༢༠༡༠ ཟླ་ ༡༢ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡༢ ཚེས་ ༩ རེས་གཟའ་ཕུར་པུའི་ཉིན་རྒྱབ་ཆུ་ཚོད་ ༡༢།༤༥ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་ཞུགས་སྒར་ནས་སྒང་ཏོག་དང་ཀ་སྦུག ར་ཝང་ལ། ས་ལུ་ག་ར་བཅས་རྒྱ་གར་བྱང་ཤར་གྱི་ས་ཁུལ་ཁག་གཅིག་གི་ནང་ཆོས་འབྲེལ་གྱི་མཛད་འཆར་སྐྱོང་ཆེད་ཆིབས་སྒྱུར་སྐྱོང་སྐབས་བོད་མི་གཙོ་བོར་གྱུར་བའི་དད་ལྡན་མང་ཚོགས་རྣམས་ཀྱིས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་སྐྱེལ་ཞུས་ཡོད།
དེ་ཡང་མགོན་པོ་གང་ཉིད་མཆོག་གིས་ཕྱི་ཚེས་ ༡༠ ཉིན་རྒྱ་གར་བྱང་ཕྱོགས་ཡུ་པི་མངའ་སྡེའི་རྒྱལ་ས་ལ་ཁནཨཱུ་ནང་དུ་ནང་པའི་ཆོས་ཚོགས་ (Dharma Society of India) ཞེས་པས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། ནང་ཆོས་དེ་དེང་དུས་སྤྱི་ཚོགས་ཀྱི་གནས་སྟངས་དང་འཚམས་ཚུལ། (The relevance of Buddhism in the present scenario of the world) ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང། ཕྱི་ཚེས་ ༡༡ ཉིན་རྒྱ་གར་གྱི་རྩ་ཁྲིམས་དོན་ཚན་ ༥༡ གྱི་ཐོག་རྒྱལ་སྤྱིའི་ཁྲིམས་དཔོན་ལྷན་ཚོགས་ཐེངས་ ༡༡ པ་དབུ་འབྱེད་མཛད་རྒྱུ་ཡིན་འདུག་ལྷན་ཚོགས་དེ་བཞིན་གྲོང་ཁྱེར་ལ་ཁནཨཱུ་ནང་རྟེན་གཞི་བྱས་པའི་མོན་ཊེ་སོརི་སློབ་གྲྭས་གོ་སྒྲིག་གནང་བ་ཞིག་ཡིན་འདུག ལྷན་ཚོགས་དེར་ཤྲི་ལངྐ་དང་ཨ་ཕི་གྷ་ནི་སི་ཐཱན། ཨར་ཇེན་ཊི་ན། ཨི་ཇིབ། ཨི་སི་རེལ། ན་ཡི་ཇེ་རི་ཡ་བཅས་ནས་ཁྲིམས་ཞིབ་པ་དང་ཁྲིམས་ལུགས་རིག་པའི་མཁས་དབང། ཞི་བདེའི་ལས་འགུལ་བ་བཅས་ཆེད་བཅར་གྱིས་མཉམ་བཞུགས་གནང་ཡོད།
དེ་རྗེས་ཕྱི་ཚེས་ ༡༢ ཉིན་ཀ་བློན་སྦུག་ཏུ་རྟེན་གཞི་བྱས་པའི་དགའ་ལྡན་ཐར་པ་ཆོས་གླིང་གིས་ཇི་ལྟར་གསོལ་འདེབས་ཞུས་དོན་ལྟར་མགོན་པོ་གང་ཉིད་མཆོག་ཁུལ་དེར་ཆིབས་སྒྱུར་བསྐྱང་སྟེ་ཕྱི་ལོ་ ༢༠༠༥ ལོར་གསར་བཞེངས་གནང་བའི་དགའ་ལྡན་ཐར་པ་ཆོས་གླིང་གི་གཙུག་ལག་ཁང་ལེགས་གྲུབ་ཟིན་པ་དེར་རབ་གནས་བཀའ་དྲིན་སྩལ་གནང་མཛད་རྒྱུ་དང། ཕྱི་ཚེས་ ༡༣ ཉིན་གྱི་སྔ་དྲོར་༸གོང་ས་མཆོག་གིས་ཀ་བློན་སྦུག་སེར་སྐྱ་མང་ཚོགས་རྣམས་ལ་ཚེ་དབང་སྩལ་གནང་མཛད་རྒྱུ་ཡིན་འདུག ཕྱོགས་མཚུངས་ཀ་སྦུག་སེར་སྐྱ་མང་ཚོགས་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པའི་བརྟན་བཞུགས་བསྟར་འབུལ་ཞུ་རྒྱུ་དང། ཕྱི་ཚེས་ ༡༤ ཉིན་མགོན་པོ་གང་ཉིད་མཆོག་གིས་མང་ཚོགས་ལ་བཀའ་སློབ་བཀའ་དྲིན་ཆེ་བ་སྩལ་གནང་མཛད་རྒྱུ་མ་ཟད། ཀ་སྦུག་ས་གནས་འགོ་འཛིན་གྱིས་ལས་བསྡོམས་སྙན་སྒྲོན་ཞུ་རྒྱུ་ཡིན་འདུག
དེ་རྗེས་ཕྱི་ཚེས་ ༡༥ ཉིན་ཀ་སྦུག་ཁུལ་གྱི་མཛད་འཆར་ཁག་ལེགས་པར་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་ལ་སྒང་ཏོག་མངའ་གཞུང་གིས་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་ཀ་སྦུག་ནས་ཐད་འཕུར་གནམ་གྲུ་བརྒྱུད་ར་ཝང་ལའི་ཉེ་འགྲམ་དུ་རྟེན་གཞི་བྱས་པའི་རྙིང་མའི་གནས་ཆེན་པདྨ་ཡང་རྩེ་དང། བཀྲ་ཤིས་སྡིངས་ཞེས་པའི་གནས་ཆེན་ཁག་ཏུ་གནས་གཟིགས་མཛད་རྒྱུ་མ་ཟད། ཕྱི་ཚེས་ ༡༦ ། ༡༧ བཅས་ཉིན་གྲངས་གཉིས་རིང་བཀྲ་ཤིས་སྟེང་དུ་སྐུ་མཚམས་བཞུགས་གནང་མཛད་རྒྱུ་ཡིན་འདུག ཕྱི་ཚེས་ ༡༨ སྔ་དྲོ་ཆུ་ཚོད་ ༩ ཙམ་ལ་༸གོང་ས་མཆོག་ར་ཝང་ལར་རྟེན་གཞི་བྱས་པའི་ས་སྐྱ་གནས་ལུང་དགོན་པར་ཆིབས་སྒྱུར་བསྐྱང་སྟེ་ཆུ་ཚོད་ཕྱེད་ཙམ་གྱི་མཛད་འཆར་གྲུབ་རྗེས་ར་ཝང་ལའི་གཞིས་ཆགས་ཀྱི་མ་དགོན་ཐུབ་བསྟན་དར་རྒྱས་གླིང་དུ་ཆིབས་སྒྱུར་བསྐྱང་སྟེ་མང་ཚོགས་ལ་བཀའ་སློབ་སྩལ་གནང་མཛད་རྒྱུ་མ་ཟད། ར་ཝང་ལ་ས་གནས་འགོ་འཛིན་གྱིས་ལས་བསྡོམས་སྙན་སྒྲོན་ཞུས་གྲུབ་བསྟུན། ས་གནས་དེར་རྟེན་གཞི་བྱས་པའི་སྟོན་པའི་སྐྱེད་ཚལ་ཞེས་པའི་ནང་འབྲས་ལྗོངས་མངའ་གཞུང་གིས་སྟོན་པའི་སྐུ་བརྙན་མཐོ་ཚད་ཕི་ཊི་ ༡༣༥ ཙམ་གསར་བཞེངས་གནང་བ་དེར་རབ་གནས་བཀའ་དྲིན་ཆེ་བ་སྩལ་གནང་མཛད་རྒྱུ་དང། ཕྱི་ཚེས་ ༡༩ ཉིན་རྒྱལ་ས་སྒང་ཏོག་ཏུ་ཆིབས་སྒྱུར་བསྐྱང་རྒྱུ་ཡིན་འདུག ཕྱི་ཚེས་ ༢༠ ཉིན་༸གོང་ས་མཆོག་གིས་སྒང་ཏོག་དུ་རྟེན་གཞི་བྱས་པའི་རྣམ་རྒྱལ་བོད་ཀྱི་ཤེས་རིག་ཉམས་ཞིབ་ཁང་དུ་ནང་ཆོས་དང་ཚན་རིག་གི་བགྲོ་གླེང་ཚོགས་འདུ་ཞིག་དབུ་འབྱེད་མཛད་རྒྱུ་དང་། ཕྱི་ཚེས་ ༢༡།༢༢ བཅས་ཉིན་གྲངས་གཉིས་རིང་མགོན་པོ་གང་ཉིད་མཆོག་གིས་སྒང་ཏོག་སེར་སྐྱ་མང་ཚོགས་རྣམས་ལ་བྱང་ཆུབ་སེམས་འགྲེལ་གྱི་ཆོས་འབྲེལ་དང་ཚེ་དབང་བཀའ་དྲིན་སྩལ་གནང་མཛད་རྒྱུ་ཡིན་འདུག་པ་བཅས།།
