༢༠༡༡ ཟླ་ ༥ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༤ ཉིན་ཨ་རིའི་མངའ་སྡེ་ཁལ་ལི་ཕོར་ནི་ཡའི་ལྷོ་ཕྱོགས་སུ་ (Southern California) རྟེན་གཞི་བྱས་པའི་ལོང་བྷི་ཆི་ (Long Beach) གྲོང་ཁྱེར་ཁལ་ལི་ཕོར་ནི་ཡའི་གཙུག་ལག་སློབ་གྲྭའི་ཚོགས་ཁང་ནང་རྒྱལ་སྤྱིའི་ཉེས་ཡངས་ཚོགས་པ་བཙུགས་ཏེ་ལོ་ངོ་ ༥༠ ཁོར་བ་དང་སྟབས་བསྟུན་ཚོགས་པ་དེའི་འགྲོ་བ་མིའི་ཐོབ་ཐང་གི་གཟེངས་རྟགས་ཐོག་མ་དེ་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་ལམ་ཞུས་ཡོད། སྐབས་དེར་མགོན་པོ་གང་ཉིད་མཆོག་གིས་གཟེངས་རྟགས་འབུལ་བཞེས་མཛད་རྗེས་དེར་འདུས་མང་ཚོགས་ ༡༠༠༠ རྒལ་བར་བཀའ་སློབ་སྩལ་དོན། ངོས་རང་གང་ཟག་སྒེར་ཞིག་གི་ཐོག་ནས་བརྗོད་ན་ནང་པའི་དགེ་སློང་དཀྱུས་མ་ཞིག་ཡིན། གཟེངས་རྟགས་འདི་ངོས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཆེད་ཞབས་འདེགས་ཕྲན་བུ་བསྒྲུབས་ཐུབ་པ་དེར་ངོས་འཛིན་ཐོབ་པ་ཞིག་ཡིན།  ངོས་ཀྱིས་བོད་མི་ས་ཡ་དྲུག་དང་རྒྱ་ནག་མི་མང་ས་ཡ་མང་པོའི་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་བར་རྒྱལ་སྤྱིའི་ཉེས་ཡངས་ཚོགས་པར་ཐུགས་རྗེ་ཆེ་ཞུ་རྒྱུ་ཡིན།
རྒྱལ་སྤྱིའི་ཉེས་ཡངས་ཚོགས་པའི་ཕྱག་ལས་དེ་དག་ནི་གཞན་འཇིགས་པ་ལས་སྐྱོབ་ཀྱི་ཡོད་པར་བརྟེན་མི་འཇིགས་པའི་སྦྱིན་པ་ཆགས་ཡོད། ཁྱེད་ཚོས་ངེས་པར་དུ་སེམས་ཤུགས་མ་ཆག་པ་གནང་རོགས།  དྲག་པོའི་སྟོབས་ཤུགས་དེ་འཕྲལ་སེལ་ཡིན་ཞིང་བདེན་པའི་སྟོབས་ཤུགས་ནི་དེ་ལས་ལྡོག་སྟེ་ཡུན་གནས་ཐུབ་རྒྱུ་ཞིག་ཡིན་ཞེས་སོགས་བཀའ་སློབ་སྩལ་གྲུབ་བསྟུན།  མང་ཚོགས་ཀྱི་དྲི་བ་ཁག་གསུམ་ཙམ་ལ་བཀའ་ལན་མཛད། ཉིན་རྒྱབ་༸གོང་ས་མཆོག་ཁལ་ལི་ཕོར་ནི་ཡའི་ཨིར་ཝིན་གཙུག་ལག་སློབ་གྲྭར་ (University of Irvine) ཆིབས་སྒྱུར་བསྐྱངས་ཏེ་མང་ཚོགས་ ༥༠༠༠ ཙམ་ལ། བྱམས་བརྩེ་དང་གོ་ལའི་དབུ་ཁྲིད།  ཅེས་པའི་བརྗོད་གཞིའི་ཐོག་བཀའ་སློབ་སྩལ་དོན། བློར་གོམས་འདྲིས་བསྟེན་ནས་སེམས་བབ་ལྷིང་ཡོང་རྒྱུར་འབད་བརྩོན་བྱེད་དགོས། བྱམས་བརྩེའི་བློ་སྐྱེད་པར་སེམས་བག་ཕེབས་དགོས་རྒྱུ་ཧ་ཅང་གལ་ཆེན་པོ་ཡིན། འཇིག་སྣང་དང་ཁོང་ཁྲོའི་འོག་སེམས་བག་ཕེབས་བཟོ་མི་ཐུབ། བསམ་བློ་བག་ཕེབས་ཡོང་ཐུབ་མིན་དེ་མི་སྒེར་སོ་སོའི་ནང་གི་བསམ་བློའི་གདེང་ཚོད་དང་བློ་སྟོབས་ཆེ་ཆུང་ལ་རག་ལུས་ཡོད་ཅེས་བཀའ་སློབ་སྩལ།  དེ་རྗེས་༸གོང་ས་མཆོག་གིས་འཇིག་རྟེན་བཀོད་པ་པོ་འདོད་མཁན་དང་མི་འདོད་མཁན། བར་མ་གསུམ་གྱི་ཐབས་ལམ་བརྒྱུད་བྱམས་བརྩེའི་བསམ་པ་གོང་མཐོར་གཏོང་ཐུབ་རྒྱུའི་སྐོར་བཀའ་སློབ་སྩལ། དེ་ཡང་དང་པོས་འཇིག་རྟེན་བཀོད་པ་པོར་མཐའ་གཅིག་ཏུ་ཡིད་ཆེས་བློ་བཀལ་བྱས་ཏེ་བྱམས་བརྩེའི་བསམ་པ་གོང་འཕེལ་གཏོང་ཐུབ་རྒྱུ་དང་། གཉིས་པས་རྒྱུ་འབྲས་རྟེན་བྱུང་ལ་ཡིད་ཆེས་བློས་བཀལ་ཐོག་ནས་བྱམས་བརྩེའི་བློ་སྤེལ་ཐུབ་པ་དང་། གསུམ་པ་དེས་འཇིག་རྟེན་ལུགས་བཟང་གི་ལྟ་ཚུལ་ཐོག་བྱམས་བརྩེའི་བསམ་པ་གོང་འཕེལ་གཏོང་ཐུབ་རྒྱུའི་སྐོར་བཀའ་སློབ་སྩལ་གྲུབ་བསྟུན། མང་ཚོགས་ཀྱི་དྲི་བར་བཀའ་ལན་སྩལ་ཏེ་མཛད་སྒོ་ལེགས་པར་གྲུབ། དེ་རྗེས་མགོན་པོ་གང་ཉིད་མཆོག་ཚོགས་ཁང་གཞན་ཞིག་ཏུ་ཆིབས་སྒྱུར་བསྐྱངས་ཏེ་གཞོན་སྐྱེས་ཁག་གཅིག་ལ་བཀའ་སློབ་སྩལ་ཏེ་གཞོན་སྐྱེ་ཆོའི་དྲི་བར་བཀའ་ལན་སྩལ་ཡོད་པ་བཅས། །