༢༠༡༡ ཟླ་ ༤ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༨ རེས་གཟའ་ཟླ་བའི་ཉིན་ཡུ་རོབ་གྲོས་ཚོགས་ཀྱི་ཚོགས་གཞོན་སྐུ་ཞབས་མེག་མི་ལན་སི་ཀོ་ཊི་ (McMillan Scott) མཆོག་ནས་རྒྱ་ནག་གཞུང་གིས་ཀིརྟི་དགོན་པའི་དགེ་འདུན་པ་ཚོར་དྲག་གནོན་བྱས་པ་དེར་སྐྱོན་བརྗོད་ཤུགས་ཆེ་བྱས་ཡོད་པ་མ་ཟད། རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གྲོས་མཐུན་ཡིག་ཆར་བརྩི་འཇོག་བྱེད་དགོས་པའི་རེ་འདུན་ཤུགས་ཆེ་བཏོན་ཡོད། དེ་ཡང་གསར་འགོད་གསལ་བསྒྲགས་དེའི་ནང་འཁོད་དོན། རྒྱ་ནག་གཞུང་གིས་ཀིརྟི་དགོན་པ་ནས་རྒྱ་མིའི་དམག་དཔུང་ཕྱིར་འཐེན་དགོས་པ་དང་དགེ་འདུན་པ་ཚོར་དྲག་གནོན་བྱེད་རྒྱུ་འཕྲལ་དུ་མཚམས་འཇོག་བྱེད་དགོས། དགེ་འདུན་པ་གྲངས་ ༣༥ ཙམ་འཛིན་བཟུང་བྱས་པ་རྣམས་འཕྲལ་དུ་གློད་བཀྲོལ་བྱེད་དགོས་པ་མ་ཟད། དགེ་འདུན་པ་ཚོ་ས་གནས་གཞན་དུ་འཁྲིད་དེ་སློབ་གསོ་སྤྲོད་རྒྱུ་ཟེར་བའི་སྡིགས་ར་གཏོང་རྒྱུའི་ལས་གཞི་དེ་འཕྲལ་མར་མཚམས་འཇོག་དགོས།
རྒྱ་མིའི་ཉེན་རྟོག་མི་སྣ་ཀིརྟི་དགོན་པའི་ནང་ཡོང་སྐབས་ས་གནས་བོད་མི་རྣམས་ཀྱིས་ལམ་བཀག་སྟེ་དགོན་པའི་ནང་འཛུལ་མ་བཅུག་པར་བརྟེན། ཉེན་རྟོག་མི་སྣས་མི་མང་ཚོར་གཅར་རྡུང་བཏང་བར་ངས་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། རྒྱ་ནག་གཞུང་ལ་ས་གནས་བོད་མི་རྣམས་ཀྱི་དཀའ་ངལ་རྣམས་ཕྱི་གསལ་ནང་གསལ་དང་དྲང་བདེན་གྱི་ལམ་ནས་སེལ་དགོས་པའི་འགན་ཞིག་ཡོད་ཅེས་འཁོད་ཡོད།