༢༠༡༡ ཟླ་ ༦ ཚེས་ ༢༩ རེས་གཟའ་ལྷག་པ།
༄༅། །༸གོང་ས་༸སྐྱབས་མགོན་ཆེན་པོ་མཆོག་བལ་ཡུལ་ཧི་མ་ལ་ཡའི་རི་རྒྱུད་ནང་པའི་དད་ལྡན་པ་རྣམས་ནས་ཡུལ་དེའི་ནང་ཆིབས་སྒྱུར་བསྐྱང་རྒྱུའི་རེ་འདུན་ཞུས་པ།
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ཆར་མགོན་པོ་གང་ཉིད་མཆོག་གི་ཆབ་སྲིད་ཀྱི་སྐུ་དབང་རྣམས་མི་མང་ནས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་པའི་བཀའ་སློབ་རབ་དང་རིམ་པ་ཕེབས་པར་བརྟེན། བལ་ཡུལ་ཧི་མ་ལ་ཡའི་རི་རྒྱུད་ནང་པའི་མི་རིགས་ཚོས་མ་འོངས་པར་ཆོས་ཕྱོགས་ཀྱི་སྒོ་ནས་༸གོང་ས་༸སྐྱབས་མགོན་ཆེན་པོ་མཆོག་བལ་ཡུལ་ནང་ཆིབས་སྒྱུར་བསྐྱང་ཐུབ་རྒྱུའི་རེ་བ་ཞུ་བཞིན་ཡོད་སྐོར་རྟ་པོ་མི་རིགས་ཀྱི་ཚོགས་པ་ཞིག་གི་ཚོགས་གཙོ་ཡིན་པ་ནོར་བུ་དགེ་ལེགས་ལགས་ཀྱིས་དེའི་སྐོར་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བོད་རྒྱ་ཆེའི་མི་མང་ལ་མང་གཙོའི་ལམ་ལུགས་གསོལ་རས་སྩལ་བ་དང་། སྐུ་ཉིད་མཆོག་གིས་ཆབ་སྲིད་ཀྱི་མཛད་འགན་ཡོངས་རྫོགས་མི་མང་གིས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་པ་དེ་ནི་རླབས་ཆེན་གྱི་དགོངས་བཞེས་ཤིག་ཡིན། ༸གོང་ས་ཏཱ་ལའི་བླ་མ་མཆོག་ནི་བོད་ཀྱི་དབུ་ཁྲིད་ཙམ་མ་ཡིན་པར་ནང་པ་སྤྱི་དང་། འགྲོ་བ་ཡོངས་ལ་ཉེ་རིང་མེད་པའི་བླ༌མ་ཞིག་ཡིན་པ་རྩོད་མེད་ཡོངས་གྲགས་ཡིན། དེར་བརྟེན་གོ་སྐབས་འདི་བརྒྱུད་སྐུ་ཉིད་མཆོག་བདག་ཅག་སྟོན་པ་སངས་རྒྱས་བཅོམ་ལྡན་འདས་སྐུ་འཁྲུངས་སའི་ང་ཚོ་བལ་ཡུལ་ནང་མི་རིང་བར་ཆོས་ཕྱོགས་ཀྱི་མཛད་འཕྲིན་དངོས་སུ་བསྐྱང་རྒྱུའི་རེ་བ་ཤུགས་ཆེན་ཞུས་དང་ཞུ་མུས་ཡིན་ཞེས་གསུངས་ཡོད་པ་བཅས། །