༢༠༡༡ ཟླ་ ༡ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༡༢ ཉིན་ཕྱེད་ཡོལ་ཆུ་ཚོད་ ༣།༣༠ ཐོག་བཙན་བྱོལ་བོད་གཞུང་གི་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་གིས་རྒྱ་གར་གྱི་གནས་ཡོད་མི་སྣ་དང། གསར་འགོད་པ་སོགས་ཁྱོན་མི་གྲངས་བརྒྱ་ཕྲག་བརྒལ་བའི་དབུས་ཝྭར་ཎ་གཙུག་ལག་སློབ་ཁང་གི་གསར་དུ་བཞེངས་པའི་སམ་བྷོ་ཊ་ཁང་གསར་གྱི་སྒོོའི་དར་མཚོན་སྣེ་ལྔའི་མདུད་པ་བཀྲོལ་ནས་དབུ་འབྱེད་གནང། དེ་ཉིན་ཕྱེད་ཡོལ་ཆུ་ཚོད་ ༥།༣༠ ཐོག་བཀའ་ཁྲི་མཆོག་གིས་ཝྭར་ཎ་གཙུག་ལག་སློབ་གཉེར་ཁང་གི་ཨ་ཏི་ཤ་ཚོགས་ཁང་ནང་དུ་བོད་ནས་བཅར་བའི་ཆོས་ཞུ་བ་ ༡༨༠༠ བརྒལ་བ་རྣམས་ལ་བཙན་བྱོལ་ནང་གི་གནས་སྟངས་སོགས་ཀྱི་སྐོར་ལ་གསུང་བཤད་གནང་དོན། དེ་རིང་ཁྱེད་རང་ཚོར་བཀའ་མོལ་ཞུ་རྒྱུའི་གོ་སྐབས་བྱུང་བ་དེ་ཧ་ཅང་གི་སྐལ་པོ་བཟང་པོ་བརྩིས་ཀྱི་ཡོད། ཕྱོགས་གཅིག་ནས་དེ་རིང་སྔ་དྲོ་༸གོང་ས་མཆོག་གིས་བཀའ་ཕེབས་པ་ལྟར་གནས་མཆོག་ཝ་ར་ཎ་སི་ཞེས་པ་འདི་སྟོན་པ་རྣམ་འདྲེན་བཞི་པ་ཤཱཀྱ་ཐུབ་པས་ཆོས་ཀྱི་འཁོར་ལོ་སྐོར་ས་གནས་ཁྱད་པར་ཅན་འདིར་༸གོང་ས་མཆོག་༸ཞབས་སོར་འཁོད་དེ་རྒྱལ་སྤྱིའི་མི་མང་ཡོངས་རྫོགས་ལ་སྤྱོད་འཇུག་དང་སྒོམ་རིམ་བར་པའི་ཟབ་རྒྱས་ཆོས་ཀྱི་བདུད་རྩི་སྩལ་བའི་སྐབས་འདིར་གཞིས་བཞུགས་ཀྱི་བོད་རིགས་སེར་སྐྱ་མང་པོ་ཞིག་དེ་རེས་འདིར་ཕེབས་འཛོམས་གནང་ཐུབ་པ་དེ་༸གོང་ས་མཆོག་ཀྱང་ཐུགས་དགྱེས་ཚོར་ཆེན་པོ་བྱུང་འདུག་ལ་ང་ཚོ་ཡང་དགའ་པོ་བྱུང་།
ཁྱེད་རང་ཚོ་མཇལ་རྒྱུ་དང་འཚམས་འདྲི་ཞུ་རྒྱུར་ཆེད་མངགས་ང་དང་བཀའ་ཤག་གི་ལས་རོགས་བཀའ་བློན་རྣམ་པ་གཉིས་བཅར་བ་ཡིན། ཁྱེད་རང་ཚོ་ཚང་མར་བཀའ་ཤག་དང། བཙན་བྱོལ་བོད་མིའི་སྤྱི་ཚོགས། ང་རང་སྒེར་གྱི་ངོས་ནས་མཛའ་བརྩེ་དང་ལྡན་པའི་ཐོག་ནས་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། ཚང་མའི་དགོངས་པ་མངའ་གསལ་རེད། བོད་ཆོས་ལྡན་ཞིང་གི་སྤྱི་ཚོགས་དེ་གཞིས་བྱེས་གཉིས་ལ་ཁ་གས་ནས་ལོ་ ༥༡ ཕྱིན་པ་རེད། ལོ་ ༥༡ དེའི་རིང་མི་རབས་ལྟ་བུ་བྱས་ན་མི་རབས་གསུམ་ཙམ་ཕྱིན་ཟིན་པ་རེད། དེའི་རིང་བྱེས་འབྱོར་དང་གཞིས་བཞུགས་བོད་མིའི་བར་དམ་ཚིག་གི་གཟུངས་ཁམས་མ་ཉམས་པ་བྱས་ནས་གཟུགས་པོའི་ཐུགས་འཕྲད་མེད་ནའང་བསམ་བློའི་ཆིག་སྒྲིལ་མ་ཉམས་པ་བྱས་ནས་སྡོད་ཐུབ་རྒྱུ་དང། ༸རྒྱལ་བ་རིན་པོ་ཆེ་མཆོག་ལ་དད་པ་དམ་ཚིག་གཡོ་བ་མེད་པ་བྱས་ནས་བཞུགས་ཐུབ་པ་དེ་ང་ཚོ་བོད་མི་རིགས་ཀྱི་གཟི་བརྗིད་དང་སྨད་དུ་བྱུང་བའི་ཡོན་ཏན་ཞིག་རེད་བསམ་གྱི་ཡོད།
དེར་བརྟེན་གཞིས་སུ་བཞུགས་མཁན་གྱི་བོད་རིགས་ཚང་མར་ང་ཚོ་བྱེས་འབྱོར་གྱི་བོད་རིགས་ཚོའི་ངོས་ནས་རྗེས་སུ་ཡིད་རང་དང་དགའ་བའི་མངོན་འདོད་མ་ཉམས་པའི་ཐོག་ནས་དུས་རྟག་ཏུ་བོད་ཀྱི་དོན་གྱི་བདག་པོ་བོད་ནང་ཡོད་པའི་མི་མང་ཚོ་ཡིན་པ་ངོས་འཛིན་ཞུས་ཏེ་བློ་དད་མི་གཡོ་བ་བྱས་ནས་བསྡད་ཡོད། བོད་ནང་བཞུགས་མཁན་གྱི་བོད་རིགས་ཚང་མས་ཀྱང་དེ་བཞིན་བོད་རིགས་ཀྱི་ལ་ཞེན་དང་མཚན་མཐོང་མ་ཉམས་པའི་ཐོག་ནས་སྐུ་ངལ་ཆེན་པོ་གང་འདྲ་ཞིག་བྱུང་ནའང་གདོང་ལེན་བྱས་ནས་སྲོག་དང་ཤ་ཁྲག་གི་འགྲོ་གྲོན་གཏོང་དགོས་ས་དང། སྲོག་དང་ལུས་ལ་ཉེན་ཁ་ཡོད་པའི་གནས་ཚུལ་དེ་ཚོའི་འོག་ནས་བོད་མི་རིགས་ཀྱི་རྣམ་པ་མ་བརླག་པ་བྱས་ནས་བདག་ཉར་བྱེད་ཐུབ་པ། འཕགས་པ་སྤྱན་རས་གཟིགས་ཀྱི་འདུལ་ཞིང་གི་ངོ་བོ་ལ་ཉམས་མེད་དུ་བདག་ཉར་ཐུབ་པ་དེ་ཁྱེད་རང་ཚོ་ད་ཕན་གྱི་མི་རབས་དེ་ཚོའི་རླབས་ཆེན་གྱི་ཕྱག་རྗེས་གཅིག་དང་བྱེས་རྗེས་བླ་ན་མེད་པ་ཞིག་ཡིན་པར་ངོས་འཛིན་བྱེེད་ཀྱི་ཡོད། ཕྱི་ལོ་ ༡༩༥༩ རྗེས་སུ་སྐྱེས་ནས་ཚར་ལོངས་བྱུང་པའི་ན་གཞོན་ཚོར་མཚོན་ན་༸རྒྱལ་བ་རིན་པོ་ཆེ་མཆོག་ཞལ་མཇལ་བྱུང་མྱོང་མེད།
བོད་ཀྱི་སྔ་མོ་རང་དབང་ཡོད་པའི་སྐབས་ཀྱི་སྤྱི་ཚོགས་ཀྱི་གནས་ཚུལ་མཐོང་མྱོང་གོ་མྱོང་མེད། འོན་ཀྱང་གཞོན་སྐྱེས་དེ་ཚོས་བོད་མི་རིགས་ཀྱི་ལ་ཞེན་དང་༸གོང་༸སྐྱབས་མགོན་ཆེན་པོ་མཆོག་ལ་ཡིད་ཆེས་བློ་དད་ཀྱི་སྒོ་ནས་དད་འདུན་ཞུ་རྒྱུ། བོད་ཀྱི་ཆོས་དང་རིག་གཞུང་ཡུལ་གོམས་གཤིས་ལུགས་ལེགས་བྱང་དང་བཅས་པ་མི་ཉམས་རྒྱུན་འཛིན་གནང་རྒྱུའི་ལས་དོན་གྱི་ཐོག་མཐུན་རྐྱེན་མ་འཛོམས་པ་དང། འགལ་རྐྱེན་མང་པོ་ཞིག་ཡོན་ནའང་དཀའ་ངལ་དེ་ཚོར་གདོང་ལེན་གནང་ནས་ད་བར་བོད་ཀྱི་ངོ་བོ་དང། སྐད་ཡིག་མ་བརླག་པ། བོད་ཀྱི་ཆོས་དང་རིག་གཞུང་རྩ་མེད་དུ་མ་ཕྱིན་པ་བྱས་ཏེ་རྒྱུན་འཛིན་གནང་ཐུབ་པ་དེ་ཁྱེད་རང་ཚོ་ཧ་ཅང་གི་ལྷག་བསམ་དང་སྙིང་སྟོབས་གཉིས་རྒྱ་ཆེའི་འཇིག་རྟེན་ཁྱོན་ཡོངས་ཀྱི་དྲང་བདེན་ལ་དགའ་བའི་མི་རིགས་ཚང་མས་ངོས་འཛིན་གསལ་པོ་གནང་དང་གནང་བཞིན་ཡོད། དེའི་དབང་གི་འཇིག་རྟེན་ཡོངས་ལ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་པ་འཕྲིན་ལས་ཀྱི་ཁྱབ་ཐུབ་པ་དང། བོད་ལ་ཤ་ཚ་ཡོད་པའི་རྒྱབ་སྐྱོར་བྱེད་མཁན་གྱི་མི་མང་འབུམ་ཕྲག་མང་པོ་རྒྱལ་ཁབ་ཚང་མའི་ནང་ནས་ཐོན་ཐུབ་པ་དེ་༸རྒྱལ་བ་རིན་པོ་ཆེ་མཆོག་གི་མཛད་པ་འཕྲིན་ལས་དང་ཆབས་ཅིག་ཏུ་གཞིས་བཞུགས་མང་ཚོགས་རྣམས་ཀྱི་རང་གི་གནས་བབ་བརྟན་པོར་འཛིན་སྟེ་བཞུགས་ཐུབ་པའི་དབང་གི་བྱུང་བ་རེད།
དེར་བརྟེན་ང་ཚོ་ཚང་མས་དགའ་སྤོབས་ཡི་རང་བྱེད་འོས་པ་ཞིག་རེད། ལྷག་པར་དུ་བོད་ནང་བཞུགས་མཁན་གྱི་བོད་མི་རྣམ་པ་ཚོར་རང་དབང་གི་གནས་བབ་ཧ་ཅང་གི་ཞན་པོ་ཡོད་པས་སྨྲ་བརྗོད་དང་བྱ་སྤྱོད་ཀྱི་གནས་ཚུལ་མང་པོ་ཞིག་གི་ཐོག་དུས་རྟག་ཏུ་ཉེན་ཁ་ཡོད་པའི་གནས་ཚུལ་ཞིག་ཡོང་གི་ཡོད། དེ་ཙམ་དུ་མ་ཟད་བཟོད་པར་དཀའ་བའི་གནས་ཚུལ་མང་པོ་ཞིག་བྱུང་ནའང་། དེ་ཚོ་ཚང་མའི་སྐབས་༸རྒྱལ་བ་རིན་པོ་ཆེ་མཆོག་གི་བཀའ་སློབ་ལམ་སྟོན་གཞིར་བཟུང་ཐོག་འཚེ་མེད་ཞི་བའི་ལམ་འབའ་ཞིག་ལ་བརྟན་སྲུང་གནང་ཐུབ་པ་དེ་དམིགས་བསལ་གྱི་མཛད་རྗེས་རླབས་ཆེན་ཞིག་ཡིན་པ་ང་ཚོའི་ངོས་འཛིན་གསལ་པོ་བྱེད་ཀྱི་ཡོད། རང་དབང་ལུང་པར་སྡོད་མཁན་དེ་ཚོས་འཚེ་བ་མེད་པའི་ལམ་ལ་ཡིད་ཆེས་དང་ལག་བསྟར་བྱེད་རྒྱུར་དཀའ་ངལ་གང་ཡང་མེད། བཙན་དབང་འོག་ཏུ་སྡོད་མཁན་མི་དེ་ཚོ་ཉིན་རེ་བཞིན་བསམ་བློའི་ནང་བཟོད་དཀའ་བའི་ཁོང་ཁྲོ་རླུང་ཆེན་དང་བློ་ཕམ་སྐྱེ་གཞིའི་གནས་ཚུལ་ཡོང་དང་ཡོང་བཞིན་པ་དེ་ལྟ་བུའི་རྐྱེན་ངན་གནས་ཚུལ་བྱུང་བའི་སྐབས་ལའང་འཚེ་མེད་ཞི་བ་འབའ་ཞིག་བྱས་ནས་བཞུགས་ཐུབ་པ་དེ་བོད་མི་རིགས་ཀྱི་དམིགས་བསལ་གྱི་གཟི་བརྗིད་ཅིག་ཆགས་ཡོད། མ་འོངས་པར་ཡང་གནས་ཚུལ་དེ་མི་ཉམས་རྒྱུན་འཛིན་གནང་གི་རེད་ལ་གནང་དགོས་རྒྱུ་ནི་བོད་ཀྱི་རྩ་དོན་ཐོག་དམིགས་བསལ་གྱི་གནད་འགག་ཆེན་པོ་རེད། ཕྱི་ལོ་ ༢༠༠༨ ལྟ་བུར་མཚོན་ན་བོད་ས་ཁྱོན་ཡོངས་ལ་དམིགས་བསལ་གྱི་གྱེན་ལང་དང།
རང་གི་བསམ་ཚུལ་གསལ་སྟོན་བྱེད་རྒྱུའི་ལས་རིགས་རྣམ་གྲངས་ཧ་ཅང་མང་པོ་ཞིག་སྙིང་སྟོབས་དང་བློ་ཁོག་ཆེན་པོའི་ཐོག་ཁྱེད་རང་ཚོས་བརྩམས་གནང་པ་རེད། སུས་ཀྱང་སྐུལ་སློང་བྱེད་མཁན་མེད་པར་མ་སྐྲུན་བསམ་པ་གཅིག་མཐུན་དང་རང་འདོད་ཐོག་དང་བླངས་ཀྱི་ཐོག་ནས་གནང་པ་དེ་འཇིག་རྟེན་ཁྱོན་ཡོངས་ཀྱི་རྒྱལ་ཁབ་ཚང་མས་ཐུགས་སྣང་ལ་དམིགས་བསལ་གྱི་དོ་སྣང་བྱེད་དགོས་པའི་གནས་ཚུལ་ཞིག་ཆགས་ཡོད། དེའི་སྐབས་ལ་རྒྱ་ནག་མི་མང་སྤྱི་མཐུན་རྒྱལ་ཁབ་ནང་ཡོད་པའི་གྲངས་ཉུང་མི་རིགས་གཞན་གྱི་སྤྱོད་ཚུལ་དང་མི་འདྲ་བ་ང་ཚོས་དུས་རྟག་ཏུ་འཚེ་མེད་ཞི་བ་འབའ་ཞིག་གི་སྒོ་ནས་ཕེབས་ཐུབ་པ་དེ་འབུར་དུ་ཐོན་པའི་ཕྱག་རྗེས་དང་གྲུབ་འབྲས་ཤིག་བྱུང་ཡོད། ཅེས་དང།
ཡང་བཀའ་ཁྲི་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་བགྲེས་ཡོལ་ཆ་ཚང་ཕེབས་རྒྱུའི་སྐོ༞ར་གསུང་བཤད་གནང་དོན། འབྱུང་འགྱུར་ཕྱི་ཟླ་ ༣ པའི་ནང་བགྲེས་ཡོལ་ཆ་ཚང་ཕེབས་རྒྱུ་དང་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་གནས་བབ་ཐོག་ལ་༸སྐྱབས་མགོན་རིན་པོ་ཆེ་མཆོག་ཐུགས་འགན་བཞེས་མི་དགོས་རྒྱུའི་གནས་ཚུལ་དེ་འདྲ་བཀའ་སྩལ་ཡོད། དེར་བརྟེན་བོད་ལ་བཞུགས་པའི་བོད་མི་མང་པོ་ཞིག་གིས་ཐུགས་འཚབ་ཆེན་པོ་དང་ཐུགས་འཕྲལ་གནང་སྟེ་དེ་ནས་ཚུར་འཇགས་ལན་གནང་མཁན་དང་བཀའ་འདྲི་གནང་མཁན་མང་པོ་ཞིག་བྱུང་ཡོད། སྤྱིར་༸སྐྱབས་མགོན་རིན་པོ་ཆེ་མཆོག་གིས་ཉེ་བའི་ཆར་ཀ་སྦུག་དང་འབྲས་ལྗོངས་སུ་ཆིབས་སྒྱུར་བསྐྱངས་སྐབས་དེའི་ཐོག་དམིགས་བསལ་གསལ་བཤད་མཛད་ཡོད། འཛིན་སྐྱོང་གི་ཉིན་རེའི་ལས་དོན་བྱེད་ཕྱོགས་ཀྱི་ཐོག་བསྒྱུར་བ་བཏང་བ་མ་གཏོགས་སྤྱིར་བཏང་བོད་མི་བརྒྱ་ཆ་ ༩༩ ༸རྒྱལ་བ་རིན་པོ་ཆེ་མཆོག་ལ་ཡིད་ཆེས་བློ་དད་ཞུ་གི་ཡོད་པའི་དབང་གི་༸རྒྱལ་བ་རིན་པོ་ཆེ་མཆོག་དང་བོད་མི་མང་ཚོགས་བྲལ་ཐབས་མེད་པ་དང་། རྩ་དོན་གྱི་ཐོག་ཐུགས་འགན་མུ་མཐུད་ནས་བཞེས་རྒྱུ་ཡིན་བཀའ་སློབ་གསལ་པོ་ཕེབས་ཡོད། དེར་བརྟེན་དམིགས་བསལ་ཐུགས་ཚབས་དང་ཐུགས་འཕྲལ་གནང་དགོས་མེད་ཅེས་སོགས་ཀྱི་གསུང་བཤད་གནང་ཡོད།།
