༢༠༡༠ ཟླ་ ༡༢ ཚེས་ ༢༧ རེས་གཟའ་ཟླ་བ།
༄༅། །འདི་གར་བོད་ཡིག་ཚན་པའི་སྤྱི་ཁྱབ་འགན་འཛིན་གྱིས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༢༤ ཉིན་གྱི་སྔ་དྲོ་ཆུ་ཚོད་ ༨ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲད་རྒྱུད་མ་དགོན་གྱི་མདུན་ཐང་དུ་༸ཞབས་སོར་འཁོད་དེ་སྔོན་འགྲོའི་གསུང་ཆོས་གྲུབ་མཚམས་འཕགས་པ་སྤྱན་རས་གཟིགས་ཀྱི་བཀའ་དབང་བཀའ་དྲིན་སྩལ་ཡོད། དེ་ནས་མ་ཎི་དང་བཛྲ་གུ་རུ། ཨ་ར་པ་ཙ་བཅས་ཀྱི་ལྗགས་ལུང་སྩལ་རྗེས་ས་གནས་དེར་བསྐྱངས་པའི་ཉིན་གཉིས་ཀྱི་ཆོས་འབྲེལ་ཡོངས་སུ་ལེགས་གྲུབ་ཟིན་ཏེ། ཆུ་ཚོད་ ༡༢།༣༠ ཐོག་མགོན་པོ་གང་ཉིད་མཆོག་ཀ་ལུ་རིན་པོ་ཆེའི་དགོན་པར་གནས་གཟིགས་དང་། དེ་བཞིན་དེ་སྔ་དུས་འཁོར་དབང་ཆེན་གནང་སའི་ཕོ་བྲང་དུ་གནས་གཟིགས་སུ་ཆིབས་སྒྱུར་བསྐྱངས་ཡོད།
དེར་ཧི་མ་ལ་ཡའི་ཆོས་རིག་འཛིན་སྐྱོང་ཚོགས་པས་བཙུགས་པའི་སློབ་གྲྭའི་སློབ་ཕྲུག་རྣམས་ལ་མཇལ་ཁ་སྩལ་བ་དང་ཆབས་ཅིག་མགོན་པོ་གང་ཉིད་མཆོག་གིས་དེར་འདུས་དགེ་ལས་རྣམས་ལ། དུས་རབས་ཉེར་གཅིག་པའི་སློབ་གསོའི་རིག་པའི་སློབ་སྦྱོང་བྱེད་དགོས་པ་མ་ཟད། དེང་རབས་ཀྱི་སློབ་སྦྱོང་བྱས་ཐོག་དུས་རབས་ཉེར་གཅིག་འདི་གོ་ལ་ཁྱོན་ཡོངས་ལ་འཆམ་མཐུན་ཡོང་བ་བཟོ་དགོས་པའི་བཀའ་སློབ་ཕེབས་ཡོད། ཐེངས་འདིའི་འབྲས་ལྗོངས་དང་། ཀ་སྦུག ས་ལུ་སྒར་སོགས་ཀྱི་ཆོས་འབྲེལ་རྣམས་ཡོངས་སུ་ལེགས་པར་གྲུབ་སྟེ་འབྲས་ལྗོངས་མངའ་གཞུང་གི་བློན་ཆེན་དང་གནད་ཡོད་མི་སྣ་སོགས་ཀྱིས་ཕེབས་སྐྱེལ་ཞུས་ཐོག་མཁའ་ལམ་བརྒྱུད་རྒྱ་གར་རྒྱལ་ས་ལྡི་ལིར་ཆིབས་སྒྱུར་བསྐྱངས་ཡོད་པ་བཅས།
