༢༠༡༡ ཟླ་ ༥ ཚེས་ ༣༠ རེས་གཟའ་ཟླ་བ།
༄༅། །བོད་མི་མང་སྤྱི་འཐུས་སྐབས་བཅུ་བཞི་པའི་གྲོས་ཚོགས་ཚོགས་དུས་ ༡༡ པའི་ཐོག་གྲོས་ཆོད་དགོངས་དོན་ལྟར་གྲོས་ཚོགས་ཚོགས་དུས་འཕར་མ་ཞིག་ཕྱི་ལོ་ ༢༠༡༡ ཟླ་ ༥ ཚེས་ ༢༦ ནས་དབུ་འཛུགས་ཀྱིས་ཚེས་ ༢༨ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་བསྡོམས་གསུང་བཤད་གནང་དོན། དེ་རིང་མཚན་གྱི་ཆུ་ཚོད་ ༡༡ ཡོལ་གྱི་འདུག་པས་མང་པོ་ཞུ་མི་དགོས་པར། འདི་གར་ཕེབས་པའི་རྣམ་པ་ཚང་མས་མཁྱེན་གསལ་རེད། དོན་དག་གཙོ་བོ་དེ་སྐབས་ ༡༤ པའི་བོད་མི་མང་སྤྱི་འཐུས་ལ་ལས་འགན་ལྗིད་པོ་ཞིག་འཁེལ་བ་རེད། སེམས་པ་དགའ་བ་བསྐྱེད་ཀྱི་མེད། འོན་ཀྱང་༸གོང་ས་མཆོག་གི་དགག་དགོས་རྒྱུ་མཚན་དུ་མར་གཟིགས་ཏེ་འཕྲལ་ཕུགས་རྒྱང་གསུམ་གྱི་གནད་དོན་ལ་གཞི་བཅོལ་བའི་ཐོག་ནས་དགོས་པར་གཟིགས་ཏེ་སྐབས་ ༡༤ པའི་གྲོས་ཚོགས་འདི་ལ་ལོ་རྒྱུས་ཀྱི་ཀྱོག་མཚམས་དེ་ལྟ་བུའི་ལས་འགན་ཞིག་སྐབས་ ༡༤ པའི་འཇོན་གྱི་རེད་དགོངས་ཏེ་ལས་འགན་དེ་སྩལ་ཡོད། ང་ཚོ་སྐབས་ ༡༤ པའི་གྲོས་ཚོགས་ཀྱིས་བཅའ་ཁྲིམས་བསྐྱར་བཅོས་ཡོངས་སུ་རྫོགས་པ་གནང་ཐུབ་པ་འདི་ནི་ང་ཚོ་གྲོས་ཚོགས་ཚོགས་ཁང་འདིའི་ནང་ཡོད་མཁན་ཚང་མས་སྐུ་ལས་སྐྱོན་ནས་བྱུང་བ་ཡིན་པར་བརྟེན། ཚོགས་གཙོའི་ངོས་ནས་དཔལ་ལྡན་བཀའ་བློན་ཁྲི་པ་རིན་པོ་ཆེ་མཆོག་གིས་དུས་ནས་དུས་སུ་ལམ་སྟོན་དང་། བཀའ་ཤག དེ་བཞིན་སྤྱི་འཐུས་རྣམ་པ། ལྷག་པར་དུ་ཕྱག་སྦྲེལ་སྤྱི་འཐུས་ཚོགས་གཙོ་གཞོན་པ། ཚོགས་དྲུང་ལས་ཁུངས་ཀྱི་ལས་བྱེད་རྣམ་པ་བཅས་ཚང་མས་མཐུན་འགྱུར་ལ་བརྟེན་ནས་ལས་དོན་མཐའ་དག་བསྒྲུབས་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་བཅའ་ཁྲིམས་བསྐྱར་བཅོས་ཀྱི་ལས་རིམ་འདིའི་ནང་བོད་གཞུང་མང་རྒྱལ་ཡོངས་ཚོགས་ཆེན་ཚོགས་པ་རེད། བོད་གཞུང་མང་རྒྱལ་ཡོངས་ཚོགས་ཆེན་ཚོགས་སྐབས་མི་མང་གི་སྐུ་ཚབ་ཚོས་རང་རང་གི་སེམས་ཀྱི་ཚོར་བ་ཆེན་པོ་ཞིག་གི་ཐོག་ནས་༸གོང་ས་མཆོག་གི་ཆབ་སྲིད་ཀྱི་མཛད་འགན་ཡོངས་རྫོགས་མི་མང་གིས་འོས་འདེམས་གནང་བའི་དབུ་ཁྲིད་ལ་རྩིས་སྤྲོད་གནང་གི་ཡོད་པ་དེ། ཕྱོགས་གཅིག་ནས་སེམས་སྡུག་ཡོང་རྒྱུ་ཞིག་དང་། ཕྱོགས་གཞན་ཞིག་ནས་ལོ་རྒྱུས་ཀྱི་དགོས་པ་ཆེན་པོ་ཞིག་གི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་ཀྱི་ཡོད་པར་བརྟེན། དེ་ལྟ་བུའི་འགན་འཁྱེར་ཐུབ་དགོས་རྒྱུའི་གནས་སྟངས་ཤིག་ལ་འགྱུར་བ་དེ་ཡང་སྤོབས་པ་བྱེད་འོས་པ་ཞིག་ཡིན། དེ་ལྟར་དགའ་སྡུག་གཉིས་ཀའི་ཚོར་བ་དེའི་ཐོག་ནས་ཚོགས་ཆེན་ནང་དུའང་བཀའ་མོལ་གསུང་མཁན་མང་པོ་བྱུང་ཡོད། ལྷག་པར་སྐུ་དབང་རྩིས་སྤྲོད་ཙམ་མ་ཟད། བཙན་བྱོལ་བོད་མིའི་བཅའ་ཁྲིམས་ནང་ཐ་སྙད་ཀྱི་འགྱུར་བ་གཏོང་དགོས་པའི་གནད་དོན་དེའི་ཐོག་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ངོས་ནས་ད་ལྟའི་དངོས་ཡོད་གནས་སྟངས་གང་ཡིན་པ་དེ་དག་ཆ་ཚང་ཞིག་གསལ་བཤད་ཞུས་ཡོད། དེ་དག་ཐམས་ཅད་ཞུས་རྗེས་བོད་གཞུང་རྒྱལ་ཡོངས་ཚོགས་ཆེན་ཐེངས་གཉིས་པའི་ཐོག་མི་མང་གི་བསམ་ཚུལ་ཤུགས་ཆེན་པོ་བསླེབས་ཡོད་པ་གཅིག་དང་། ད་ལྟའི་ཚོགས་ཆེན་དེ་གྲུབ་པའི་རྗེས་༸གོང་ས་མཆོག་གིས་ཕལ་ཆེར་དེ་ལས་ལྷག་པའི་བཀའ་སློབ་སྩལ་རྒྱུ་མེད་པའི་གནས་སྟངས་ཤིག་གི་ཐོག་ནས་ད་རེས་གྲོས་ཚོགས་འཕར་མ་འདི་ཚོགས་ཡོད། གྲོས་ཚོགས་འཕར་མ་འདིའི་སྟེང་ཐ་སྙད་འགྱུར་བ་བཏང་བ་དང། ད་ལྟའི་བཙན་བྱོལ་བོད་གཞུང་ཞེས་པ་འདི་སང་ཉིན་དགོང་མོ་བར་གནས་རྒྱུའི་རྒྱལ་ཁབ་ཀྱི་དབུ་ཁྲིད་དང། གཞུང་གི་འགན་འཛིན། ད་ལྟའི་བཀའ་བློན་ཁྲི་པ་དབུས་པའི་བཀའ་ཤག སྤྱི་འཐུས་ཚོགས་གཙོ་ཚོགས་གཞོན་བཅས་ང་ཚོ་ཚང་མའི་ངོས་ནས་ཐ་སྙད་དེ་འགྱུར་བ་གཏོང་མ་དགོས་ན་མ་དགོས་པ་རང་བསམ་གྱི་ཡོད། འོན་ཀྱང་གནད་དོན་དགག་དགོས་རྒྱུ་མཚན་མང་པོ་ཞིག་ལ་བརྟེན་ནས། མ་འོངས་པའི་དཀའ་ངལ་ལས་སྐྱོབ་ཆེད་འགྱུར་བ་མ་བཏང་ཐབས་མེད་གྱུར་བའི་གནས་སྟངས་དེ་ཚོགས་ཆུང་ཁག་གི་ནང་ཞུས་ཡོད། ལཧག་པར་གྲོས་ཚོགས་འདིའི་ཐོག་ལའང་དཔལ་ལྡན་བཀའ་བློན་ཁྲི་པ་མཆོག་གིས་ཚོར་ཤུགས་ཆེན་པོའི་ཐོག་ནས་གསུངས་ཡོད། དེ་དག་ཚང་མར་དགོངས་བཞེས་གནང་སྟེ་སྤྱི་འཐུས་རྣམ་པ་ཚོས་མོས་མཐུན་དང་རྒྱབ་སྐྱོར་གནང་བ་དེ་ང་ཚོར་སྐུར་བའི་ལས་འགན་ཞིག་བསྒྲུབས་སོང་བསམ་པའི་ཚོར་བ་ཧ་ཅང་ཤུགས་ཆེན་པོ་བྱུང།
དེ་རིང་བཅའ་ཁྲིམས་བསྐྱར་བཅོས་ཀྱི་ལས་རིམ་འདིའི་ནང་དགོངས་པ་བཞེས་ཕྱོགས་ཕྲན་བུ་མ་མཐུན་པ་བྱུང་ཡོད། འོན་ཀྱང་མཐའ་མའི་བསྡོམས་དེར་ང་ཚོ་ཚང་མས་ནུས་པ་སྤུངས་ཏེ་ལས་དོན་བསྒྲུབས་ཐུབ་པ་བྱུང་བ་འདིར་ཡག་པོ་བྱུང་སོང་སྙམ་པའི་ཡོད། དེ་རིང་སྐབས་ ༡༤ པའི་གྲོས་ཚོགས་མཐའ་མ་དང། གནངས་ཉིན་སྐབས་ ༡༥ པའི་སྤྱི་འཐུས་རྣམ་པའི་དམ་འབུལ་ཞུ་རྒྱུའི་མཚམས་དེར་བསླེབས་ཡོད། རྩ་བའི་འདས་པའི་ལོ་ལྔའི་ལས་དོན་ཡོངས་རྫོགས་ཕྱོགས་བསྡོམས་ཤིག་ཞུས་དགོས་ཀྱི་ཡོད། འོན་ཀྱང་ད་རེས་དུས་ཚོད་འདང་མིན་ལ་བརྟེན་མདོར་ཙམ་ཞུས་ན། སྐབས་ ༡༤ པར་མིང་ཤས་ཕྲན་བུ་བྱུང་ཡོད་ནའང་དེ་དག་ཆུང་ཆུང་ཞིག་ལ་བརྩིས་ནས་ལས་དོན་གཞན་གང་ལ་གང་མཚམས་བསྒྲུབས་ཐུབ་ཡོད་པ་ཞིག་ལ་ངོས་འཛིན་དང། ལྷག་པར་དུ་གྲོས་ཚོགས་ཀྱི་ལས་དོན་བྱེད་ཕྱོགས་གང་ཅིའི་ཐོག་ནས་རིམ་པས་ཡར་རྒྱས་འགྲོ་གི་ཡད་པའི་གནས་སྟངས་ཤིག་ལ་བསླེབས་ཡོད་བསམ་བཞིན་ཡོད། དེ་བཞིན་སྐབས་ ༡༤ པའི་ལས་ཡུན་ཆ་ཚང་ཞུས་ན་འགྲིག་གི་འདུག ང་རང་ཚོགས་གཙོ་བྱས་པའི་ལས་ཡུན་ལོ་གཉིས་དང་ཕྱེད་ཀ་དང། ཚོགས་གཞོན་ངེད་གཉིས་ཐུན་མོང་གི་ཐོག་ནས་ལས་ཀ་བྱས་པའི་སྐབས་རེད། གང་ལྟར་ལོ་བཅུའི་རིང་ལ་དཔལ་ལྡན་བཀའ་བློན་ཁྲི་པ་རིན་པོ་ཆེ་མཆོག་གིས་བཀའ་ཁྲིའི་ཐུགས་འགན་བཞེས་སྐབས་དུས་ནས་དུས་སུ་ལམ་སྟོན་དང། གོ་བསྡུར། མཉམ་རུབ་ཀྱི་འགན་བཞེས་པའི་ཐོག་ནས་བོད་སྤྱི་པའི་རྩ་དོན་ལ་འགན་མཉམ་ཁུར་གནང་བ་དེ་རིན་ཐང་དང་བྲལ་བ་རེད། སྤྱི་ཡོངས་ཀྱི་ཆ་ནས་ཞུས་ན་སྐབས་ ༡༡ དང་ ༡༢ སྤྱི་འཐུས་ཀྱི་ཚོགས་གཙོ་གནང་བའི་སྐབས་ཀྱི་དུས་ཡུན་དང། ད་ལྟའི་བཀའ་བློན་ཁྲི་པ་མི་མང་གི་ཐད་ཀར་འོས་འདེམས་བྱས་པའི་བཀའ་ཁྲི་སྐབས་དང་པོ་དང་གཉིས་པ། བཅས་མི་ལོ་ཉི་ཤུ་དེའི་རིང་ང་ཚོའི་མང་གཙོའི་འཕེལ་རིམ་དང། བོད་བསྟན་སྲིད་ཀྱི་དོན་བཅས་གང་ཅིའི་ཐོག་ཐུགས་འགན་བཞེས་པ་དེ་ཚིག་གི་ཐོག་ནས་བསྡོམས་རྒྱག་མི་ཐུབ་པའི་འགན་རླབས་པོ་ཆེ་བཞེས་གནང་སྟེ་ཞབས་འདེགས་ཞུས་ཡོད་པར། དེ་རིང་གྲོས་ཚོགས་འདིའི་ཐོག་ནས་བཀའ་བློན་ཁྲི་པ་རིན་པོ་ཆེ་མཆོག་ལ་སྙིང་ཐག་པ་ནས་ཐུགས་རྗེ་ཆེ་ཞུ་གི་ཡིན། གྲོས་ཚོགས་སྤྱི་དང་ང་རང་སྒེར་ཡིན་ནའང་ཚོགས་གཙོའི་རྐུབ་སྟེགས་སྟེང་བསྡད་ཡོད་པ་མ་གཏོགས་རིན་པོ་ཆེ་མཆོག་གིས་གྲོས་ཚོགས་འདིའི་ནང་དང་གྲོས་ཚོགས་ཀྱི་ཕྱིར་གསུང་བཤད་གནང་བ་ཆ་ཚང་ཉིན་རེ་ཉིན་རེའི་སློབ་ཕྲུག་གཅིག་གི་སློབ་སྦྱོང་བྱེད་རྒྱུའི་གོ་སྐབས་ལྟ་བུར་ཚོར་གྱི་ཡོད།
སྐབས་ ༡༤ པའི་གྲོས་ཚོགས་འདིའི་ཐོག་ཚོགས་གཙོ་མི་གཉིས་ཀྱིས་བྱེད་དགོས་བྱུང་ཡོད། ཚོགས་གཙོ་ཀརྨ་ཅོས་འཕེལ་ལགས་ཀྱིས་གནང་སྐབས་ཀྱང་གྲུབ་འབྲས་ཡག་པོ་ཐོན་ཡོད། ངེད་རང་གིས་ཚོགས་གཙོ་བྱེད་སྐབས་སཔྱི་འཐུས་ལྷན་ཚོགས་ཚོགས་སྐབས་དང། སྤྱི་འཐུས་རྒྱུན་ལས་ཚོགས་སྐབས་ཕྲན་བུ་ཕྲན་བུ་མ་མཐུན་པ་བྱུང་ཡོད་ཀྱང་ཚང་མས་མཐུན་འགྱུར་གནང་བར་བརྟེན་གྲུབ་འབྲས་གང་ཐོན་པ་རྣམས་དུས་ཡུན་དེའི་རིང་སྤྱི་འཐུས་རྣམ་པ་ཚང་མས་མཉམ་རུབ་བྱས་ཏེ་ལས་དོན་བསྒྲུབས་པ་ཞིག་ལ་ངོས་འཛིན་ཞུ་གི་ཡོད། དེར་བརྟེན་སྤྱི་འཐུས་རྣམ་པ་ཚང་མར་ཐུགས་རྗེ་ཆེ་ཞུ་གི་ཡིན། ཚོགས་དྲུང་ལས་ཁུངས་ཀྱི་ལས་བྱེད་ཚོར་མཚོན་ན་དུས་རྒྱུན་དུ་ཚོགས་གཙོ་སྦྲེལ་པོ་གཉིས་ལ་ལས་དོན་གང་ཞིག་ཐོན་ཡང་བསུན་སྣང་སྤུ་ཙམ་མེད་པར་མཐུན་འགྱུར་གནང་བར་ཐུགས་རྗེ་ཆེ་ཞུ་རྒྱུ་ཡིན། ཚོགས་གཙོ་གཞོན་པ་ལྟ་བུ་མཚོན་ན་ལོ་གཉིས་དང་ཕྱེད་ཀའི་ལས་ཡུན་རིང་མཚམས་རེ་མ་མཐུན་པ་ཡོང་གི་ཡོད་ཀྱང་གནད་དོན་ཕལ་མོ་ཆེའི་ཐོག་མཉམ་རུབ་ཀྱི་འགན་འཁྱེར་ཏེ་གྲུབ་འབྲས་མི་དམན་པ་བྱུང་ཡོད། ད་ལྟ་སྐབས་ ༡༤ པ་གྲོས་ཚོགས་མཇུག་སྒྲིལ་གྱི་ཡོད་པར་བརྟེན་ང་ཚོ་ལོ་རྒྱུས་ཀྱི་ཀྱོག་མཚམས་ལ་བསླེབས་ཡོད་པས་མ་འོངས་པའི་འགོ་ཁྲིད་ཚོས་འགན་འཁྱེར་ཐུབ་པ་དང། ཡང་སྒོས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པ་དང་། གཞིས་བྱེས་བོད་མི་གང་མྱུར་མཉམ་འཛོམས་ཡོང་བའི་སྨོན་ལམ་དང་སྦྲགས་སྐབས་ ༡༤ པའི་གྲོས་ཚོགས་ཚོགས་དུས་འཕར་མ་མཇུག་བསྒྲིལ་བ་ཡིན་ཞེས་གསལ་བསྒྲགས་གནང་སྟེ་ཡོངས་སུ་མཇུག་བསྒྲིལ་བ་བཅས།།