༢༠༡༡ ཟླ་ ༤ ཚེས་ ༢༨ རེས་གཟའ་ཕུར་བུ།
༄༅། །བོད་མདོ་སྨད་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་སེལ་ཐབས་དང་རྒྱ་ནག་གཞུང་གིས་འཛིན་བཟུང་བྱས་པའི་རྔ་པ་ཀིརྟི་དགོན་པའི་དགེ་འདུན་པ་རྣམས་འཕྲལ་དུ་གློད་བཀྲོལ་དགོས་པ་སོགས་ཀྱི་ཆེད་རྒྱ་གར་གཙོ་བོར་གྱུར་བའི་རྒྱལ་སྤྱིའི་དབུ་ཁྲིད་ཁག་ལ་ཞུ་གཏུགས་ཀྱི་ལས་འགུལ་དབུ་འཛུགས་གནང་འདུག
དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་ཆོག་གིས་སྣེ་ཁྲིད་འོག་མི་གྲངས་བཞི་ལས་གྲུབ་པའི་སྤྱི་འཐུས་ཀྱི་སྐུ་ཚབ་ཁག་གཅིག་ཕྱི་ལོ་ ༢༠༡༡ ཟླ་ ༤ ཚེས་ ༢༧ ཉིན་རྒྱ་གར་རྒྱལ་ས་ལྡི་ལིར་ཆེད་ཕེབས་གནང་སྟེ། དེར་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁག་དང་རྒྱ་གར་གྱི་དབུ་ཁྲིད་ཁག དེ་བཞིན་གྲོས་ཚོགས་ཀྱི་འཐུས་མི་ཁག་བཅས་ལ་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་སྐོར་ལ་ཞུ་གཏུགས་ཀྱི་ལས་འགུལ་དབུ་འཛུགས་གནང་ཡོད།
དེའི་སྐོར་ལ་བོད་མི་མང་སྤྱི་འཐུས་ཚོགས་གཞོོན་མཆོག་གིས་གསུང་གསལ། ང་ཚོ་བོད་མི་ཚོས་གཅིག་ཤོད་ཀྱི་ཡོད། རྒྱ་ནག་གཞུང་ནས་གཅིག་ཤོད་ཀྱི་ཡོད། དོན་དངོས་གང་ཡིན་པ་ཤེས་དགོས་རྒྱུ་གལ་ཆེན་ཡིན་སྟབས། རྒྱ་གར་གྱི་གཙོས་རྒྱལ་སྤྱིའི་དབུ་ཁྲིད་ཁག་ནས་གནས་དོན་དངོས་ལ་ཞིབ་དཔྱད་གནང་རོགས་ཞུ་རྒྱུ་ཡིན། གལ་ཏེ་ང་ཚོ་བོད་མི་ཚོས་བརྗོད་པ་ལྟར་ཡིན་ན། འགྲོ་བ་མིའི་ཐོབ་ཐང་དང་ཆོས་དད་རང་མོས་མི་ཚང་མར་དགོས་ཀྱི་ཡོད། དེར་བརྟེན་ང་ཚོར་ཡང་འགྲོ་བ་མིའི་ཐོབ་ཐང་དང་ཆོས་དད་རང་མོས་དགོས་ཀྱི་འདུག་པས་ཁྱེད་རྣམས་ནས་དེའི་ཐོག་ང་ཚོར་རྒྱབ་སྐྱོར་གནང་རོགས་ཞེས་ཞུ་རྒྱུ་ཡིན། སྔ་མ་ཡིན་ཡང་ང་ཚོས་དེའི་ཐོག་ལས་འགུལ་སྤེལ་ཐུབ་ཡོད། དེ་བཞིན་ད་ལྟའང་བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་ཞུས་ཏེ་ང་རང་དང་མཉམ་དུ་སློབ་དཔོན་བསོད་ནམས་བསྟན་འཕེལ་ལགས་དང་། སྤྱི་འཐུས་འབའ་བ་སྐལ་བཟང་རྒྱལ་མཚན་ལགས། ཚེ་རིང་གཡུ་སྒྲོན་ལགས་བཅས་ང་ཚོ་མི་བཞི་རྡ་ནས་རྒྱ་གར་རྒྱལ་ས་ལྡི་ལིར་ཕྱོགས་བསྐྱོད་བྱེད་རྒྱུ་ཡིན། དེར་གོ་སྒྲིག་དང་དུས་ཚོད་བཟོ་མཁན་ཚང་མ་ལྡི་ལིར་རྟེན་གཞི་བྱས་པའི་བོད་གཞུང་སྐུ་ཚབ་དོན་གཅོད་ལས་ཁུངས་བརྒྱུད་ནས་ཞུ་རྒྱུ་ཡིན། ལྡི་ལིར་རྒྱ་གར་གཞུང་དང་གྲོས་ཚོགས་འཐུས་མི་རྣམས་ལ་ད་ལྟའི་བོད་ནང་གི་གནས་སྟངས་སྤྱི་དང། བྱེ་བྲག་རྔ་པ་ཀིརྟི་དགོན་པའི་ཛ་དྲག་གི་གནས་སྟངས་དེ་དག་ཡོངས་སུ་རྫོགས་པར་ང་ཚོས་ཞུ་ཐུབ་རྒྱུའི་རེ་བ་བྱས་ཏེ་ཕྱོགས་བསྐྱོད་བྱེད་རྒྱུ་ཡིན་ཞེས། གསུངས་ཡོད་པ་བཅས། །