༢༠༡༠ ཟླ་ ༡༢ ཚེས་ ༢༩ རེས་གཟའ་ལྷག་པ།
༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་ཟས་རིགས་ཐོབ་ཐང་གི་དམིགས་བསལ་རྟོག་ཞིབ་པ་སྐུ་ཞབས་ཨོ་ལི་ཝར་ཌི་ཤུ་ཁུ་ཊར་ (Oliver De Schutter) ལགས༌ཀྱིས་ཕྱི་ལོ་ ༢༠༡༠ ཟླ་ ༡༢ ཚེས་ ༡༥ ནས་ ༢༣ རིང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ས་ཁུལ་ཁག་གཅིག་གི་ནང་ཟས་རིགས་ཀྱི་ཐོན་སྐྱེད་རྟོག་ཞིབ་ཆེད་ཕེབས་ཏེ་ལས་བསྡོམས་སྙིང་བསྡུས་ཤིག་སྤེལ་ཡོད། སྙན་ཐོ་དེའི་ནང་འདས་པའི་མི་རབས་འགའ་ཤས་རིང་རྒྱ་ནག་གི་སྤྱི་ཚོགས་དང་དཔལ་འབྱོར་གྱི་གནས་སྟངས་ལ་འགྱུར་བ་ཧ་ཅང་ཕྱིན་ཡོད་པ་དང། ས་བཅུད་ཉམས་ཆག་ཕྱིན་པ། གནམ་གཤིས་འགྱུར་འགྲོས་ཕྱིན་པ་སོགས་ཀྱི་གནས་སྟངས་ལ་བརྟེན།  གནད་དོན་གཙོ་བོ་ལྔའི་ཐོག་ཟས་རིགས་ཐོན་སྐྱེད་ལ་འཕྲད་རྒྱུའི་དཀའ་ངལ་གདོང་ལེན་བྱེད་དགོས་པའི་རེ་འདུན་བཏོན་ཡོད། གནད་དོན་ལྔ་པོ་ནི།  ༡༽ གྲོང་ཁྱེར་དང་གྲོང་གསེབ་དབར་འཚོ་བའི་གནས་སྟངས་ཀྱི་ཧེ་བག་ཆུང་དུ་གཏོང་དགོས་པ།  ༢༽ ས་ཞིང་བདག་དབང་གི་ཐོབ་ཐང་ལ་སྲུང་སྐྱོབ་དགོས་པ། ༣༽ ཕྱི་ལོ་ ༢༠༣༠ ལོར་རྒྱ་ནག་མི་མང་ཚོའི་ཟས་རིགས་ཐོན་སྐྱེད་ཀྱི་གནས་སྟངས།  ༤༽ ཟས་གཅུད་ཉམས་གསོ་བྱེད་རྒྱུ།   ༥༽ ཟས་རིགས་སྲུང་སྐྱོབ་དང་ཟས་རིགས་ཐོབ་ཐང་ཆེད་གཞི་རྩའི་ཐོབ་ཐང་ལ་བརྩི་སྲུང་དགོས་པ་བཅས་ཡིན་འདུག
དོན་ཚན་གཉིས་པ།  ས་ཞིང་བདག་དབང་གི་ཐོབ་ཐང་ལ་སྲུང་སྐྱོབ་དགོས་པ་ཞེས་པའི་ནང་འཁོད་དོན།  བོད་དང་ནང་སོག་ཁུལ་དུ་ཡོད་པའི་འབྲོག་པ་རྣམས་ད་ཆ་འཇིག་ལ་ཉེ་བའི་གནས་སྟངས་ཆགས་ཡོད་པ་དང། ས་ཁུལ་དེ་དག་གི་ནང་རྩྭ་ཐང་སྲུང་སྐྱོབ་དང་སྒོ་ཕྱུགས་ཐོན་སྐྱེད་ཀྱི་བཟོ་གྲྭ་རྣམས་དེང་རབས་ཅན་དུ་འགྱུར་ཆེད་ཕྱི་ལོ་ ༡༩༨༥ ལོར་རྒྱ་ནག་གཞུང་གིས་རྩྭ་ཐང་གི་སྒྲིག་ཁྲིམས་ཤིག་གཏན་འབེབས་བྱས་པ་དེ་ད་ཆ། ཕྱུགས་བསྐྱུར་སྤང་འདེབས་ཟེར་བ་དང་།  ཞིང་བསྐྱུར་ནག་འཛུགས།  ཟེར་བ་ལ་སོགས་པའི་སྲིད་བྱུས་འདྲ་མིན་དང་ལས་གཞི་འདྲ་མིན་ཐོག་ནས་ལག་བསྟར་བྱེད་བཞིན་ཡོད། ལས་གཞི་དེ་རིགས་ཁག་གཅིག་ནི་ཕྱི་ལོ་ ༡༩༩༩ ལོར་ནུབ་ཕྱོགས་གསར་སྤེལ་ཆེན་མོ།  ཟེར་བ་གཏན་འབེབས་བྱས་པའི་ཆ་ཤས་ཡིན། སྲིད་བྱུས་དེའི་དམིགས་ཡུལ་གཙོ་བོ་འབྲོག་པའི་རྩྭ་ཐང་ཉམས་གསོ་བྱ་རྒྱུ་དང་རྒྱ་ནག་གི་ས་ཆ་དམའ་སར་བྱུང་བའི་གོད་ཆག་ལ་སྟངས་འཛིན་བྱ་རྒྱུ་ཡིན་འདུག རྩྭ་ཐང་ཉམས་གསོའི་ཆེད་ཕྱུགས་སྐྱུར་སྤང་འདེབས་ཟེར་བའི་སྲིད་བྱུས་ལག་བསྟར་ཐོག་ནས་འབྲོག་པ་རྣམས་ལ་བཙན་ཐབས་ཀྱིས་སྒོ་ཕྱུགས་བཙོང་ནས་གཏན་སྡོད་བྱ་རྒྱུ་དང་ཕྱུགས་ཉུང་དུ་གཏོང་ཆེད་གསོད་དགོས་པའི་གནས་སྟངས་བཟོ་མི་རུང་། གང་ཡིན་བརྗོད་ན།  རྒྱལ་སྤྱིའི་དཔལ་འབྱོར་དང་སྤྱི་ཚོགས། ལེགས་བྱང་ཐོབ་ཐང་གི་གན་རྒྱ།  ཞེས་པ་དེའི་ནང་མི་སུ་འདྲ་ཞིག་གི་འཚོ་རྟེན་འཕྲོག་མི་རུང་བ་འཁོད་ཡོད་པ་དང།  ཕྱི་ལོ་ ༡༩༩༢ ལོར་སྐྱེ་དངོས་སྣ་མང་ལྷན་ཚོགས།  ཞེས་པའི་རྒྱལ་སྤྱིའི་ལྷན་ཚོགས་ཚུགས་སྐབས་རྒྱལ་ཁབ་སོ་སོའི་གདོད་མའི་མི་རིགས་འཚོ་གནས་བྱས་པ་དེས་སྐྱེ་དངོས་སྣ་མང་སྲུང་སྐྱོབ་བྱེད་ཀྱི་ཡོད་པར་བརྟེན།  ས་སྐྱེས་རྡོ་སྐྱེས་ཀྱི་མི་རིགས་རྣམས་ས་ཁུལ་གང་དུ་འཚོ་གནས་བྱས་པའི་ས་ཁུལ་དེ་རང་དུ་འཚོ་གནས་བྱེད་འཇུག་རྒྱུ་གལ་ཆེར་འཛིན་ཡོད། རྒྱ་ནག་གཞུང་གིས་གོང་བརྗོད་གན་རྒྱ་གཉིས་ཀར་ཁས་ལེན་བྱས་ཡོད།
དེར་བརྟེན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཟས་རིགས་ཐོབ་ཐང་གི་དམིགས་བསལ་རྟོག་ཞིབ་པས་རྒྱ་ནག་གཞུང་ལ་རྩྭ་ཐང་ཉམས་གསོའི་ཆེད་འགྲོ་གྲོན་གཏོང་རྒྱུ་དང་ད་ཡོད་འབྲོག་པ་རྣམས་ཀྱི་རྩྭ་ཐང་རྒྱ་སྐྱེད་གཏོང་རྒྱུ་མ་ཟད། རྒྱ་ནག་གཞུང་གིས་ནང་སོག་འབྲོག་པ་ཚོའི་སྒོ་ཕྱུགས་སྲུང་སྐྱོབ་ཀྱི་འཆར་གཞི་ལམ་ལྷོང་བྱུང་བ་དེ་བོད་ཀྱི་འབྲོག་པ་ཚོར་དེ་མཚུངས་ལག་བསྟར་དགོས་པའི་རེ་འདུན་ཞུ་རྒྱུ་དང། གཞན་ཡང་རྒྱ་ནག་སྲིད་གཞུང་གིས་འབྲོག་པ་ཚོ་དང་ལྷན་དོན་ཕན་ལྡན་པའི་གོ་བསྡུར་གྱིས་འབྲོག་པའི་འཚོ་གནས་ཐོག་འཕྲད་བཞིན་པའིི་དཀའ་ངལ་དེ་དག་སེལ་དགོས་པའི་རེ་འདུན་ཞུ་རྒྱུ་ཡིན་ཞེས་སོགས་འཁོད་ཡོད། རྒྱ་ནག་གཞུང་གིས་འཆར་ལོ་ཕྱི་ལོ་ ༢༠༡༡ ལོའི་ཕྱི་ཟླ་ ༣ ནང་ལོ་ལྔའི་འཆར་གཞི་ཐེངས་ ༡༢ པ་དེ་གཏན་འབེབས་བྱ་རྒྱུ་དང་། ཕྱི་ལོ་ ༼༢༠༡༡། ༢༠༢༠༽ རིང་རྒྱལ་ནང་དབུལ་ཕོངས་ངལ་སེལ་གྱི་འཆར་གཞི། ཟེར་བའི་ལས་གཞི་དེའི་འཆར་གཞི་བཀོད་སྒྲིག་བྱེད་བཞིན་པའི་སྐབས་དང་བསྟུན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཟས་རིགས་ཐོབ་ཐང་གི་དམིགས་བསལ་རྟོག་ཞིབ་པ་ཐེངས་དང་པོར་མགྲོན་འབོད་བྱས་པ་ཞིག་ཡིན་འདུག