༢༠༡༡ ཟླ་ ༢ ཚེས་ ༡༤ རེས་གཟའ་ཟླ་བ།
༄༅། །འདི་གར་བོད་གཞུང་ཨ་རིའི་སྐུ་ཚབ་དོན་ཁང་ཀྱིས་བཏང་གནས་ནང་འཁོད་དོན། ཨ་རིའི་ནིའུ་ཡོཀ་མངའ་སྡེའི་ནང་ཡོད་པའི་ཕེ་ལ་སི་སྦག་Plattsburgh ཞེས་པའི་ས་ཁུལ་དུ་བོད་ཀྱི་ཐུན་མོང་མ་ཡིན་པའི་སྒྱུ་རྩལ་འགྲེམས་སྟོན་གྱི་འདུ་འཛོམས་ཐོག་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་གདན་ཞུས་ལྟར་ཆེད་ཕེབས་གནང་སྟེ་ཕྱི་ལོ་ ༢༠༡༡ ཟླ་ ༢ ཚེས་ ༩ ཉིན་གསུང་བཤད་གནང་ཡོད།
དེ་ཡང་བོད་ཀྱི་སྒྱུ་རྩལ་འགྲེམས་སྟོན་དེ་ནི་ཕེ་ལ་སི་སྦག་སྒྱུ་རྩལ་འགྲེམས་སྟོན་ཁང་(Plattsburgh State Art Museum)དང་། ཕེ་ལ་སི་སྦག་གཙུག་ལག་སློབ་གྲྭ་ཆེན་མོ་(State University of Plattsburgh) གཉིས་ཐུང་མོང་ནས་གོ་སྒྲིག་ཞུས་པ་ཞིག་ཡིན།
ཨ་རིའི་བོད་གཞུང་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་འདུ་འཛོམས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་རླབས་ཆེན་མཛད་ཁུར་གསུམ་ངོ་སྤྲོད་གནང་ཞིང་། དེ་རྗེས་ཁོང་གིས་ཕྱི་རྒྱལ་མང་ཚོགས་དང་གཞུང་ཕྱོགས་ནས་བཟང་སྤྱོད་ཀྱི་ཐོག་ནས་བོད་མིར་ཤུགས་ཆེའི་རྒྱབ་སྐྱོར་དང་གདུང་སེམས་མཉམ་སྐྱེ་གནང་གི་ཡོད་ཀྱང་། རྒྱ་ནག་གཞུང་ལ་དོ་ཕོག་འགྲོ་མི་ཡོང་སྙམ་པའི་ཞེད་སྣང་ཆེ་དྲགས་པའི་དབང་གིས་ཁོང་ཚོའི་རྒྱབ་སྐྱོར་དེ་སྲིད་བྱུས་དང་། བྱ་སྤྱོད་ཐོག་སྒྱུར་མ་ཐུབ་པ་དེ་མིག་སྔར་ང་ཚོར་འཕྲད་པའི་དཀའ་ངལ་ཆེ་ཤོས་ཤིག་ཡིན་པའི་སྐོར་དང་། བོད་མིར་ཤ་ཚ་དང་རྒྱབ་སྐྱོར་གནང་མཁན་ཚོས་བོད་མིའི་དགོས་མཁོ་དང་། མངོན་འདོད་ག་རེ་ཡིན་པ་མཁྱེན་རྟོགས་ཐུབ་པའི་ཐོག་ནས་བཙན་བྱོལ་བོད་གཞུང་གིས་གང་ཞིག་གལ་ཆེར་བཟུང་གི་ཡོད་པ་དེ་ལ་རྒྱབ་སྐྱོར་གནང་རྒྱུ་དེ་གལ་ཆེན་པོ་ཡིན་པ་མ་ཟད། རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་རྩུབ་ཀྱི་སྲིད་བྱུས་ལ་གདོང་ལེན་བྱེད་ཐབས་གསར་པ་ཇི་ཡོད་དགོངས་པ་བཞེས་རྒྱུ་དེ་ཡང་ཧ་ཅང་གི་གལ་ཆེན་པོ་ཡིན་པའི་སྐོར་གསུངས་ཡོད། ཡང་སྐུ་ཚབ་དོན་གཅོད་ཀྱིས། རྒྱ་ནག་གཞུང་གིས་བོད་ཐོག་མཁྲེགས་རྩུབ་ཀྱི་སྲིད་བྱུས་བཟུང་བའི་དམིགས་ཡུལ་གཙོ་བོ་ནི་བོད་ཀྱི་བདེན་པའི་འཐབ་རྩོད་དེ་རྒྱལ་སྤྱིའི་ཐོག་འགུལ་ས་མེད་པ་བཟོ་རྒྱུ་དེ་ཡིན་ཞིང་། དམིགས་ཡུལ་དེ་སྒྲུབ་ཆེད་གཞུང་དང་། ཚོགས་པ་སོགས་ནས་༸གོང་ས་མཆོག་དང་བོད་མིར་རྒྱབ་སྐྱོར་བྱེད་མཁན་ཚོར་གནོན་ཤུགས་སྣ་ཚོགས་སྤྲོད་ཐབས་བྱེད་ཀྱི་ཡོད་ཀྱང་། དེ་དག་ལ་ནུས་པ་ཐོན་ཐུབ་ཀྱི་མེད་པ་ནི་སྔ་ལོ་ཨ་རིའི་སྲིད་འཛིན་ཨོ་བྷ་མས་རྒྱ་ནག་གི་གནོན་ཤུགས་ལ་མ་ལྟོས་པར་༸གོང་ས་མཆོག་དང་ལྷན་དུ་ཕོ་བྲང་དཀར་པོའི་ནང་མཇལ་འཕྲད་ཞུས་པ་ནས་མཚོན་ཐུབ་ཅེས་འགྲེལ་བརྗོད་གནང་ཡོད། དེ་བཞིན་སྐུ་ཚབ་དོན་གཅོད་ཀྱིས་ཕྱི་ལོ་ ༢༠༠༢ ལོར་བོད་རྒྱའི་དབར་འབྲེལ་ལམ་བསྐྱར་གསོ་བྱུང་རྗེས་༸གོང་ས་མཆོག་གིས་སྐུ་ཚབ་གཏོང་གནང་མཛད་དེ་རྒྱ་ནག་དབུས་གཞུང་དང་མཉམ་དུ་འབྲེལ་མོལ་ཐེངས་དགུ་ཙམ་གནང་ཡང་དོན་ཕན་ལྡན་པའི་གྲུབ་འབྲས་བྱུང་མེད། དེའི་རྒྱུ་རྐྱེན་གཙོ་བོ་ནི་ད་ལྟའི་རྒྱ་ནག་གཞུང་གི་འགོ་ཁྲིད་ཚོར་བོད་ཀྱི་གནད་དོན་ཐག་གཅོད་བྱེད་པའི་ཆབ་སྲིད་ཀྱི་འདོད་མོད་མེད་པ་དེར་ཐུག་ཅིང་། ༸གོང་ས་མཆོག་གི་ངོས་ནས་ད་དུང་ཡང་ཕན་ཚུན་གདོང་ཐུག་ནས་སྐད་ཆ་ཤོད་རྒྱུ་དེ་བོད་དོན་ཐག་གཅོད་དང་གཉིས་ཕན་གྱི་ཐབས་ལམ་ཡག་ཤོས་ཡིན་པར་སྔར་བཞིན་ཡིད་ཆེས་བརྟན་པོ་མཛད་ཀྱི་ཡོད་སྐོར་གསུངས། སྐུ་ཚབ་དོན་གཅོད་ཀྱིས་ཕྱི་ལོ་ ༢༠༠༨ ལོའི་ཟླ་ ༣ པ་ནས་བཟུང་༸གོང་ས་མཆོག་གིས་རྒྱ་ནག་མི་མང་མཉམ་དུ་འབྲེལ་ལམ་གནང་རྒྱུར་སྒོ་གང་ས་ནས་སྐུ་ལས་བསྐྱོན་གནང་མཛད་པའི་འབྲས་བུར་ད་ཆ་རྒྱ་རིགས་སྔར་ལས་མང་བས་བོད་ཀྱི་ཐོག་རྒྱབ་སྐྱོར་གྱི་རྣམ་པ་ཐོན་བཞིན་ཡོད་ལ། བོད་མིར་ཤ་ཚ་དང་རྒྱབ་སྐྱོར་གནང་མཁན་ཕྱི་རྒྱལ་གྲོགས་པོ་ཚོས་ཀྱང་རྒྱ་རིགས་ཀྱི་སྤྱི་ཚོགས་དང་། ལྷག་པར་རྒྱ་རིགས་སློབ་ཕྲུག དེ་བཞིན་ཤེས་ཡོན་ཅན། གསར་འགྱུར་ལས་རིགས་པར་འབྲེལ་ལམ་ཤུགས་ཆེ་ཙམ་གནང་ཐུབ་ན་ཕན་ཐོགས་ངེས་ཅན་ཡོང་རྒྱུ་ཡིན་ཞེས་གསུངས། མཐའ་དོན་སྐུ་ཚབ་དོན་གཅོད་ཀྱིས། ༸གོང་ས་མཆོག་གིས་ང་ཚོའི་རྒྱབ་སྐྱོར་བ་ཚོ་ནི་བོད་ལ་རྒྱབ་སྐྱོར་དང་། རྒྱ་ནག་ལ་ངོ་རྒོལ་བྱེད་མཁན་མིན་པར། ཁོང་ཚོ་ནི་དྲང་བདེན་ལ་རྒྱབ་སྐྱོར་གནང་མཁན་རེད་ཅེས་རྒྱུན་དུ་བཀའ་ཕེབས་ཀྱི་ཡོད་པ་འདི་དྲན་གསོ་གནང་བ་དང་ཆབས་ཅིག་གསུང་བཤད་མཇུག་སྡོམས་གནང་ཡོད།
བོད་ཀྱི་ཐུན་མོང་མ་ཡིན་པའི་སྒྱུ་རྩལ་གྱི་རིག་གཞུང་འགྲེམས་སྟོན་གནང་ཡུལ་ཕེ་ལ་སི་སྦག་ཞེས་པའི་ Plattsburgh ས་ཁུལ་དེ་ནི་ནིའུ་ཡོཀ་གྲོང་ཁྱེར་ནས་རླངས་འཁོར་བརྒྱུད་དེ་ཕྱིན་ན་ཆུ་ཚོད་ལྔའི་ལམ་ཐག་ཡིན་ཞིང་། ས་ཁུལ་དེར་ཧ་ལམ་བོད་པའི་ཁྱིམ་ཚང་གཅིག་ཡོད་པ་དེ་ནི་དེ་སྔ་དབུས་གཞོན་ནུ་ལྷན་ཚོགས་ཀྱི་དྲུང་ཆེ་གནང་མྱོང་མཁན་དབྱངས་ཅན་སྒྲོལ་དཀར་དང་། ཁོང་གི་སྐུ་ཟླ་བསྟན་འཛིན་རྡོ་རྗེས་ལགས་ཡིན།
ཐེངས་འདིའི་འགྲེམས་སྟོན་དེ་ནི་ཕེ་ལ་སི་སྦག་སྒྱུ་རྩལ་འགྲེམས་སྟོན་ཁང་Plattsburgh State Art Museum  དང་། ཕེ་ལ་སི་སྦག་གཙུག་ལག་སློབ་གྲྭ་ཆེན་མོ་ State University of Plattsburgh གཉིས་ཐུང་མོང་ནས་གོ་སྒྲིག་ཞུས་ཀྱང་། ཞིབ་ཕྲའི་རྒྱུས་བབ་ཀྱི་ཕྱག་ལས་གནང་མཁན་གཙོ་བོ་ནི་དབྱངས་ཅན་སྒྲོལ་རེད། ད་ཐེངས་ཀྱི་འགྲེམས་སྟོན་དེ་ཕྱི་ཟླ་ ༡ ཚེས་ ༣༡ ཉིན་ནས་དུས་ཡུན་བདུན་གཉིས་རིང་འགྲེམས་སྟོན་གནང་གི་ཡོད་པ་དེའི་རིང་དཀྱིལ་འཁོར་དང་། སྐུ་ཐང་། ཤིང་བརྐོས། དཔར་རིས། ཡིག་གཟུགས། མར་མཚོན་སོགས་ཀྱི་ནང་དོན་ཚུད་ཡོད་ཅིང་། བོད་མི་བསོད་ནམས་རྫོགས་བཟང་ལགས་དང་། ཚེ་རིང་ཕུན་ཚོགས་ལགས། ལྡུམ་ཁང་ཕུན་ཚོགས་རྣམ་རྒྱལ་ལགས། སྐུ་ཞབས་དོན་གྲུབ་ཚེ་རིང་ལགས། རྡོ་ལགས་བཅས་ནས་རང་རང་སོའི་ལག་རྩལ་ལ་གཞིགས་པའི་སྒྱུ་རྩལ་འགྲེམས་སྟོན་གནང་ཡོད་པ་བཅས། །