༢༠༡༡ ཟླ་ ༣ ཚེས་ ༢༡ རེས་གཟའ་ཟླ་བ།
༅༅། །གངས་ལྗོངས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༸གོང་ས་ལྷ་མིའི་རྣམ་འདྲེན་༸སྐྱབས་མགོན་རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་གཞུང་དམངས་ཡོངས་ལ་མང་གཙོའི་ལམ་སྲོལ་བཟང་པོ་གསོལ་སྩལ་བཀའ་དྲིན་ཆེ་བ་བསྐྱངས་པ་དང། ལྷག་པར་བོད་མིའི་འཕྲལ་ཕུགས་གཉིས་ལ་དགེ་མཚན་ཆེར་བསྐྱེད་གཟིགས་ཏེ་ཆབ་སྲིད་ཀྱི་འགན་དབང་ཡོངས་རྫོགས་མང་གཙོའི་ཐོག་ནས་མི་དམངས་ཀྱིས་འོས་འདེམས་བྱས་པའི་དབུ་ཁྲིད་རྣམས་ལ་གསོལ་སྩལ་འགན་བཞེས་དགོས་པའི་བཀའ་སློབ་རིམ་པར་ཕེབས་ཡོད་པ་ལྟར། ཕྱི་ལོ་ ༢༠༡༡ ཟླ་ ༣ ཚེས་ ༢༠ ཉིན་དབུས་འོས་བསྡུ་ལས་ཁང་གིས་ལམ་སྟོན་འོག་བཞུགས་སྒར་རྡ་སས་དབུས་བཙན་བྱོལ་དུ་གནས་པའི་བོད་མི་རྣམས་ནས་གནས་ཡུལ་ས་གནས་ཁག་ཏུ་འོས་བསྡུའི་ས་
ཚིགས་བཙུགས་ཡོད་པ་བཞིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བ་དང་གངས་སྐྱིད་ཐང་ཆེན་སོགས་པའི་ནང་སྔ་དྲོའི་ཆུ་ཚོད་ ༩།༠༠ འགོ་བཙུགས་ཀྱིས་ཕྱི་དྲོ་ཆུ་ཚོད་ ༥།༠༠ བར་བོད་མི་རང་ལོ་ ༡༨ སོན་པ་ཡན་རྣམས་ནས་མང་གཙོའི་ཁེ་དབང་ལོངས་སུ་སྤྱད་དེ་ཚང་ཁ་ཤིག་ཤིག་ངང་བཀའ་ཁྲི་སྐབས་གསུམ་པ་དང་སྤྱི་འཐུས་སྐབས་བཅོ་ལྔ་པ་དེ་ཡང་སྤྱིར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་གཞིར་བཟུང་དང་། ཡང་སྒོས་བོད་མི་རིགས་ཀྱི་རྩ་དོན་སྒྲུབ་མཁན་ཤེས་འཇོན་གཉིས་ལྡན་གྱི་མི་སྣ་ཤ་སྟག་བསླེབ་རྒྱུའི་རེ་འདུན་བཅངས་ཏེ་རྒྱ་གར་སོགས་ས་གནས་ཡུལ་གྲུ་ཁག་ནང་ཡོད་པའི་བོད་མི་རྣམས་ནས་ཉིན་བརྒྱ་དུས་གཅིག་ལ་མི་མང་རྣམས་ནས་འོས་འདེམས་བྱ་རྒྱུའི་བཀའ་སྤྱི་གཉིས་ཀྱི་འོས་ཤོག་རང་དོན་རང་གཅེས་སྒོ་ནས་འོས་འཕེན་གྱིས་ས་གནས་ཁག་ ༦༡ ནང་བོད་རིགས་རྒན་དར་གཞོན་གསུམ་གྱིས་མ་བསྐུལ་དང་བླངས་ཐོག་མང་གཙོའི་ཁེ་དབང་ལོངས་སུ་སྤྱད་དེ་མ་ལན་མ་འགྱོད་མེད་པའི་སྒོ་ནས་ཤེས་འཇོན་གཉིས་ལྡན་གྱི་བོད་མི་རིགས་དང་རྒྱལ་ཁབ་ལ་ལྷག་བསམ་རྣམ་དག་གི་ཞབས་ཞུ་སྒྲུབ་འདོད་ཡོད་མཁན་གྱི་མི་སྣ་དེ་དག་ལ་འོས་ཤོག་འཕངས་ཡོད་པ་བཅས།།
