༢༠༡༡ ཟླ་ ༢ ཚེས་ ༤ རེས་གཟའ་པ་སངས།
༄༅། །ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༢ ཚེས་ ༣ ཉིན་སྔ་དྲོའི་ཆུ་ཚོད་ ༧ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་གསུམ་པའི་ཆོས་འབྲེལ་སྩལ་གྲུབ་མཚམས་འབྲས་སྤུངས་བློ་གསལ་གླིང་དུ་ཆིབས་སྒྱུར་སྐྱོང་སྐབས་བློ་གླིང་མཁན་པོ་སྟོབས་ལྡན་རིན་པོ་ཆེ་མཆོག་གིས་སྤོས་སྣེས་སྔོན་བསུས་ཏེ་བཞུགས་ཁྲིར་༸ཞབས་སོར་འཁོད་བསྟུན། བློ་གསལ་གླིང་མཁན་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས།
དེ་ནས་༸གོང་ས་མཆོག་གིས་ཤར་བྱང་ཆོས་རྗེ་རྣམ་གཉིས་ཀྱིས་དབུས་བླ་སྤྲུལ་རྣམ་པ། མཁན་ལས་ཟུར་རྣམ་པ། དེ་བཞིན་དགེ་འདུན་པ་ཞལ་གྲངས་ ༣༠༠༠ བརྒལ་བ་རྣམས་ལ་བཀའ་སློབ་ཕེབས་དོན། དེ་སྔ་བོད་དུ་འབྲས་སྤུངས་བློ་གསལ་གླིང་ནང་འདུས་ཚོགས་ཧ་ཅང་ཆེན་པོ་རེད། རྒན་པདྨ་རྒྱལ་མཚན་དེ་དུས་མཁན་པོ་གནང་སྐབས་དགེ་འདུན་པའི་ཞལ་གྲངས་ཕལ་ཆེར་ ༥༠༠༠ ལྷག་ཙམ་དང་སློབ་གཉེར་ཡག་པོ་བྱེད་མཁན་སྟོང་ཕྲག་ལྷག་ཙམ་ཡོད་ཅེས་གསུངས་བྱུང་། གདན་ས་གསུམ་གྱི་ནང་སེར་བྱེས་དང་བློ་གསལ་གླིང་གཉིས་འདུས་ཚོགས་ཆེ་ཤོས་ཆགས་ཡོད། འདི་གར་ཆ་བཞག་ན་དགེ་འདུན་འདུས་ཚོགས་ཡོད་པ་ཚོས་སློབ་གཉེར་ཡང་ཡག་པོ་བྱེད་བཞིན་འདུག་པས་ཐུགས་རྗེ་ཆེ་ཞུ་རྒྱུ་ཡིན།
སྔོན་མ་ངོས་རང་འདི་གར་དང་པོ་འབྱོར་སྐབས་དགེ་འདུན་པ་རྣམས་སྨྱུག་ཁང་ནང་བསྡད་ཡོད། མཐུན་རྐྱེན་ཧ་ཅང་སྐྱོ་པོ་རེད། དེ་དུས་ངོས་ཀྱིས་འབྲས་སྤུངས་ཚོགས་ཆེན་གྱི་ཐོག་ཁང་ནས་ཉན་སྡོད་སྐབས་དགོང་མོ་རྒྱན་འཇུག་དང་། བརྒྱུད་བླ་མ་སོགས་སྐྱོར་གྱིན་སྐོར་བ་བརྒྱབ་ནས་ཧ་ལམ་ནམ་ཕྱེད་ཙམ་སྡོད་ཀྱི་འདུག བར་ལམ་དེ་འདྲ་གོ་རྒྱུ་མི་འདུག དེ་བཞིན་སེ་རར་ཆ་བཞག་ནའང་འགོ་སྟོད་དགེ་འདུན་པ་རྣམས་སྨྱུག་ཁང་ནང་སྡོད་ཀྱི་ཡོད། དེའི་སྐབས་འོང་ཁའི་གསེབ་ཏུ་ལེགས་བཤད་སྙིང་པོ་སྐྱོར་ཏེ་སྡོད་མཁན་དེ་འདྲ་ཡོང་གི་ཡོད། བར་ལམ་ཁང་པའི་ནང་སྐྱོར་མཁན་དེ་འདྲ་ཡོད་ཀྱི་རེད་མ་གཏོགས་དེ་མིན་གོ་རྒྱུ་མི་འདུག་ཅེས་དང་།
དེ་བཞིན་མགོན་པོ་གང་ཉིད་མཆོག་གིས་དེར་འདུས་དགེ་འདུན་པ་རྣམས་ལ་བསླབ་པ་སློབ་གཉེར་ཡག་པོ་བྱེད་དགོས་པ་དང་། སློབ་གཉེར་གྲུབ་མཚམས་སྤྱིར་སོ་སོའི་ཡུལ་དགོན་དང་ཡང་སྒོས་བོད་ནང་སོ་སོའི་དགོན་པ་དང་ཡུལ་པ་ཚོར་ཞབས་འདེགས་སྒྲུབ་དགོས་པའི་ལམ་སྟོན་བཀའ་སློབ་ཕེབས་ཡོད་པ་མ་ཟད། དགེ་བཤེས་ཐོན་པ་དང་སློབ་གཉེར་གང་ཙམ་བྱས་རྗེས་བསྟན་པ་དང་འགྲོ་བར་ཞབས་འདེགས་སྒྲུབ་མཁན་ཚོར་བསྔགས་བརྗོད་མཛད་ཡོད། ཡང་༸གོང་ས་མཆོག་གིས་བཀའ་སློབ་ཕེབས་དོན། དེ་སྔ་གཞུང་ཆེན་སློབ་གཉེར་མེད་སར་སློབ་གཉེར་གསར་པ་འཛུགས་རྒྱུ་དང་། ཚད་མའི་རིགས་ལམ་གྱི་ཐོག་ནས་རྟགས་གསལ་གཏོང་རྒྱུའི་འགྲོ་སྟངས་དེ་ཚགས་ཚུད་ཡོད་སྟབས། གཡས་གཡོན་རྙིང་མའི་དགོན་ཁག་དང་། བཀའ་བརྒྱུད། ས་སྐྱ་བཅས་ཀྱི་དགོན་པ་ནས་སློབ་གཉེར་གནང་རྒྱུའི་ཐུགས་སྣང་གསར་པ་བསླེབས་ཡོད། ས་ཆ་ཁ་ཤས་ལ་འཇང་དགུན་ཆོས་ཚོགས་ཏེ་ཉེ་འཁོར་གྱི་དགོན་སྡེ་རིས་མེད་ཚང་མའི་གྲྭ་རྒྱུན་བསླེབས་པ་དེ་འདྲ་བྱུང་འདུག མཐུན་རྐྱེན་གཙོ་ཆེ་ཤོས་དེ་བྱེས་ལ་ཡོད་པའི་བཤད་གྲྭ་ཁག་ལ་སློབ་གཉེེར་བྱས་རྗེས་བོད་ལ་བསླེབས་ཏེ་ཕན་ཐོགས་བྱས་པ་སོགས་བྱུང་འདུག
དེར་བརྟེན་དགེ་འདུན་ཡོད་པ་དེ་དག་སྤུས་དག་དང་། སློབ་གཉེར་ཐོག་ལ་ད་ལྟ་ཧུར་ཐག་བྱེད་ཀྱི་འདུག་ལ་ད་དུང་ཡང་མུ་མཐུད་ཧུར་ཐག་བྱེད་རོགས། གཙོ་བོ་སློབ་གཉེར་བ་སོ་སོ་རྣམ་གཡེང་གི་དབང་དུ་མ་འགྲོ་བར་བློ་རྩེ་སྒྲིམ་སྟེ་དཔེ་ཆ་ལྟ་རྒྱུ་གལ་ཆེན་པོ་ཡིན། གཞན་ཡང་ངོས་ཀྱི་ངོ་ཤེས་པ་ཁ་ཤས་ཀྱིས་དེ་སྔ་ཡིན་ན་ཆོས་ར་དང་ཚོགས་གྲོལ་སྐབས་དགེ་འདུན་པ་ནང་ཁུལ་རྟགས་གསལ་གཏོང་མཁན་དེ་འདྲ་ཡོད། བར་སྐབས་ནས་དེ་ལྟར་མིན་པར་གློག་བརྙན་འཁྲབ་མཁན་སྐོར་ལ་ཤོད་མཁན་འདུག་ཅེས་བརྗོད་མཁན་བྱུང་བས་དེའི་རིགས་ལ་གཟབ་གཟབ་བྱེད་དགོས། དངོས་གསལ་མེད་པའི་ཐོག་ནས་འཐུས་ཤོར་ཆེན་པོ་ཕྱིན་པའི་རྣམ་འགྱུར་ཐོན་ཡོང་དུས་ལམ་སེང་གསོ་རྒྱུ་ཁག་པོ་ཡིན། དེར་བརྟེན་ད་བར་ཡག་པོ་ཚང་མས་གནང་འདུག་ལ་ད་དུང་ཡང་ཧུར་བསྐྱེད་གནང་རོགས་ཞེས་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་ལམ་སྟོན་ཟབ་མོ་ཕེབས་ཡོད། དེ་རྗེས་༸གོང་ས་མཆོག་གིས་དགེ་འདུན་པ་རྣམས་ཀྱི་རྟགས་གསལ་དམ་བཅར་གཟིགས་མཛད་པ་མ་ཟད། རྟགས་གསལ་གྲུབ་མཚམས་རྩོད་ཁོང་རྣམས་དང་ལྷན་སྐུ་པར་ཡང་བསྒྲོན་ཡོད་པ་བཅས།།
