༢༠༡༡ ཟླ་ ༡ ཚེས་ ༡༣ རེས་གཟའ་ཕུར་བུ།
༄༅། །འདི་གར་བོད་ཡིག་ཚན་པའི་གསར་འགོད་པས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་ཆོས་ཞུ་བ་མི་གྲངས་ཁྲི་གསུམ་ ༣༠༠༠༠ བརྒལ་བ་རྣམས་ལ་གནས་མཆོག་ཝྭ་རཱ་ཎ་སིའི་གསུང་ཆོས་ར་བའི་ནང་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོའི་དང་སློབ་དཔོན་ཀ་མ་ལ་ཤི་ལས་མཛད་པའི་བསྒོམ་རིམ་བར་པའི་ཆོས་འབྲེལ་ཉིན་དང་པོའི་ཉིན་རྒྱབ་ཏུ་བཀའ་ཆོས་དབུ་འཛུགས་མ་མཛད་གོང་བཀའ་སློབ་སྩལ་དོན།
ཁྱིམ་ནས་ཁྱིམ་མེད་པ་རབ་ཏུ་བྱུང་སྟེ་ལུས་ལ་གོས་ངུར་སྨྲིག་གི་རྟགས་ཆ་ལུགས་འཆང་མཁན་ང་རང་ཚོར་བསྟན་པ་འཛིན་སྐྱོང་སྤེལ་གསུམ་བྱེད་རྒྱུའི་དམིགས་བསལ་གྱི་ལས་འགན་ཞིག་ཡོད། མཁས་མཆོག་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་དེ། །ལུང་དང་རྟོགས་པའི་བདག་ཉིད་དོ། དེ་འཛིན་བྱེད་པ་སྨྲ་བྱེད་པ། བསྒྲུབ་པར་བྱེད་པ་ཁོ་ན་ཡིན། ཞེས་སོགས་གསུངས་ཡོད། ལུང་རྟོགས་ཀྱི་བསྟན་པ་དེ་གཉིས་བཤད་པ་དང་སྒྲུབ་པ་གཉིས་ཀྱི་ཐོག་འཛིན་སྐྱོང་སྤེལ་གསུམ་བྱེད་རྒྱུ་མ་གཏོགས་མེད། ཅེས་ཚིག་ཐག་བཅད་ནས་གསུངས་འདུག སྤྱིར་སངས་རྒྱས་ཀྱི་བསྟན་པ་བོད་ལྟ་བུར་མཚོན་ན་ཉག་ཕྲ་བའི་གང་ལ་འགྲོ་གི་ཡོད། འོན་ཀྱང་འཛམ་གླིང་སྤྱི་ཡོངས་ཐོག་ལ་བལྟས་ན་སངས་རྒྱས་ཀྱི་ཆོས་ལ་དོ་སྣང་བྱེད་མཁན་གསར་པ་མང་པོ་ཞིག་ཡོང་གི་ཡོད། དེ་ལྟ་བུའི་དུས་ཚོད་ཅིག་ལ་ང་རང་ཚོ་སངས་རྒྱས་ཀྱི་བསྟན་པ་ལུང་རྟོགས་གཉིས་ཀྱི་སྒོ་ནས་འཛིན་སྐྱོང་སྤེལ་གསུམ་བྱེད་རྒྱུའི་ཁུངས་ལྡན་དེ་ངོས་ཟིན་ནས་ཧུར་ཐག་བྱེད་རྒྱུ་གལ་ཆེན་པོ་ཡིན།
རྒྱུ་དངོས་པོ་ག་ཚོད་ཡོད་ཀྱང་མིའི་སྤྱི་ཚོགས་ནང་མི་ཞིག་ཡིན་ཕྱིན་ཆད་ལ་གཅིག་གིས་གཅིག་ལ་ཡིད་ཆེས་བློ་འགེལ་བྱེད་ས་དང། དངོས་གནས་གྲོགས་པོ་མཛའ་བཤེས་མེད་མཁན་དེ་འདྲ་ཆགས་ན། གཡས་གཡོན་གང་དུ་བལྟས་ཀྱང་ཐེ་ཚོམ་སྐྱེས་ཏེ་རང་ཉིད་གཅིག་པུ་ལུས་ན་ཁེ་ཕན་མེད། དེང་སང་དངོས་པོ་ཡར་རྒྱས་ཕྱིན་པའི་ལུང་པའི་ནང་ལ་ན་གཞོན་དེ་འདྲ་རང་ཤི་རྒྱག་མཁན་མང་པོ་ཡོང་གི་འདུག་དེ་བཞིན་སློབ་ཕྲུག་ཀྱང་དེ་མཚུངས་ཡོང་གི་འདུག དཔལ་འབྱོར་ཡར་རྒྱས་ཕྱིན་ཡོད་ཀྱང་སེམས་པ་མ་སྐྱིད་པ་བྱས་ནས་དེ་འདྲ་ཡོང་གི་འདུག དེ་བཞིན་སྤྱི་ཚོགས་ནང་ཕྲག་དོག་དང་འགྲན་སེམས་ཀྱི་ཐོག་ནས་མ་སྐྱིད་པ་ཡོད་མཁན་མང་པོ་འདུག བློ་འཁེལ་སའི་མི་གཅིག་ཀྱང་མེད་པ་ལྟ་བུ་ཆགས་པའི་རྐྱེན་གྱིས་རང་ཉིད་གཅིག་པུར་ལུས་པའི་ཚོར་བ་བསླེབས་ཏེ་སེམས་པ་མ་སྐྱིད་པ་ཆགས་ཀྱི་ཡོད། དེ་ནས་དུག་རྫས་རིགས་འཐེན་ནས་སེམས་པ་སྐྱིད་པོ་ཨེ་ཡོང་མི་ཡོང་ལྟ་གི་ཡོད། གང་ལྟར་དུས་རབས་ཉི་ཤུ་པའི་སྨད་དེ་འདྲ་གཅིག་ནས་གཞི་ནས་དངོས་པོ་ཡར་རྒྱས་གཅིག་པུས་འདང་གི་མེད་པ་དང་། ནང་བསམ་བློའི་ཐོག་ནས་བདེ་སྐྱིད་སྐྲུན་དགོས་པའི་དོ་སྣང་གསར་པ་ཞིག་བསླེབས་ཀྱི་འདུག ལྷག་པར་ལུས་པོའི་འཕྲོད་བསྟེན་དང་དེ་བཞིན་ཀླད་རྩ་ཕྲ་མོ་ཚན་རིག་པ་དེ་དག་གྲས་ཀྱིས་གཞི་ནས་སེམས་དང་རྣམ་རྟོག་འདྲ་མིན་གང་འདྲ་ཞིག་ཡོད་མེད་དང་དེ་ཀླད་རྩ་དང་འབྲེལ་བ་གང་འདྲ་ཡོད་མེད་དེ་འདྲ་བརྟག་དཔྱད་ཉམས་ཞིབ་ཚད་མཐོ་པོ་སླེབས་སྐབས་ཀླད་རྩ་ཚུར་དབང་སྒྱུར་མཁན་གྱི་རྣམ་པར་ཤེས་པ་ཞེས་པ་དེ་གང་ལྟར་མིང་གང་བཏགས་ཀྱང་མ་བཏགས་ཀྱང་ཀླད་པར་ཚུར་དབང་སྒྱུར་མཁན་གྱི་དངོས་པོ་ཞིག་ཡོད་པ་དེང་སང་དོ་སྣང་གསར་པ་ཞིག་སླེབས་ཀྱི་འདུག
སེམས་ལ་སྦྱོང་བརྡར་བྱས་ཏེ་དྲན་པ་གཉེར་བཞག་དང་སྙིང་རྗེ་དེ་འདྲ་བསྒོམ་ནས་སེམས་ལ་འགྱུར་བ་ཕྱིན་པའི་རྐྱེན་གྱིས་ཀླད་རྩ་ཕྲ་མོར་འགྱུར་བ་འགྲོ་རྒྱུ་ཞིག་དེ་སང་མཐོང་གི་འདུག སྔོན་མ་ཡིན་ན། ཀླད་རྩ་ལས་གཞན་པའི་སེམས་ཞེས་པ་ཞིག་མེད་ཐག་གཅོད་ཀྱི་འདུག ངོས་ཀྱིས་རྩེད་མོ་དང་སྦྲགས་འདི་འདྲ་ཤོད་ཀྱི་ཡོད། ང་ཚོ་ཧ་ཅང་དགའ་པོ་བྱུང་སྐབས་དགའ་ངུ་ཤོར་གྱི་ཡོད། ཡང་ཕ་མ་སོགས་འདས་གྲོངས་སུ་འགྱུར་སྐབས་སྡུག་བསྔལ་གྱི་མིག་ཆུ་ཤོར་རྒྱུ་ཞིག་ཡོང་གི་ཡོད། དེར་བརྟེན་དེ་གཉིས་བསམ་བློའི་ནང་ཁྱད་པར་ཆེན་པོ་ཡོད། འོན་ཀྱང་མིག་ཆུ་འདོན་སའི་མིག་གཅིག་པ་རེད་མ་གཏོགས་ཁག་ཁག་མི་འདུག དེར་བརྟེན་ནང་བསམ་བློ་རྣམ་རྟོག་འདྲ་མིན་གྱི་འགྲེལ་བཤད་ཆ་ཚང་ཀླད་རྩའི་སྟེང་ནས་རྒྱག་རྒྱུ་ཧ་ཅང་ཁག་པོ་ཡིན། དེར་བརྟེན་ང་ཚོས་སློབ་སྦྱོང་བྱེད་རྒྱུ་དེ་ཧ་ཅང་གལ་ཆེན་པོ་ཡིན། ངོས་ཀྱིས་ནམ་རྒྱུན་དུ་ཆོས་སྲིད་ཀྱི་ལས་ཀ་གང་ཡིན་རུང་རེ་བ་བཟང་ས་ནས་བརྒྱབ་དགོས་པ་དང་གྲ་སྒྲིག་སྡུག་ས་ནས་བྱེད་དགོས། ལྷག་པར་སོ་སོའི་ནོར་འཁྲུལ་ཡོང་ས་དེར་ཞིབ་འཇུག་བྱེད་དགོས། རྒྱལ་སྲས་ཐོགས་མེད་བཟང་པོས། །རང་གིས་འཁྲུལ་པ་རང་གིས་མ་བརྟག་ན། །ཆོས་པའི་གཟུགས་ཀྱིས་ཆོས་མིན་བྱེད་སྲིད་པས། །རྒྱུན་དུ་བརྟག་པར་རྒྱལ་སྲས་ལག་ལེན་ཡིན་ཞེས་གསུངས་ཡོད། ང་རང་ཚོ་ནོར་འཁྲུལ་ཐིག་དགུ་སྣེ་ཤོར་གྱི་སྐྱོན་དེ་ནས་ལྷག་གི་འདུག དེར་ང་ཚོས་དོ་སྣང་བྱས་ཏེ་བཟོ་བཅོས་རྒྱག་དགོས་པ་ལས་སྔ་མོའི་གཅིག་ཡིན་ཞེས་བརྗོད་རྒྱུ་མེད། རྒྱ་གར་གྱི་ཆོས་གྲོགས་ཚོས་རིགས་རུས་ཀྱི་དབྱེ་བ་ཕྱེ་རྒྱུ་དང་ཁྱོ་ག་འདས་གྲོངས་སུ་ཕྱིན་རྗེས་སྐྱེད་དམན་ཆང་ས་བརྒྱབ་མི་ཆོག་པའི་རྒྱ་གར་གྱི་སྲོལ་ལུགས་དེ་འདྲ་འདུག དེ་དག་བསྒྱུར་བཅོས་གཏོང་རྒྱུའི་དུས་སུ་སླེབས་ཡོད་ཅེས་ངོས་ཀྱིས་བརྗོད་ཀྱི་ཡོད། དེ་བཞིན་ང་ཚོ་བོད་པས་དེ་སྔ་སོ་སོའི་གོམས་གཤིས་ཡིན་རུང་དེ་རྒྱལ་བའི་དགོངས་པ་དང་བསྟན་པ་སྤྱི་དང་མི་མཐུན་པ། དེ་བཞིན་རྗེས་ལུས་ཀྱི་རྣམ་པ་ཞིག་ཡིན་ན། དོར་རྒྱུ་རེད་མ་གཏོགས་དེ་ང་ཚོའི་ལུགས་སྲོལ་ཡིན་ཞེས་བརྗོད་རྒྱུ་མེད། སངས་རྒྱས་བསྟན་པ་ངོ་ཐོག་ཤེས་པའི་ཐོག་ནས་བདག་པོ་རྒྱག་དགོས་པ་མ་གཏོགས་མ་དག་རྒྱུན་འབྱམས་ཐོག་ལ་ཕྱིན་པ་དེ་ནོར་འཁྲུལ་ཡིན། ཞེས་སོགས་ཀྱི་སྔོན་འགྲོའི་བཀའ་སློབ་སྩལ་རྗེས་ཆོས་འབྲེལ་དབུ་འཛུགས་བསྐྱངས་ཡོད་པ་བཅས།
