བསོད་ནམས་ཚེ་རིང་ལགས།
༢༠༡༠ ཟླ་ ༡༡ ཚེས་ ༢༠ རེས་གཟའ་སྤེན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་ཟེར་བས་འདི་ལོའི་ཕྱི་ཟླ་ ༥ ནང་ཙམ་དུ་སྐྱེས་ཡུལ་ཁམས་སྡེ་དགེ་དཔལ་ཡུལ་རྫོང་ཁོངས་ནས་ཡིན་པའི་ན་གཞོན་བསོད་ནམས་ཚེ་རིང་ལ་ཕྱི་ལོ་ ༢༠༠༨ ལོའི་ཟླ་ ༣ ཚེས་ ༡༤ ཉིན་གྱི་ཞི་རྒོལ་ནང་གཙོ་བོའི་སྣེ་ཁྲིད་ཀྱི་ནུས་པ་བཏོན་ཡོད་པ་སོགས་ཀྱི་ཉེས་མིང་བཀལ་ཏེ་ལོ་གཉིས་ནར་འགྱངས་ཀྱིས་སྲོག་ཐོག་གཏོང་རྒྱུའི་ཁྲིམས་ཐག་བཅད་ཡོད་པ་མ་ཟད། ཁོང་གི་ཕ་མ་གཅིག་པའི་སྤུན་མཆེད་ཚེ་དབང་འགྱུར་མེད་ལ་དུས་བཀག་བཙོན་འཇུག་ལོ་ ༥ དང་། དེ་བཞིན་དཔལ་ཡུལ་ནས་ཡིན་པ་བཀྲིས་ཆོས་སྒྲོན་ལ་དུས་བཀག་བཙོན་འཇུག་ལོ་ ༧། སྨར་ཁམས་ནས་ཡིན་པ་སྒྲོལ་དབྱངས་ལ་དུས་བཀག་བཙོན་འཇུག་ལོ་ ༤། ཀོང་པོ་ནས་ཡིན་པ་ག་གཡང་ངམ་སྐལ་དབྱངས་ལ་དུས་བཀག་བཙོན་འཇུག་ལོ་ ༧། ལྷ་ས་ནས་ཡིན་པ་ཨ་ནེ་ཡེ་ཤེས་མཚོ་མོར་དུས་བཀག་བཙོན་འཇུག་ལོ་ ༥།
བཀྲིས་ཆོས་སྒྲོན།
ལྷ་ས་ནས་ཡིན་པ་བཀྲ་དབྱངས་ལ་དུས་བཀག་བཙོན་འཇུག་ལོ་ ༥། ལྷ་ས་ནས་ཡིན་པ་སྒོ་རའི་ཙུའུ་ཀྲང་པ་སངས་ཚེ་རིང་ལ་དུས་བཀག་བཙོན་འཇུག་ལོ་ ༡ བཅས་ཁྱོན་བསོད་ནམས་ཚེ་རིང་དང་འབྲེལ་བ་ཡོད་པའི་བོད་མི་བདུན་ཙམ་ལ་ཕྱི་ལོ་ ༢༠༠༨ ལོའི་ཞི་རྒོལ་བྱུང་རྗེས་འཛིན་བཟུང་མ་བྱས་པར་ ༢༠༠༩ ཟླ་ ༡༠ བར་གབ་གཡོལ་བྱེད་རིང་འགེབས་སྲུང་བྱས་པའི་ཉེས་མིང་འོག་ཁྲིམས་ཆད་བཏང་བ་ཞིག་ཡིན་པ་དང་། ལྷག་པར་པ་སངས་ཚེ་རིང་ནི་རྒྱུན་གཏན་སྒོ་རའི་ཙུའུ་ཀྲང་གི་འགན་འཁུར་གྱི་ཡོད་སྟབས་རྩིས་སྤྲོད་མ་བྱས་པའི་ཉེས་མིང་འོག་དུས་བཀག་བཙོན་འཇུག་བཟོས་པ་ཞིག་ཡིན་འདུག་ཅིང་། བསོད་ནམས་ཚེ་རིང་ལགས་ཕྱི་ལོ་ ༢༠༠༨ ལོའི་ཟླ་ ༣ པའི་ཞི་རྒོལ་ནང་ཞུགས་རྗེས་ལྷ་ས་གྲོང་ཁྱེར་སྤྱི་བདེ་ཚན་པས་འཛིན་བཟུང་བརྡ་ཁྱབ་ཤུགས་ཆེ་སྤེལ་ཏེ་རྩིས་སྤྲོད་བྱེད་མཁན་ལ་དངུལ་གྱི་བྱ་དགའ་ཁྱོན་ཆེ་སྤྲོད་རྒྱུའི་ཁྱབ་བསྒྲགས་བྱས་ཡོད་ནའང་ཕྱི་ལོ་ ༢༠༠༩ ཟླ་ ༡༠ པ་བར་འཛིན་བཟུང་བྱེད་ཐུབ་མེད་པར་བོད་མི་ལྷག་བསམ་ཅན་སོགས་
ཚེ་དབང་འགྱུར་མེད།
ཀྱི་རྒྱབ་སྐྱོར་འོག་ལྷ་སའི་ནང་གབ་གཡོལ་བྱ་ཐུབ་ཡོད་ཀྱང་། ཕྱི་ལོ་ ༢༠༠༩ ཟླ་ ༡༠ པའི་ནང་གློ་བུར་འཛིན་བཟུང་བྱས་པའི་གནས་ཚུལ་ཐོན་ཡོད་པ་དང་། འཛིན་བཟུང་བྱས་ཏེ་ལོ་གཉིས་ནར་འགྱངས་ཀྱིས་སྲོག་ཐོག་གཏོང་རྒྱུའི་ཐག་གཅོད་བྱས་རྗེས་ད་ལྟའི་ཆར་ལྷ་སའི་བཙོན་ཁང་གང་ཞིག་ནང་དུའང་བསྒྱུར་བཀོད་བྱེད་བཞིན་ཡོད་པའམ་ད་ལྟ་འཚོ་གནས་ཡོད་མེད་ཀྱི་གནས་སྟངས་སོགས་གང་ཡང་གོ་རྒྱུ་མེད་པར་གྱུར་ཡོད་པ་བཅས།།
