༢༠༡༡ ཟླ་ ༢ ཚེས་ ༡ རེས་གཟའ་མིག་དམར།
༄༅། །འདི་གར་བོད་གཞུང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་ཁྱབ་ཁོངས་སུ་བོད་རིགས་སྤྱི་མཐུན་ཚོགས་པ་ཁག ༣༠ ཙམ་ཡོད་པ་དང་། སྐུ་ཚབ་དོན་གཅོད་ཁང་ནས་ལོ་གཉིས་རེའི་མཚམས་སུ་ཚོགས་ཆེན་ཐེངས་རེ་བསྐོང་གི་ཡོད་ཅིང་། ད་བར་ཐེངས་བཅུ་བསྐོངས་ཟིན་ཡོད། ད་རེས་ཐེངས་ ༡༡ དེ་ཕྱི་ཟླ་ ༢ ཚེས་ ༢༦ ནས་ ༢༧ ཉིནགཉིས་རིང་ཨ་རིའི་གྲོང་ཁྱེར་ནིའུ་ཡོཀ་ནང་བསྐོང་གཏན་འཁེལ་ཡོད། སྐུ་ཚབ་དོན་གཅོད་བློ་བཟང་སྙན་གྲགས་ནས། རྒྱ་ནག་གཞུང་གིས་བོད་ཐོག་འཛིན་པའི་གཞི་རྩའི་སྲིད་བྱུས་ལ་འགྱུར་བ་མེད་ཁར། ད་དུང་བཙན་བྱོལ་བོད་མིའི་ཆིག་སྒྲིལ་ནུས་མེད་དུ་གཏོང་རྒྱུར་སྒོ་གང་ས་ནས་ཐབས་ཤེས་བྱེད་བཞིན་པར་བརྟེན། ཐེངས་འདིའི་ཚོགས་ཆེན་འདི་གནད་འགག་ཆེན་པོ་ཆགས་ཡོད་པའི་ངོས་འཛིན་གནང་གི་ཡོད་པ་རེད། དེ་བཞིན་ཚོགས་འདུ་བ་ཚོས་བཙན་བྱོལ་བོད་མིའི་རང་དབང་གཅེས་འཛིན་དང་གཞན་ཡང་དང་བླངས་དཔྱ་དངུལ་ལག་དེབ་དང་འབྲེལ་བའི་དོན་གནད་ཁག བོད་མིའི་ཡ་རབས་བཟང་སྤྱོད་མི་ཉམས་གོང་འཕེལ་གཏོང་ཐབས། རྒྱ་ནག་འཐབ་ཕྱོགས་གཅིག་གྱུར་ཁང་གིས་བོད་མིའི་ཆིག་སྒྲིལ་གཏོར་བཤིག་གཏོང་ཐབས་བྱེད་བཞིན་པར་གདོང་ལེན་བྱེད་ཐབས། བོད་གཞུང་མང་ཚོགས་ཆེན་ཐེངས་དང་པོ་དང་། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པའི་ཐོག་བཀའ་བསྡུར་བྱུང་དོན་ལྟར་རྒྱ་རིགས་དང་མཉམ་དུ་འབྲེལ་ལམ་ཤུགས་ཆེ་རུ་གཏོང་ཐབས། བོད་དོན་རྒྱབ་སྐྱོར་ཚོགས་པ་ཁག་དང་། བོད་རིགས་སྤྱི་མཐུན་ཚོགས་པ་གནས་ཡུལ་མངའ་སྡེ་དང་། གྲོང་ཁྱེར་སོ་སོའི་སྲིད་གཞུང་དང་གྲོས་ཚོགས་ནང་བོད་ཀྱི་བདེན་པའི་འཐབ་རྩོད་ལ་སྔར་ལས་རྒྱབ་སྐྱོར་ཆེ་བ་ཐོབ་ཐབས་སུ་ལས་འགུལ་སྤེལ་ཕྱོགས། ཧི་མཱ་ལ་ཡའི་རྒྱུད་ཀྱི་མི་རིགས་དང་། སོག་རིགས་མཉམ་འབྲེལ་བ་སྔར་ལས་ཤུགས་ཆེར་གཏོང་ཐབས་སོགས་གལ་གནད་ཆེ་བའི་གྲོས་གཞི་ཁག་གཅིག་གི་ཐོག་བཀའ་བསྡུར་གནང་རྒྱུ་ཡིན་འདུག
ཚོགས་ཆེན་ཉིན་དང་པོར་སྐུ་ཚབ་དོན་གཅོད་བློ་བཟང་སྙན་གྲགས་ལགས་ནས་ཚོགས་ཆེན་དང་འབྲེལ་བའི་ལམ་སྟོན་གསུང་བཤད་གནང་རྒྱུ་དང་། ཉིན་གཉིས་པར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་ནས་ཚོགས་བཅར་བ་ཡོངས་ལ་བོད་རྒྱའི་འབྲེལ་ལམ་སྐོར་གསུང་བཤད་གནང་རྒྱུ་རེད། ཐེངས་འདིའི་ཚོགས་ཆེན་ལ་ས་གནས་ཆུང་ཁག་གསུམ་ཙམ་མ་ཏོག བོད་རིགས་སྤྱི་མཐུན་ཚོགས་པ་ཡོངས་རྫོགས་མཉམ་ཞུགས་གནང་གི་ཡོད་ཅིང་། ཚོགས་ཆེན་གྲུབ་རྗེས་ཕྱི་ཟླ་ ༢ ཚེས་ ༢༨ ཉིན་ཚོགས་བཅར་བ་རྣམས་ནིའུ་ཡོཀ་ནས་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་བོད་དོན་ལས་འགུལ་ཁང་ནས་སྣེ་འཁྲིད་གནང་བའི་རྒྱབ་གཉེར་འཚོལ་བའི་ལས་འགུལ་ཉིན་མོར་(Lobby Day)མཉམ་ཞུགས་གནང་རྒྱུ་ཡིན་འདུག་པ་བཅས།།
