༢༠༡༡ ཟླ་ ༥ ཚེས་ ༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༥ ཉིན་༸གོང་ས་མཆོག་ཁལ་ལི་ཕོར་ནི་ཡ་མངའ་སྡེའི་ལོང་བྷི་ཆི་གྲོང་ཁྱེར་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་ཨ་རིའི་མིན་ནི་སོ་ཊ་མངའ་སྡེའི་(Minnesota) རོ་ཆེ་སི་ཊར་ (Rochester) གྲོང་ཁྱེར་དུ་ཆིབས་སྒྱུར་བསྐྱངས་ཏེ་ལོ་ལྟར་སྨན་པས་༸གོང་ས་མཆོག་གི་སྐུའི་འཁྲོད་བཞེས་ལ་བརྟག་དཔྱད་ཞུ་བཞིན་ཡོད་པ་ལྟར་མ་ཡོ་སྨན་ཁང་གི་ (Mayo Clinic) སྨན་པས་བརྟག་དཔྱད་ཞུས་རྗེས་མགོན་པོ་གང་ཉིད་མཆོག་གི་སྐུ་ཁམས་གསལ་ཐང་ཡིན་སྐོར་ཞུས་ཡོད། ཕྱི་ཚེས་ ༦ ཉིན་གྱི་ཕྱེད་ཡོལ་༸གོང་ས་མཆོག་རོ་ཆེ་སི་ཊར་ནས་ཆིབས་ཞལ་བསྒྱུར་ཏེ་མིན་ནེ་པོ་ལི་སིར་ (Minneapolis) ཆིབས་སྒྱུར་སྐྱོང་སྐབས། ༸གོང་ས་མཆོག་ལ་གདན་ཞུའི་གསོལ་འདེབས་ཞུ་མཁན་མིན་ནེ་སོ་ཊའི་གཙུག་ལག་སློབ་གྲྭ་དང་ས་གནས་བོད་རིགས་ཚོགས་པ་གཉིས་ཀྱིས་ཕེབས་བསུའི་མཛད་སྒོ་གཟབ་རྒྱས་གོ་སྒྲིག་ཞུས་ཡོད། མཛད་སྒོའི་ཐོག་མར་ས་གནས་བོད་མི་ཚོས་གྲོ་སོ་ཕྱེ་མར་དང་བྲོ་གཞས་ཀྱིས་ལམ་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གཟབ་རྒྱས་ཞུས་ཡོད། སྐབས་དེར་ས་གནས་བོད་རིགས་ཚོགས་པའི་ཚོགས་གཙོ་ཚེ་དབང་དངོས་གྲུབ་ལགས་ཀྱིས་༸གོང་ས་མཆོག་ལ་ཚོགས་པའི་ཚོགས་མི་རྣམས་དང་གཞན་ཡང་སྐུ་མགྲོན་རྣམས་ངོ་སྤྲོད་ཞུས་ཡོད། དེ་རྗེས་མིན་ནེ་སོ་ཊ་གཙུག་ལག་སློབ་གྲྭའི་ཆོས་སྡེའི་སློབ་དཔོན་སྐུ་ཞབས་ཊོམ་སུ་ལི་ཝན་(Tom Sullivan) མཆོག་དང་མིན་ནེ་སོ་ཊ་གཙུག་ལག་སློབ་གྲྭའི་འགན་འཛིན་གསར་པར་བསྐོ་གཞག་བྱུང་བ་སྐུ་ཞབས་ཨེ་རིཀ་ཀེ་ལར་ (Eric Kaler) མཆོག མིན་ནེ་སོ་ཊ་གཙུག་ལག་སློབ་གྲྭའི་སྲོལ་རྒྱུན་བཅོས་ཐབས་ (Spirituality and Healing) ཚན་པའི་ངེས་སྟོན་པ་སྐུ་ཞབས་མེ་རི་ཇོ་ཀི་རི་ཛར་ (Mary Jo Kreitzer) བཅས་ཀྱིས་མགོན་པོ་གང་ཉིད་མཆོག་ལ་ཕེབས་བསུའི་གསུང་བཤད་རིམ་པས་གནང་གྲུབ་བསྟུན། མི་ནེ་སོ་ཊ་གཙུག་ལག་སློབ་གྲྭའི་ཆོས་ལུགས་ཚན་པའི་སློབ་དཔོན་སྐུ་ཞབས་ཊོམ་སུ་ལི་ཝན་མཆོག་གིས་གཙུག་ལག་སློབ་གྲྭའི་གཙོ་འཛིན་གསར་པར་བསྐོ་གཞག་བྱུང་བ་སྐུ་ཞབས་ཨེ་རིཀ་ཀེ་ལར་མཆོག་༸གོང་ས་མཆོག་ལ་ངོ་སྤྲོད་ཞུས་ཡོད། སྐབས་དེར་སྐུ་ཞབས་ཨེ་རིཀ་ཀེ་ལར་མཆོག་གིས་གཙུག་ལག་སློབ་གྲྭའི་མཁས་དབང་གི་ཕྱག་འཁྱེར་ཞིག་མགོན་པོ་གང་ཉིད་མཆོག་ལ་འབུལ་ལམ་ཞུ་རྒྱུ་ཡིན་སྐོར་སྙན་སྒྲོན་ཞུས་ཡོད། ཕྱོགས་མཚུངས་སྲོལ་རྒྱུན་བཅོས་ཐབས་ཚན་པའི་ངེས་སྟོན་པ་སྐུ་ཞབས་མེ་རི་ཇོ་ཀི་རི་ཛར་མཆོག་གིས་མིན་ནེ་སོ་ཊ་གཙུག་ལག་སློབ་གྲྭ་དང་རྡ་ས་དབུས་བོད་གཞུང་སྨན་རྩིས་ཁང་གཉིས་ཟུང་འབྲེལ་ཐོག་ཉམས་ཞིབ་ཀྱི་ལས་འཆར་རྣམས་སྙན་སྒྲོན་ཡང་ཞུས་ཡོད།
གཞན་ཡང་༸གོང་ས་མཆོག་ལ་ཕེབས་བསུར་བཅར་མཁན་ཨ་རིའི་གྲོས་ཚོགས་ཀྱི་འཐུས་མི་ལྕམ་བྷེ་ཊི་མཀ་ཀོ་ལུམ་ (Betty McCollum) མཆོག་གིས་སྐབས་དེར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་(Nancy Pelosi) མཆོག་གིས་འཚམས་འདྲི་ཞུས་པ་དེ་མགོན་པོ་གང་ཉིད་མཆོག་ལ་སྙན་སྒྲོན་ཞུས་རྗེས་༸གོང་ས་མཆོག་གི་མིན་ནི་སོ་ཊ་གཙུག་ལག་སློབ་ཁང་གིས་བོད་ཀྱི་གསོ་བ་རིག་པར་ཉམས་ཞིབ་གནང་རྒྱུའི་ལས་གཞི་དེར་བསྔགས་བརྗོད་མཛད་པ་དང་སྦྲགས། བོད་ཀྱི་གསོ་བ་རིག་པ་དེ་བཞིན་བོད་དང་རྒྱ་གར། རྒྱ་ནག པར་ཤི་ཡ་བཅས་ཀྱི་ལམ་ལུགས་འདྲེས་མ་ཡིན་སྐོར་དང་། དེ་ལྟར་བྱུང་བ་ནི་དུས་རབས་བརྒྱད་པའི་ནང་བོད་ཀྱི་ཆོས་རྒྱལ་ཞིག་གིས་བོད་དུ་རྒྱལ་ཁབ་འདྲ་མིན་ནས་ཚད་ལྡན་སྨན་པའི་ལྷན་ཚོགས་གོ་སྒྲིག་གནང་བར་བརྟེན་ནས་བྱུང་བ་ཞིག་ཡིན་སྐོར་བཀའ་སྩལ། དེ་བཞིན་བོད་ཀྱི་གསོ་བ་རིག་པར་རྒྱ་གར་གཞུང་གི་ངོས་འཛིན་མ་ཐོབ་གོང་ནས་མི་སྣ་གྲགས་ཅན་མང་པོ་དང་ལྷག་པར་རྒྱ་གར་གྱི་རྒྱལ་ས་ལྡི་ལིའི་ནང་རྟེན་གཞི་བྱས་པའི་རྒྱ་གར་གྱི་སྨན་པ་སྐད་གྲགས་ཅན་མང་པོའི་ནང་མི་རྣམས་ཀྱིས་བོད་སྨན་བསྟེན་གཏུག་བྱེད་བཞིན་ཡོད་པའི་ལུང་འདྲེན་མཛད་དེ་བོད་ཀྱི་གསོ་བ་རིག་པའི་ཕན་རླབས་ཆེ་ཚུལ་སྐོར་བཀའ་སློབ་སྩལ།
ཕྱོགས་མཚུངས་ད་ཆ་རྒྱ་གར་གཞུང་ཙམ་མ་ཟད་པོ་ལན་ཌིའི་གཞུང་ནས་ཀྱང་པོ་ལན་ཌིར་ (Poland) རྟེན་གཞི་བྱས་པའི་བོད་ཀྱི་གསོ་བ་རིག་པའི་སྨན་ཁང་ཞིག་ལ་ངོས་འཛིན་ཐོབ་ཡོད་སྐོར་སོགས་བཀའ་སློབ་སྩལ་གྲུབ་བསྟུན། ༸གོང་ས་མཆོག་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས། ཕྱི་ཚེས་ ༧ ཉིན་༸གོང་ས་མཆོག་གི་ས་གནས་དེར་གསར་འགོད་པ་དང་ས་གནས་བོད་རིགས། རྒྱ་རིགས། དེ་བཞིན་མཁས་དབང་དང་སློབ་ཕྲུག་ཚོར་མཇལ་ཁ་དང་བཀའ་སློབ་སྩལ་རྒྱུ་ཡིན་འདུག་པ་བཅས།།
