༢༠༡༡ ཟླ་ ༤ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༥ ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་ཁུལ་གྱི་བོད་མི་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་མི་མང་ནས་འོས་འདེམས་བྱས་པའི་མི་སྣར་རྩིས་སྤྲོད་མཛད་རྒྱུའི་དགོངས་གཞིའི་སྐོར་བརྒྱུད་རིམ་དང་སྤྱི་འཐུས་གྲོས་ཚོགས་ཀྱི་ལས་དོན་ཐག་གཅོད་སྐོར་མི་མང་ལ་གོ་རྟོགས་སྤེལ་བའི་གསུང་བཤད་གནང་དོན།
ད་རེས་༸གོང་ས་མཆོག་གི་གསུང་འཕྲིན་ཕེབས་རྒྱུ་དེ་བོད་མི་ཚོ་ད་ཆ་གཉིད་ཁུག་མ་བསྡད་གཉིད་བསད་ཅེས་པའི་ལན་བརྡ་ཆེན་པོ་ཞིག་ཡིན། སྔོན་མ་ནས་༸གོང་ས་མཆོག་གིས་བརྡ་དེ་བཏང་གནང་མཛད་ཡོད། ང་ཚོ་མི་མང་རྣམས་གཉིད་ཁུག་བསྡད་དུས་གཉིད་བསད་རྒྱུ་ཁག་པོ་ཞེ་དྲག་བྱེད་ཀྱི་ཡོད། དེར་བརྟེན་ང་ཚོའི་གནས་བབས་དེ་མི་རིགས་གཞན་དང་མི་འདྲ་བར་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པར་སོང་། བོད་དང་རྒྱ་ནག་ནང་གནས་སྟངས་གང་འདྲ་ཆགས་ཀྱི་ཡོད་རྒྱལ་སྤྱིའི་འགྱུར་འགྲོས་གང་འགྲོ་གི་ཡོད་དེ་དག་ལ་བརྟེན་ནས་བོད་པའི་གནད་དོན་ལ་ཕན་གནོད་གང་ཡོང་གི་ཡོད། དེ་དག་ཚང་མ་དུས་རྟག་ཏུ་དགོངས་པ་བཞེས་དགོས་རྒྱུའི་གནད་དོན་ཞིག་ཆགས་ཡོད། ཅེས་སོགས་དང་། ཡང་ཁོང་གིས་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་བཅའ་ཁྲིམས་ཀྱི་སྔོན་གླེང་དང་༸གོང་ས༌༸སྐྱབས་མགོན་ཆེན་པོ་མཆོག་གི་སྐུ་དབང་དང་འབྲེལ་བའི་བཅའ་ཁྲིམས་ནང་དོན་ཚན་གསུམ་གསར་སྣོན་གནང་ཡོད་པའི་སྐོར་ལ་འགྲེལ་བཤད་གནང་དོན།
དོན་ཚན་དང་པོ། ༸གོང་ས་མཆོག་མི་རིགས་ཀྱི་མགོན་སྐྱབས་དང་མཚོན་རྟགས་ཞེས་པའི་འོག་ནས་མགོན་པོ་གང་ཉིད་མཆོག་བོད་མིའི་ལྷ་སྐལ་དང་འཕགས་པ་སྤྱན་རས་གཟིགས་མིའི་གཟུགས་སུ་བྱོན་པ། བོད་མིའི་མགོན་སྐྱབས་བླ་ན་མེད་པའི་དབུ་ཁྲིད། བོད་མིའི་བླང་དོར་མཛད་མཁན་གྱི་ལམ་སྟོན་པ། བོད་མི་རིགས་དང་གཅིག་སྒྲིལ་གྱི་མཚོན་རྟགས། ཁྲྲིམས་མཐུན་གྱི་མགྲིན་ཚབ་ཞེས་པ་དེ་ཡིན། འབྱུང་རྒྱུ་དེའང་མངའ་དབང་ལྡན་པའི་མི་མང་མངོན་འདོད་ཐོག་ནས་ཡོང་གི་ཡོད་པ་ཞིག་དང་དོན་ཚན་ལྔ་ནས་གསུམ་བསྡུས་བཞག་ཡོད། གཅིག་དེ་བོད་མི་རིགས་ཀྱི་བསམ་སྤྱོད། ཆོས་དང་རིག་གཞུང། སྤྱི་ཚོགས་དང་དཔལ་འབྱོར་ཡར་རྒྱས་ཆེད་༸གོང་ས་མཆོག་གི་ལམ་སྟོན་བཀའ་སློབ་དང་སྐུལ་ལྕགས་མཛད་རྒྱུ་དེ་གཅིག་ཡིན།
གཉིས་པ་བོད་མིའི་རྩ་དོན་བསྒྲུབ་རྒྱུའི་ཆེད་དུ་༸གོང་ས་མཆོག་སྐུ་སྒེར་ངོས་ནས་གནང་བ་ཡིན་ནའང་འདྲ། མི་མང་ནས་འོས་འདེམས་བྱས་པའི་འགོ་ཁྲིད་ཚོས་ཞུ་སྐུལ་བྱུང་བ་ཡིན་ནའང་འདྲ། གནས་སྟངས་དེ་གཉིས་འོག་ནས་༸གོང་ས་མཆོག་གི་ལམ་སྟོན་བཀའ་སློབ་སྩལ་རྒྱུ།
གསུམ་པ་དེ་བོད་མི་རིགས་ཀྱི་ཁེ་ཕན་ཆེད་དུ་༸གོང་ས་མཆོག་གི་རྒྱལ་སྤྱིའི་ནང་ཆབ་སྲིད་ཀྱི་མི་སྣ་དང་སྒྲིག་འཛུགས་ཁག་ལ་མཇལ་འཕྲད་མཛད་རྒྱུས་མཚོན་སྐུ་ཚབ་དོན་གཅོད་དང་དམིགས་བསལ་སྐུ་ཚབ་བསྐོ་གཞག་མཛད་རྒྱུ་དེ་དག་དོན་ཚན་གསུམ་ནང་བསྡུས་ཡོད། དེའི་ནང་ཁྲིམས་ཀྱི་ནུས་པ་ལྡན་པའི་དབང་ཚད་གང་ཡང་བཞག་མེད། བཞག་པ་ཡིན་ན་༸གོང་ས་མཆོག་གི་བཀའ་དང་འགལ་རྒྱུའི་གནས་སྟངས་ཤིག་ཆགས་ཡོད། ཅེས་དང་མི་རིང་བར་བཅའ་ཁྲིམས་བསྐྱར་བཅོས་མི་མང་ནང་འགྲེམས་སྤེལ་བྱེད་རྒྱུ་ཡིན་པས་དོ་སྣང་གཟབ་ནན་གྱི་མགྱོགས་མྱུར་ཚོགས་བཅར་ཞུས་ཏེ་བོད་གཞུང་མང་ཚོགས་ཆེན་ཐོག་གཞུང་མང་གི་བསམ་ཚུལ་གསལ་སྟོན་ཐུབ་པ་དགོས་པའི་འབོད་སྐུལ་ཞུ་རྒྱུ་མ་ཟད། ཡང་དེང་སྐབས་རྒྱ་ནག་གཞུང་གི་བརྗོད་བབ་ཀྱི་འགུལ་སྐྱོད་དང་མཐུན་པའི་༸གོང་ས་མཆོག་ལ་མཚན་སྨད་ཞུ་མཁན་ཡོད་པར་དེ་ཚོར་མང་ཚོགས་ཀྱི་ངོས་ནས་སྤྱང་གྲུང་གཟབ་ནན་བྱེད་དགོས་ཞེས་གསུང་བཤད་གནང་ཡོད།
དེ་བཞིན་ཚོགས་གཙོ་མཆོག་གིས་ལྷོ་ཕྱོགས་བོད་མིའི་གཞིས་ཆགས་ཁག་ལྔ་དང་སྦེང་ལོར་སོགས་ལ་གནད་དོན་དེའི་ཐོག་མི་མང་ལ་གོ་རྟོགས་སྤེལ་བའི་སྐོར་སྐྱོད་དང་གསུང་བཤད་གནང་ཡོད་པ་བཅས། །
