉིན་དཀར་མཛེས་རྫོང་ཁོངས་འབྲིང་རིམ་མི་དམངས་ཁྲིམས་ཁང་གིས་འདི་ལོ་ཕྱི་ཟླ་དྲུག་པའི་ནང་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་སྐད་འབོད་བྱས་རྐྱེན་འཛིན་བཟུང་བཙོན་འཇུག་བྱས་པའི་ཁྲོད་བོད་མི་ ༡༣ ལ་ཁྲིམས་ཐག་བཅད་ཡོད། ཁོང་ཚོའི་ཁྲོད་ནས་རང་ལོ་ ༡༩ ཡིན་པ་བསོད་ནམས་ཆོས་རྒྱལ་དང་། བསོད་ནམས་ཉི་མ་གཉིས་ཀྱིས་དཀར་མཛེས་རྫོང་གི་ཁྲོམ་གཞུང་དུ་ཞི་རྒོལ་སྐད་འབོད་བྱས་པར་བརྟེན། དྲག་ཆས་ཉེན་རྟོག་པ་དང་། དམག་མིས་ཉེས་རྡུང་བཏང་སྟེ་འཛིན་བཟུང་བཙོན་འཇུག་བྱས་ནས།
ཕྱི་ཚེས་ ༥ ཉིན་དཀར་མཛེས་རྫོང་མི་དམངས་ཁྲིམས་ཁང་ཟེར་བ་ནས་ཁོང་གཉིས་ལ་དུས་བཀག་བཙོན་འཇུག་ལོ་ ༣ གྱི་ཁྲིམས་ཐག་བཅད་དེ་ད་ལྟ་བྲག་འགོ་རྫོང་གི་བཙོན་ཁང་ཞིག་གི་ནང་དུ་བཙོན་འཇུག་བྱས་ཡོད། ཁོང་གཉིས་ནི་ཟི་ཁྲོན་ཞིང་ཆེན་དཀར་མཛེས་རྫོང་། ལྷོ་པ་ཤང་། ཁ་དཀར་གྲོང་ཚོ་ནས་ཡིན་འདུག
རྒྱལ་སྤྱིའི་བོད་དོན་ལས་འགུལ་ཁང་གི་དྲ་རྒྱའི་ཐོག་ཡོད་པའི་འདྲ་དཔར་ལྟར་ན་དཀར་མཛེས་རྫོང་ཁོངས་ཀྱི་ཏརེ་ཧོར་བྲག་འགོའི་བོད་མི་རྣམས་ཀྱིས་རྒྱ་ནག་གཞུང་གིས་དམ་བསྒྲགས་ཤུགས་ཆེ་ཡོད་བཞིན་དུ་སྐུའི་འཁྲུངས་སྐར་ཉིན་སོ་སོའི་ཁང་པའི་ཐོག་ཏུ་བསངས་གསོལ་བཏང་ཡོད་འདུག སྤྱིར་འདི་ལོའི་ཕྱི་ཟླ་ ༣ ནས་བཟུང་བོད་ཁམས་དཀར་མཛེས་ཁུལ་དུ་རྒྱ་ནག་གཞུང་གི་དྲག་ཆས་ཉེན་རྟོག་པ་དང་དམག་མིས་དམ་བསྒྲགས་ཤུགས་ཆེ་བྱས་དང་བྱེད་བཞིན་ཡོད། ཉེ་ལམ་ཞི་རྒོལ་རྔམ་སྟོན་ཁྲོམ་སྐོར་བྱེད་མཁན་བསྐྱར་དུ་བྱུང་བར་བརྟེན་ཕལ་ཆེར་བོད་མི་སེར་སྐྱ་ཕོ་མོ་ ༣༠ ཙམ་དུས་བཀག་བཙོན་འཇུག་བྱས་ཡོད་འདུག་པ་བཅས།།
