༢༠༡༡ ཟླ་ ༦ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༦ ཚེས་ ༨ རེས་གཟའ་ལྷག་པའི་ཉིན་སུད་སི་གྲོང་ཁྱེར་འཇི་ནི་ཝའི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆེན་འཚོགས་བཞིན་པའི་སྐབས་དང་བསྟུན་འཛམ་གླིང་མཉམ་འབྲེལ་རྒྱལ་ཚོགས་ཀྱི་བཙན་འཁྲིད་འོག་གར་སོང་ཆ་མེད་དུ་གྱུར་བའི་གནད་དོན་རྟོག་ཞིབ་ཚོགས་ཆུང་གིས་རྒྱ་ནག་གཞུང་གིས་བཙན་དབང་འོག་གར་སོང་ཆ་མེད་དུ་གྱུར་བ་རྣམས་དང་།  ལྷག་པར་བོད་པའི་དགེ་འདུན་པ་གར་སོང་ཆ་མེད་དུ་གྱུར་བ་རྣམས་ཀྱི་གནས་སྟངས་ཐོག་སེམས་འཚབ་ཆེན་པོ་ཡོད་སྐོར་གསུངས་པ་མ་ཟད། ཁོང་རྣམས་གང་དུ་ཡོད་མེད་དང་གནས་སྟངས་ཇི་འདྲ་ཡིན་མིན་སྐོར་ལ་རྒྱ་ནག་གཞུང་གིས་གསལ་བཤད་དགོས་པའི་རེ་འདུན་ཤུགས་ཆེ་བཏོན་པའི་ཞུ་སྙན་ནང་འཁོད་དོན།
ང་ཚོར་འབྲེལ་ཡོད་རྒྱ་ནག་སྲིད་གཞུང་ནས་བཙན་དབང་འོག་གར་སོང་ཆ་མེད་དུ་གྱུར་བའི་དགེ་འདུན་པ་རྣམས་ཀྱི་གནས་སྟངས་ཇི་འདྲ་ཡིན་མིན་སྐོར་ཞིབ་ཕྲ་གསལ་བཤད་གནང་དགོས་པ་མ་ཟད།  དོན་རྐྱེན་དེ་དག་ལ་འབྲེལ་ཡོད་དབང་འཛིན་པ་ཚོས་ཞིབ་འཇུག་ནན་པོ་བྱེད་དེ་ཉེས་ཅན་པ་ཚོའི་ནག་ཉེས་ཆེ་ཆུང་ལ་གཞིགས་པའི་ཁྲིམས་གཅོད་བྱེད་དགོས། ཕྱོགས་མཚུངས་བཙན་འཁྲིད་བྱས་པའི་བཙོན་པ་སུ་ཡིན་རུང་བཙོན་པ་དེའི་ནང་མི་ཚོར་ཁོང་གང་དུ་ཡོད་མེད་དང་ཁོང་གི་གནས་སྟངས་ཇི་ཡིན་གནས་ཚུལ་ཁ་གསལ་ཐོག་གསལ་བཤད་བྱེད་དགོས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ཐོག་བཞག་པའི་རྒྱལ་སྤྱིའི་ཁྲིམས་ལ་སྲུང་བརྩི་བྱེད་དགོས་ཞེས་སོགས་འཁོད་ཡོད།