༢༠༡༠ ཟླ་ ༡༡ ཚེས་ ༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༣ ཉིན་རྡ་སའི་ཉེ་འགྲམ་ཤེས་རབ་དགའ་ཚལ་སློབ་གླིང་གི་སྐབས་བཅུ་དགུ་པའི་བསླབ་པ་མཐར་སོན་སློབ་ཕྲུག་རྣམས་ལ་བཀའ་ཁྲི་ཟམ་གདོང་རིན་པོ་ཆེ་མཆོག་གི་ཕྱག་འཁྱེར་གནང་བ། དེ་ཉིན་སྔ་དྲོ་ཆུ་ཚོད་ ༩།༣༠ ཐོག་དཔལ་ལྡན་བཀའ་བློན་ཁྲི་པ་མཆོག་ལ་སློབ་གྲྭའི་འགན་འཛིན་དང་སློབ་སྤྱིས་དབུས་པའི་དགེ་ལས་སློབ་ཕྲུག་ཡོངས་ཀྱིས་གུས་བསུའི་ཕེབས་བསུ་དང་འབྲེལ་ཚོགས་ཁང་དུ་དགེ་ལས་སློབ་ཕྲུག་མི་གྲངས་ ༥༠༠ བརྒལ་བ་ལྷན་འཛོམས་ཀྱིས་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་ཕུལ། དེ་ནས་སློབ་གྲྭའི་དབུ་འཛིན་གྱིས་ལས་བསྡོམས་སྙིང་བསྡུས་སྒྲོགས་སྦྱང་ཞུས་གྲུབ་མཚམས་བཀའ་ཁྲི་མཆོག་གིས་བསླབ་པ་མཐར་སོན་སློབ་མ་རྣམས་ལ་ཕྱག་འཁྱེར་གནང། དེ་རྗེས་མཐར་ཕྱིན་སློབ་མའི་སྐུ་ཚབ་གཉིས་ནས་སློབ་གྲྭ་དེར་སློབ་སྦྱོང་བྱེད་རིང་གི་མྱོང་ཚོར་ངོ་སྤྲོད་གནང་བའི་ནང་སྤྱིར་བཙན་བྱོལ་གཞུང་དང་ཡང་སྒོས་དགེ་ལས་རྣམ་པས་ཕ་མ་ལྟར་གྱི་གཟིགས་རྟོགས་གནང་བའི་བཀའ་དྲིན་སྙིང་བཅངས་དང་སློབ་མ་རྣམ་པས་ཀྱང་དགེ་ལས་རྣམས་ལ་གུས་བརྩི་ཞུ་དགོས་པའི་གཏམ་བཤད་སོགས་གནང་རྗེས་སྤྱི་ཁྱབ་རྒན་བདག་ནས་གསུང་བཤད་དང་། དེ་རྗེས་བཀའ་ཁྲི་མཆོག་གིས་གསུང་བཤད་གནང་དོན། དེ་རིང་ཤེས་རབ་དགའ་ཚལ་སློབ་གླིང་གི་བསླབ་པ་མཐར་སོན་པའི་ཕྱག་འཁྱེར་བཞེས་མཁན་སློབ་ཕྲུག་ཕོ་མོ་ཡོངས་དང་། སློབ་གྲྭའི་འགན་འཛིན་དང་སློབ་སྤྱི། དེ་བཞིན་དགེ་ལས་ཚང་མར་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། ཁྱེད་རྣམ་པ་ཁག་གཅིག་དེ་རིང་སློབ་གྲྭ་ཐོན་འགྲོ་གི་ཡོད་པ་རེད། ང་ཚོ་བོད་པའི་གཏམ་དཔེར། བཏབ་སར་སྨིན་ཟེར་བ་ཞིག་ཡོད། དམིགས་ཡུལ་གང་གི་ཆེད་དུ་བྱ་བ་འགོ་རྩོམ་པ་དེ་མཐར་ཕྱིན་པ་འགྲོ་རྒྱུ་གལ་ཆེན་པོ་རེད། མཁས་པ་ཞིག་ཡིན་ན་བྱ་བ་བརྩམ་ཚེ་མཐར་ཕྱིན་བྱེད་རྒྱུ་མཁས་པའི་འགྲོ་སྟངས་ཡིན་ཟེར་གྱི་ཡོད། ཁྱེད་ཚོས་སློབ་ཚན་གང་དང་གང་ལ་སློབ་སྦྱོང་བྱས་པ་དང་མཐར་བསྐྱལ་བ་དེ་ཡག་པོ་རེད། ཕྱི་ལོ་ ༢༠༠༡ ལོར་ངོས་ལ་བཀའ་ཁྲིའི་ལས་འགན་བབས་ཏེ་རྡ་སར་སླེབས་པ་རེད། དེ་ནས་སྡེ་ཚན་ཚང་མར་འགྱོད་བཤགས་ཞུ་རྒྱུ་དང་། ཆབས་ཅིག་ཤེས་རབ་དགའ་ཚལ་སློབ་གླིང་འདི་གལ་ཆེན་པོ་ཞིག་མཐོང་སོང་སྐབས་དེ་དུས་སློབ་མ་མང་པོ་ཡོད་པ་དང་དེའི་ནང་བོད་ནས་སློབ་སྦྱོང་གང་ཙམ་གནང་ཚར་བ་ཤེས་ཡོན་ཅན་དེ་འདྲ་མང་པོ་འདུག དེ་འདྲ་ཡིན་དུས་ང་རང་ཡང་ཡང་བཅར་ཐུབ་ན་ཡག་པོ་བསམས་ཏེ་དེ་དུས་ངོས་ནས་ཡོང་གི་ཞུས་པ་ཡིན། ངོས་ནས་ལོ་ཉི་ཤུ་རྩ་གཅིག་ནས་དགེ་རྒན་བྱེད་རྒྱུ་འགོ་བཙུགས་ནས་གཞི་རིམ་དང་མཐོ་རིམ་སློབ་གྲྭའི་དགེ་རྒན་གྱི་ལོ་བཞི་བཅུ་ལྷག་བྱས་པ་ཡིན་དུས་དགེ་རྒན་གོམས་གཤིས་ཡོད་པའི་མི་དེ་དགེ་ཕྲུག་ཡོད་སར་འགྲོ་རྒྱུ་དང་སློབ་གསོའི་བྱ་བ་བྱེད་རྒྱུར་དོ་དབྱིངས་དང་དགའ་ཚོར་ཡོད། དེར་བརྟེན་འདིར་ཡང་ཡང་ཡོང་ཐུབ་ན་སློབ་ཚན་མང་པོའི་ཐོག་ལ་བགྲོ་གླེང་དང་དྲི་བ་དྲིས་ལན་བསམ་ཚུལ་བརྗེ་ལེན་བྱེད་རྒྱུའི་གོ་སྐབས་ཡོང་གི་རེད་བསམས་ཏེ་ཡང་ཡང་བཅར་ཐུབ་རྒྱུའི་རེ་བ་ཡོད་ཞུ་རྒྱུ་བྱུང་། འོན་ཀྱང་བཀའ་ཁྲིའི་ལས་འཁུར་གདེང་ཚུགས་ཡོང་དུས་སློབ་གྲྭ་ཁག་ཏུ་འགྲོ་རྒྱུའི་གོས་སྐབས་རག་གི་མི་འདུག་ཅེས་སོགས་དང་། ཤེས་རབ་དགའ་ཚལ་སློབ་གླིང་ནང་ཡོད་པའི་སློབ་ཕྲུག་ཚང་མས་དམིགས་ཡུལ་གཙོ་བོ་འཛིན་རྒྱུ་དེ་བོད་ཀྱི་སྐད་ཡིག་ཡར་རྒྱས་གཏོང་རྒྱུ་དང་གནས་ཚད་ལོན་པ་ཞིག་བཟོ་རྒྱུར་འབད་བརྩོན་གནང་ན་ཡག་པོ་ཡོད་རེད་བསམ་གྱི་འདུག དེ་མིན་སྐད་ཡིག་གཞན་ཕྱིན་པ་ཡིན་ཕུན་སུམ་ཚོགས་པའི་ཡན་
བཀའ་ཁྲི་མཆོག་གིས་མཐར་ཕྱིན་སློབ་མ་རྣམས་ལ་ཕྱག་འཁྱེར་གནང་བཞིན་པ།
ལག་རེད། རྒྱུན་གཏན་སློབ་སྦྱོང་ཟེར་བ་དེ་རང་གི་ཆོས་རབ་ཏུ་འབྱེད་པའི་རྣམ་དཔྱོད་ཀྱི་ཤེས་རབ་ཡར་རྒྱས་འགྲོ་རྒྱུར་དམིགས་དགོས་པ་མ་གཏོགས་འཚོ་ཐབས་ཀྱི་དོན་ཡིན་བསམ་དམིགས་རྒྱུ་མེད། དེ་འདྲ་དམིགས་པ་ཡིན་ན་ཤེས་ཡོན་སློབ་སྦྱོང་བྱེད་རྒྱུའི་ཀུན་སློང་ནོར་སོང་བ་རེད། འཚོ་ཐབས་འཚོལ་རྒྱུར་ཀ་ན་གཅིག་མི་ཤེས་མཁན་ཚོས་ཀྱང་འཚོལ་ཐུབ་ཀྱི་ཡོད། གྲོད་ཁོག་གཅིག་དེ་ལག་པ་གཉིས་ཀྱི་གསོ་མི་ཐུབ་པ་མེད། དུད་འགྲོ་ཚོས་ཀྱང་གསོས་ཏེ་འགྲོ་གི་ཡོད། དེར་བརྟེན་ཤེས་ཡོན་སློབ་སྦྱོང་་གི་དམིགས་ཡུལ་དེ་རང་གི་ནང་གི་རྣམ་དཔྱོད་ཀྱི་ནུས་པ་གོང་མཐོར་གཏོང་རྒྱུ་དང་། བླང་དོར་འབྱེད་པའི་ཤེས་རབ་ཐོབ་རྒྱུའི་ཆེད་དུ་ཡིན། དེ་དང་ཆབས་ཅིག་ཏུ་རང་གི་མི་རིགས་ཀྱི་ཆོས་དང་། རིག་གཞུང་། ལེགས་བྱང་། ཡུལ་གོམས། གཤིས་ལུགས་སོགས་སྲུང་སྐྱོབ་བྱེད་རྒྱུའི་ཆེད་དུ་དམིགས་ཡུལ་བཟུང་བ་ཡིན་ན་སློབ་སྦྱོང་བྱེད་རྒྱུའི་ཀུན་སློང་ཚད་ལྡན་དུ་གྱུར་བ་རེད། དེ་མིན་ལས་ཀ་ག་རེ་རག་གི་རེད་བསམ་ན་འགྲོ་སྟངས་ཁག་ཁག་ཡིན་པས་སྡེ་ཚན་འདི་ཚོའི་ནང་བསྡད་ན་སློབ་སྦྱོང་་གི་ཕན་ཐོགས་མེད། སློབ་ཐོན་པ་ཚང་མར་ཁྱེད་རང་ཚོའི་མི་ཚེའིེ་འདུན་ལམ་བཟང་པོ་ཞིག་གི་ཐོག་འགྲོ་ཐུབ་རྒྱུའི་སྨོན་ལམ་ཡོད། ཞེས་སོགས་གསུང་བཤད་གྲུབ་རྗེས་སློབ་གྲྭའི་སློབ་སྤྱི་ཚེ་གྲུབ་རྡོ་རྗེ་ལགས་ནས་ཐུགས་རྗེ་ཆེ་ཞུས་རྗེས་མཛད་སྒོ་གྲོལ་བ་བཅས་སོ།།
