༢༠༡༡ ཟླ་ ༦ ཚེས་ ༡༣ རེས་གཟའ་ཟླ་བ།
༄༅། ། ཕྱི་ལོ་ ༢༠༡༡ ཟླ་ ༥ ཚེས་ ༣༠ ཉིན་འཛིན་སྐྱོང་བཀའ་ཤག་ནས་བཀོད་ཁྱབ་གནང་བའི་ནང་འཁོད་དོན། ཇི་ལྟར་དགོངས་མངའ་བཞིན་ཕྱི་ལོ་ ༢༠༡༡ ཟླ་ ༥ ཚེས་ ༢༩ སྔ་དྲོ་སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱིས་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་གནང་བར་༸གོང་ས་༸སྐྱབས་མགོན་ཆེན་པོ་མཆོག་གི་ཆོག་མཆན་སྩལ་ཐོན་གྱིས་ཁྲིམས་སུ་བཅས་ཟིན་པ་དེའི་རྗེས་འབྲས་སུ་དེ་སྔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐད་ཀར་བསྐོ་གཞག་གནང་བའི་དམིགས་བསལ་སྐུ་ཚབ་ཀྱི་ལས་དུས་རྫོགས་ཟིན་པ་དེ་ལྟར་ཡང་། ཁོང་གི་སྐབས་བབ་མཛད་ཁུར་ལ་འཐུས་ཤོར་བར་ཆད་མི་འབྱུང་ཆེད་བཀའ་ཟུར་རྒྱ་རི་བློ་གྲོས་རྒྱལ་མཚན་རིན་པོ་ཆེ་མཆོག་ལ་བཀའ་ཤག་གི་བཀོད་ཁྱབ་གསར་པ་མ་བྱུང་བར་དམིགས་བསལ་སྐུ་ཚབ་ཏུ་མུ་མཐུད་བསྐོ་གཞག་བྱས་པ་ཡིན།
བཅའ་ཁྲིམས་དོན་ཚན་དང་པོའི་ནང་གསེས་ ༣ པའི་དགོངས་དོན་ལྟར་སྐུ་ཉིད་ལ་ལས་རྒྱུན་རིང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་གསོལ་སྩལ་བཀའ་དྲིན་ཆེ་སོང་བ་དེ་དོན་དགོངས་འཇགས་ཞུ། ཞེས་བསྐོ་གཞག་གནང་ཡོད།
དེ་བཞིན་སྐུ་ཚབ་སྐལ་བཟང་རྒྱལ་མཚན་མཆོག་ལའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐད་ཀར་བསྐོ་གཞག་སྩལ་བའི་སྐུ་ཚབ་ཀྱི་ལས་དུས་རྫོགས་ཟིན་པ་དེ་ལྟར་ཡང་། ཁོང་གི་སྐབས་བབ་མཛད་ཁུར་ལ་འཐུས་ཤོར་བར་ཆད་མི་འབྱུང་ཆེད་དྲུང་ཆེ་སྐལ་བཟང་རྒྱལ་མཚན་མཆོག་ལ་བཀའ་ཤག་གི་བཀོད་ཁྱབ་གསར་པ་མ་བྱུང་བར་སྐུ་ཚབ་ཏུ་མུ་མཐུད་བསྐོ་གཞག་བྱས་པ་ཡིན།
བཅའ་ཁྲིམས་དོན་ཚན་དང་པོའི་ནང་གསེས་ ༣ པའི་དགོངས་དོན་ལྟར་སྐུ་ཉིད་ལ་ལས་རྒྱུན་རིང་༸གོང་ས་༸སྐྱབས་མགོན་ཆེན་པོའི་སྐུ་ཚབ་ཀྱི་མཚན་གནས་གསོལ་སྩལ་བཀའ་དྲིན་ཆེ་སོང་བ་དེ་དོན་དགོངས་འཇགས་ཞུ། ཞེས་བསྐོ་གཞག་གནང་ཡོད།། ༎
བཅའ་ཁྲིམས་བསྐྱར་བཅོས་ཟིན་རྗེས་བཀའ་ཤག་གིས་དམིགས་བསལ་སྐུ་ཚབ་ལས་གནས་རང་འཇགས་ཐོག་བཀོད་སྒྲིག་གནང་བ།
གསར་གནས།
འབྲེལ་གནས།
