༢༠༡༡ ཟླ་ ༤ ཚེས་ ༡༨ རེས་གཟའ་ཟླ་བ།
༄༅། །༸གོང་ས་༸སྐྱབས་མགོན་ཆེན་པོ་མཆོག་སུ་ཝི་ཌན་ (Sweden) རྒྱལ་ས་སི་ཊོཀ་ཁོམ་གྱི་མཛད་འཕྲིན་རྣམས་ལེགས་པར་གྲུབ་སྟེ་གྲོང་ཁྱེར་ལུནྜ་ (Lund) དུ་ཕྱི་ཟླ་ ༤ ཚེས་ ༡༦ ཉིན་ཆིབས་ཞལ་བསྒྱུར་ཏེ་ཁུལ་དེར་༸ཞབས་སོར་འཁོད་མཚམས་སུ་ཝི་ཌན་ངལ་སེལ་ཚོགས་པའི་ (SOIR IM) ཚོགས་གཙོ་སྐུ་ཞབས་ཧ་ཀན་ཝིལ་ཧེམ་སེན་ (Mr Hakan E Wilhelmsson) མཆོག་དང་། གྲོང་སྡེའི་སྤྱི་ཁྱབ་པ་ལྕམ་སྐུ་ཨ་ནི་ཀ་ཨེ་ནར་བྷི་ཇན་སན་ (Ms Annika Annerby Jansson) མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་པ་མ་ཟད། གྲོང་སྡེའི་སྤྱི་ཁྱབ་མ་མཆོག་གིས་མགོན་པོ་གང་ཉིད་མཆོག་ཐད་ཀར་ཉིན་དགུང་གསོལ་ཚིགས་སུ་གདན་འདྲེན་ཞུས། གསོལ་སྟོན་སྐབས་ལུཎྜ་ས་གནས་ཀྱི་ཆབ་སྲིད་མི་སྣ་ཁག་གཅིག་དང་སུ་ཝི་ཌན་ངལ་སེལ་ཚོགས་པའི་འཛིན་སྐྱོང་ཚོགས་མི། དེ་བཞིན་༸གོང་ས་མཆོག་གི་གྲོགས་པོ་རྙིང་པ་ཕྱི་ལོ་ ༡༩༥༩ ཙམ་ནས་བོད་མི་ན་གཞོན་ཁག་གཅིག་སུ་ཝི་ཌན་དང་ཌན་མཱག་ཁུལ་ལ་སྐྱབས་བཅོལ་དུ་སྣེ་ལེན་གནང་མཁན་སུ་ཝི་ཌན་དང་ཌན་མཱག་གི་བཟའ་ཟླ་ལྕམ་སྐུ་བྷི་རི་ཏ་ (Brita) མཆོག་དང་སྐུ་ཞབས་ཇོན་ཕན་ནེ་བྷག་སི་ (John Fennebergs) མཆོག་གི་བུ་མོ་ལྕམ་ཨ་ནི་ན་ཕན་ནེ་བྷག་(Anina Fenneberg) ལགས་ཀྱང་སྐུ་མགྲོན་དུ་ཕེབས་ཡོད།
གསོལ་ཚིགས་གྲུབ་མཚམས་གསར་འགོད་ལྷན་ཚོགས་ཤིག་ཏུ་ཆིབས་སྒྱུར་བསྐྱངས་ཏེ་གསར་འགོད་པ་མི་གྲངས་ ༥༠ ཙམ་ལ་བཀའ་སློབ་དང་གསར་འགོད་པའི་དྲི་བར་བཀའ་ལན་མཛད། དེ་ཡང་སྐབས་དེར་མགོན་པོ་གང་ཉིད་མཆོག་གིས་རྒྱ་ནག་སྲིད་གཞུང་གིས་བྱེད་ཕྱོགས་ལ་སྙིང་སྟོབས་ཆེན་པོས་ངོ་རྒོལ་གྱི་འབོད་སྒྲ་སྒྲོག་མཁན་ཚོར་བཟང་སྤྱོད་ཀྱི་རྒྱབ་སྐྱོར་སྤྲོད་རྒྱུ་རང་དབང་ཅན་གྱི་རྒྱལ་ཁབ་ཚོར་འགན་ཡོད་སྐོར་དང་། ད་ཆ་རྒྱ་ནག་གི་ཆབ་སྲིད་ལ་བཅོས་བསྒྱུར་གཏོང་རྒྱུའི་དུས་ལ་བབ་ཡོད་སྐོར་བཀའ་སྩལ།
དེ་རྗེས་༸གོང་ས་མཆོག་ལུཎྜ་རྩེད་ཐང་ཆེན་མོའི་ཚོགས་ཁང་དུ་མང་ཚོགས་གྲངས་ ༣༠༠༠ བརྒལ་བ་འདུ་འཛོམས་ཐོག་སྐུ་ཞབས་ཇོ་ཧན་ཝེ་སི་ཊར་ (Johan Wester) ལགས་དང་ལྷན་བགྲོ་གླེང་མཛད། སྐབས་དེར་སྐུ་ཞབས་ཇོ་ཧན་ཝེ་སི་ཊར་ལགས་ཀྱིས་༸གོང་ས་མཆོག་ལ་བྱིས་པ་ཚོར་སློབ་གསོ་ཇི་ལྟར་སྤྲོད་དགོས་མིན་གྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་ང་ཚོའི་རེ་བ་བཅོལ་ས་དེ་མི་རབས་གསར་པ་ཚོ་རེད། འཛམ་གླིང་གི་མི་སུ་འདྲ་ཞིག་གིས་ཀྱང་རྙོག་གྲ་མེད་པའི་བྱམས་བརྩེ་དང་ཞི་བདེ་ལྡན་པའི་འཛམ་གླིང་ཞིག་འདོད་ཀྱི་ཡོད། དེ་ལྟར་ཡོང་རྒྱུའི་ཐབས་ལམ་ཡག་ཤོས་ནི་བྱམས་བརྩེ་དང་གཞན་ཕན་གྱི་བསམ་པའི་ཐོག་ནས་མི་གཞན་གྱི་བདེ་སྡུག་ལ་སེམས་འཚབ་ཀྱི་རྣམ་པ་སྟོན་ཐུབ་པ་བྱེད་རྒྱུ་དེ་རེད་ཅེས་བཀའ་སྩལ།
གཞན་ཡང་༸གོང་ས་མཆོག་གིས་སྐབས་དེར་ཆབ་སྲིད་ཀྱི་སྐུ་དབང་དང་འབྲེལ་ནས་བཀའ་སློབ་སྩལ་དོན། ངོས་རང་བོད་ནང་ཡོད་དུས་ནས་མང་གཙོའི་རིང་ལུགས་ལ་མཐའ་གཅིག་ཏུ་རྒྱབ་སྐྱོར་བྱེད་མཁན་ཞིག་ཡིན། ཕྱི་ལོ་ ༡༩༥༣ ལོར་ངོས་ཀྱིས་བོད་ནང་བཅོས་བསྒྱུར་ཚོགས་པ་གཅིག་གསར་འཛུགས་བྱས་ཡོད་ཀྱང་རྒྱ་ནག་གཞུང་གིས་གུན་ཁྲན་རིང་ལུགས་ཀྱི་ལམ་སྲོལ་ལྟར་བོད་ནང་བཅོས་བསྒྱུར་གཏོང་རྒྱུའི་འདོད་པ་བྱས་པར་སོང། ང་ཚོའི་བཅོས་བསྒྱུར་བྱེད་སྟངས་དེ་གུང་ཁྲན་ལ་རྒྱབ་འགལ་སོང་བར་བརྟེན། མཐར་ཕྱི་ལོ་ ༡༩༥༩ ལོར་བོད་མི་གྲངས་ ༡༥༠ ༠༠༠ ཙམ་རྒྱ་གར་ལ་བྲོས་བྱོལ་དུ་ཡོང་དགོས་བྱུང་བ་རེད། ངོས་རང་ལོ་མང་རིང་ཆོས་སྲིད་གཉིས་ཀའི་འགོ་ཁྲིད་བྱས་པར་བརྟེན་ཆོས་སྲིད་ཀྱི་འཛིན་སྐྱོང་ཐ་དད་དགོས་ཞེས་གཞན་ལ་བཙན་ཐབས་ཀྱིས་བརྗོད་སྐབས་ཏོག་ཙམ་ཡ་མཚན་པོ་ཞིག་ཡོད། འོན་ཀྱང་ཕྱི་ལོ་ ༢༠༠༡ ལོར་བོད་མི་རྣམས་ཀྱིས་ཆབ་སྲིད་འགོ་ཁྲིད་དེ་ཐད་ཀར་འོས་བསྡུའི་ལམ་ནས་འདེམས་སྐབས་ངོས་ཀྱི་གནས་སྟངས་དེ་ཕྱེད་རྒན་ཡོལ་ཞིག་ཏུ་བསྒྱུར་བ་དང་། ངོས་རང་ཕྱེད་རྒན་ཡོལ་བྱས་ཏེ་ལོ་ ༡༠ ཙམ་བསྡད་པ་དེ་འདང་ངེས་ཤིག་རེད། ངོས་ལའང་འགྲོ་བ་མིའི་ཐོབ་ཐང་ཡོད་ཅེས་ཞལ་ཤོབ་མཛད་པ་དང་སྦྲགས། མུ་མཐུད་བཀའ་སློབ་སྩལ་དོན། ད་ཆ་ངོས་ཀྱིས་ཏཱ་ལའི་བླ་མའི་ཆབ་སྲིད་ཀྱི་འགན་དབང་ཆ་ཚང་མང་ཚོགས་ཀྱིས་འོས་འདེམས་བྱས་པའི་སྒྲིག་འཛུགས་ལ་དགའ་སྤོབས་ཐོག་ནས་རྩིས་སྤྲད་ཡོད། དེར་བརྟེན་ལོ་ངོ་བཞི་བརྒྱ་ཙམ་སོང་བའི་ཏཱ་ལའི་བླ་མའི་བོད་མིའི་ཆབ་སྲིད་ཀྱི་འགོ་ཁྲིད་བྱེད་རྒྱུའི་ལམ་སྲོལ་དེ་དགའ་སྤོབས་ངང་མཇུག་བསྒྲིལ་བ་རེད། ངོས་ཀྱིས་ཕྱི་ལོ་ ༢༠༡༡ ཟླ་ ༣ ཚེས་ ༡༩ ཉིན་ཆབ་སྲིད་ཀྱི་དབང་ཆ་མང་ཚོགས་ཀྱི་འོས་འདེམས་བྱས་པའི་སྒྲིག་འཛུགས་ལ་རྩིས་སྤྲོད་བྱས་ཉིན་གྱི་དགོང་མོ་དེར་གཉིད་ཧ་ཅང་སྐྱིད་པོ་ཞིག་དང་ལྗིད་པོ་ཞིག་ཁུག་བྱུང་ཞེས་སླར་ཡང་ཞལ་ཤོབ་མཛད།
གཞན་ཡང་མགོན་པོ་གང་ཉིད་མཆོག་གིས་མུ་མཐུད་བཀའ་སློབ་སྩལ་དོན། ཞི་བདེ་ཟེར་བ་དེ་སྨོན་ལམ་བརྒྱབ་སྟེ་ཡོང་རྒྱུ་ཞིག་མིན་པར་ལག་ལེན་ཐོག་ནས་ཡོང་དགོས། ཞི་བདེ་ཡོང་བར་ཐོག་མར་སོ་སོ་རང་ཉིད་མི་སྒེར་ཞིག་ཡིན་པའི་ཆ་ནས་བསྒྱུར་བཅོས་གཏོང་ཐབས་བྱེད་དགོས། དེ་ནས་རང་གི་ཁྱིམ་ཚང་དང་། སློབ་གྲྭ་ལ་སོགས་པའི་ནང་འགྱུར་བ་ཡོང་ཐབས་བྱེད་དགོས། དེ་བཞིན་གསར་འགོད་པ་ཚོར་ཡང་ལས་འགན་གལ་ཆེན་པོ་ཞིག་ཡོད་ཅེས་བཀའ་སྩལ། ཕྱོགས་མཚུངས་ཆོས་ལུགས་མཐུན་སྒྲིལ་ཐོག་༸གོང་ས་མཆོག་གིས་བཀའ་སློབ་སྩལ་དོན། ཆོས་ལུགས་འདྲ་མིན་ཡོད་པ་རྣམས་དེ་སྔ་ཨ་སི་སི་ལྷན་འཛོམས་ (Assisi Meeting) ལྟར་ཕན་ཚུན་མཚམས་རེ་ལྷན་འཛོམས་བྱེད་རྒྱུ་དེ་འདྲ་བྱུང་ན་ཕན་ཐོགས་ཆེན་པོ་ཡོད། ངོས་རང་ཡེ་ཤུ་དང་ཁ་ཆེ། ཧིན་སྡུ། ཇིའུ་སོགས་ཆོས་ལུགས་གཞན་གྱི་དབུ་ཁྲིད་རྣམས་དང་ཐུག་རྒྱུ་དེས་ཆོས་ལུགས་གཞན་ལ་གུས་བརྩི་དང་བསམ་ཤེས་ཡོང་ཐུབ་པ་སོགས་ཀྱིས་ཕན་ཐོགས་རླབས་ཆེན་ཞིག་ཡོང་གི་འདུག དེང་སྐབས་ཆོས་ལུགས་ཕན་ཚུན་ལྷན་འཛོམས་ཀྱི་ཚོགས་འདུ་དེ་འདྲ་མང་པོ་ཞིག་ཚོགས་བཞིན་ཡོད་པ་དེར་ངོས་རང་རྗེས་སུ་ཡི་རང་ཞུ་བཞིན་ཡོད། ཅེས་སོགས་ཀྱི་བཀའ་སློབ་སྩལ།
གོ་སྐབས་དེ་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་གིས་སུ་ཝི་ཌན་ངལ་སེལ་ཚོགས་པ་ (SOIR/IM) དང་ཕན་ནེ་བྷག་ཁྱིམས་ཚང་ (Fenneberg Family) དེ་བཞིན་ཌན་མཱཀ་གི་རྒྱལ་སྲས་པི་ཊར་ (Prince Peter of Denmark) བཅས་ཀྱིས་བོད་མི་ཚོའི་ཤེས་ཡོན་དང་དཔལ་འབྱོར་སོགས་ཕྱོགས་གང་སྤྱིའི་ཐད་རྒྱབ་སྐྱོར་གྱི་མཐུན་འགྱུར་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་མཛད་པ་དང་སྦྲགས་ཁོང་ཚོའི་བཀའ་དྲིན་ནམ་ཡང་བརྗེད་ཐབས་མེད་ཅེས་བཀའ་སྩལ།
