༢༠༡༡ ཟླ་ ༦ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༣ ཉིན་འདི་གར་ཏི་ཛུ་དར་རྒྱས་གླིང་ས་གནས་འགོ་འཛིན་ལས་ཁང་གི་བཏང་གནས་ནང་འཁོད་དོན། ཀ རང་གཞུང་ནས་ལམ་སྟོན་ཇི་ཕེབས་ཆབ་སྲིད་དང་འབྲེལ་བའི་དུས་དྲན་ཁག་སྲུང་བརྩི་ཞུ་བཞིན་ཡོད། ཇི་ལྟར་དགོངས་མངའ་བཞིན་ཏི་ཛུ་གཞིས་ཆགས་འདི་བཞིན་དམ་བསྒྲགས་ས་ཁུལ་ནང་གནས་ཡོད་པའི་ཆ་ནས་ཏི་ཛུ་ཁྲོམ་གཞུང་དང་ཉེ་འཁོར་གྲོང་ཁྱེར་དུ་རྔམ་སྟོན་ཁྲོམ་སྐོར་གྱི་སྐད་འབོད་བྱེད་རྒྱུའི་ཆོག་མཆན་གནང་སྲོལ་མེད། འོན་ཀྱང་གསུམ་བཅུའི་དུས་དྲན་དང་དགོས་གལ་ནམ་བྱུང་ས་གནས་སུ་ཞི་བའི་ཁྲོམ་སྐོར་དང་སྨོན་ལམ་གསུང་འདོན་སོགས་དབུ་མའི་ལམ་གྱི་འགན་འཛིན་ལགས་ནས་གཙོ་འགན་བཞེས་ཏེ་ལས་འགུལ་ལག་བསྟར་ཞུ་བཞིན་ཡོད། དེ་བཞིན་འདི་ལས་ནས་གསུམ་དུས་ངོ་སྤྲོད་མཉམ་༸གོང་ས་མཆོག་གི་གསུམ་བཅུའི་དུས་དྲན་ཐེངས་ ༥༢ ཐོག་གི་གསུང་འཕྲིན་དང་། བོད་མི་མང་སྤྱི་འཐུས་ལྷན་ཁང་དང་བཀའ་ཤག་གི་གསུང་བཤད་བཅས་གཞིས་མི་ལྷན་འཛོམས་ཐོག་སྒྲོགས་སྦྱང་གིས་འགྲེལ་བརྗོད་ཞུས་ཏེ་གཞིས་མི་མང་ཚོགས་དང་གཞོན་སྐྱེས་རྣམས་ནས་བོད་ཀྱི་ད་ལྟའི་གནས་སྟངས་ཐོག་དོ་སྣང་ཆེ་རུ་འགྲོ་བཞིན་འདུག འདི་ལོའི་ཕྱི་ཟླ་ ༣ ཚེས་ ༡༠ ཉིན་ཏི་ཛུ་དར་རྒྱས་གླིང་གི་བླ་སྤྲུལ་དགེ་འདུན་རྣམ་པ་དང་མི་མང་ཡོངས་ནས་སྔ་དྲོ་ཆུ་ཚོད་ ༧ ཐོག་རྟེན་མཁར་དྲུང་དུ་བསངས་གསོལ་གནད་སྨིན་གཟབ་རྒྱས་ཞུས་རྗེས་དགེ་འདུན་པ་དང་མི་མང་ཡོངས་གཞིས་ཆགས་ནས་ཏི་ཛུ་ཁྲོམ་གཞུང་བར་ཀོ་ལོར་མི་ཀྲར་ ༧ བར་ཞི་བའི་གོམ་བགྲོད་ཐོག་བྱང་ཆུབ་སེམས་མཆོག་རིན་པོ་ཆེ་གསུང་འདོན་གནང་སྟེ་ཞི་བའི་གོམ་བགྲོད་དུ་བསྐྱོད་པ་མ་ཟད། དེ་ཉིན་བོད་དོན་ཐོག་ཡིག་ཆ་འགྲེམས་སྤེལ་གང་མང་ཞུས་ཡོད་།
ཁ ཕྱི་ཟླ་ ༤ ཚེས་ ༡༤ ཉིན་བོད་མདོ་ཁམས་སྒ་སྐྱེ་རྒུ་མདོར་རུ་ས་ཡོམ་གྱི་འཇིག་པ་ཚབས་ཆེན་བྱུང་སྟེ་བོད་རིགས་མི་གྲངས་ཧ་ཅང་མང་པོར་སྲོག་སྐྱོན་དང་རྨས་སྐྱོན་ཕོག་པ་མ་ཟད། སྡོད་ཁང་སོགས་རྩ་མེད་ཕྱིན་པའི་ཡིད་སྐྱོ་བའི་གནས་ཚུལ་ཐོན་པར་རྣམས་ལ་གདུང་སེམས་མཉམ་སྐྱེ་མཚོན་ཆེད་གཞིས་ཆགས་ཀྱི་ཕོ་བྲང་ནང་མ་བསྐུལ་དྭང་བླང་ཐོག་བླ་སྤྲུལ་དགེ་འདུན་རྣམ་པ་དང་། ས་གནས་འགོ་འཛིན་གཞིས་མཉམ་གཉིས་ཀྱི་ལས་བྱེད་དང་། གཞིས་གྲོང་ལྔའི་མི་མང་རྒན་བྱིས་ཡོངས་ནས་སྡུག་སེམས་མཉམ་སྐྱེས་ཀྱི་ཞལ་འདེབས་བསྡུ་རུབ་མཚོན་པའི་རྐྱེན་འདས་སོང་བ་རྣམས་ཀྱི་ཆེད་བདུན་ཚིགས་ཀྱི་ཞབས་རིམ་སྒྲུབ་པའི་སྐབས་མི་མང་ནས་ཞབས་རིམ་གང་ཐུབ་གསོག་སྒྲུབ་ཀྱི་སྒྲུབ་ཐོ་ལས་བསྡོམས་སྐབས་མཚམས་རང་གཞུང་ཆོས་རིགས་ལས་ཁུངས་སུ་ཕུལ།
ག རང་གཞུང་ཕྱི་དྲིལ་ལས་ཁུངས་ནས་རིན་མེད་འགྲེམས་སྤེལ་གནང་བཞིན་པའི་དབྱིན་ཡིག་ཐོག          གསར་ཤོག་དག་རྒྱ་གར་དཔོན་རིགས་སོགས་ས་གནས་སུ་ལྟ་སྐོར་ཕེབས་པའི་སྐབས་འགྲེམས་སྤེལ་ཞུ་བཞིན་ཡོད། དེ་བཞིན་ཤེས་བྱ་དང་བོད་མིིའི་རང་དབང་གསར་ཤོག་སོགས་རིན་མེད་གནང་བཞིན་པ་ས་གནས་ཀྱི་གནད་ཡོད་དང་མི་མང་དོ་སྣང་ཅན་རྣམས་ལ་འགྲེམས་སྤེལ་ཞུ་བཞིན་ཕན་ཐོགས་ཆེན་པོ་འདུག དེ་བཞིན་༸གོང་ས་མཆོག་ཆིབས་སྒྱུར་སྐོར་བརྙན་འཕྲིན་འཁོར་ལེབ་རིན་མེད་ཐོག་མི་མང་རྣམས་ལ་འགྲེམས་སྤེལ་དང་དུས་ཆེན་སྐབས་གཟིགས་འབུལ་ཞུ་བཞིན་པར་ཕན་ནུས་ཆེན་པོ་ཞུ་རྒྱུའི་ལས་བསྡོམས་སྙིང་བསྡུས་བཅས་སུ།