༢༠༡༠ ཟླ་ ༡༠ ཚེས་ ༣༠ རེས་གཟའ་སྤེན་པ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཕྲུག་ཁྱིམ་སྡེའི་དབུས་སྤྱི་ཁྱབ་ལས་ཁུངས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༠ ཟླ་ ༡༠ ཚེས་ ༣༠ ཉིན་རྡ་ས་བོད་ཕྲུག་ཁྱིམ་སྡེ་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་ཆེན་མཛད་སྒོར་ཆིབས་སྒྱུར་བཀའ་དྲིན་བསྐྱངས་ཡོད། དེ་ཡང་སྔ་དྲོ་ཆུ་ཚོད་ ༩ ཐོག་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་དྲུང་ཆེ་ཆུང་རྣམ་པ་དང་། བོད་ཁྱིམ་སློབ་གྲྭར་དུས་ཡུན་རིང་པོར་རྒྱབ་སྐྱོར་གནང་མཁན་རོགས་ཚོགས་ཁག་གི་སྐུ་ཚབ་དང་སྦྱིན་བདག་རྣམ་པ། རྒྱ་གར་གྱི་གནད་ཡོད་སྐུ་མགྲོན་རྣམ་པ། བོད་ཁྱིམ་ཡན་ལག་ཁག་གི་དབུས་སློབ་གྲྭ་ཁག་གི་སློབ་སྤྱི་འགན་འཛིན་རྣམ་པ། གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་རྣམ་པ། ཕྱི་རྒྱལ་དང་རྒྱ་བལ་འབྲུག་གསུམ་གྱི་བོད་ཁྱིམ་སློབ་ཟུར་རྣམ་པ། བོད་ཁྱིམ་ཡན་ལག་ཁག་གི་སློབ་ཕྲུག་རྣམ་པ། རྡ་ས་ཁུལ་དང་ས་ཕྱོགས་ཁག་གི་སེར་སྐྱ་མི་མང་བཅས་ཁྱོན་མི་གྲངས་ ༥༠༠༠ བརྒལ་བ་ལྷན་འཛོམས་བྱུང་བའི་ཐོག་བོད་ཁྱིམ་སྤྱི་ཁྱབ་ལས་ཟུར་རྣམ་པ་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་རྩེད་ཐང་གི་ཡང་སྟེང་དུ་སྤོས་སྣེས་སྔོན་བསུ་སྟེ་གདན་འདྲེན་ཞུས་གྲུབ་བསྟུན་རྩེད་ཐང་དུ་སློབ་ཕྲུག་རྣམས་ནས་རུ་སྒྲིག་གིས་གུས་འདུད་དང་འབྲེལ་ལྔ་བཅུའི་དྲན་གླུ་ཞེས་པའི་བཀའ་དྲིན་རྗེས་དྲན་གྱི་བསྟོད་དབྱངས་ཕུལ་རྗེས་ཚང་མ་སྐུ་བཞེངས་ཐོག་འཕགས་བོད་གཉིས་ཀྱི་རྒྱལ་གླུ་བཏང་། དེ་རྗེས་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས་ནས་བོད་ཁྱིམ་གྱི་ལས་བསྡོམས་སྙན་སྒྲོན་ཞུས། དེ་ནས་བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་བཀའ་ཤག་གི་གསུང་བཤད་དང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་གནང།

དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་སྩལ་དོན། དེ་རིང་འདིར་དུས་དྲན་ཐོག་ཆེད་འཛོམས་གནང་མཁན་ཆོས་གྲོགས་རྣམས་པ་ཚང་མར་ཞུ་རྒྱུར། ལོ་ལྔ་བཅུ་འཁོར་བའི་དུས་སྟོན་གྱི་མཛད་སྒོ་གཟབ་རྒྱས་ཤིག་གནང་བ་རེད། གལ་ཆེ་ཤོས་འདས་པའི་ལོ་ཡུན་དེའི་རིང་སྒྲིག་འཛུགས་འདི་ནས་བོད་བསྟན་སྲིད་སྤྱིའི་ཞབས་འདེགས་ངེས་ཅན་ཞིག་བསྒྲུབས་ཐུབ་ཡོད། དེར་བརྟེན་ཁྱེད་རང་ཚོར་ཐུགས་རྗེ་ཆེ་ཟེར་རྒྱུ་ཡིན། དེ་བཞིན་དེ་སྔ་དཀའ་ལས་བརྒྱབ་སྟེ་ད་ཆ་མི་ཚེ་རྫོགས་ནས་དྲན་པའི་ཡུལ་ཙམ་ལ་མ་གཏོགས་མེད་མཁན་ཚོའི་ཆེད་དུ་སྨོན་ལམ་རྒྱག་རྒྱུ་དང་རྗེས་དྲན་བྱེད་དགོས་པ་ཞིག་ཡིན། དེ་རིང་འདིར་བོད་ཁྱིམ་ལ་ལོ་མང་ནས་དོ་སྣང་དང་ཤ་ཚ་རྒྱབ་སྐྱོར་གནང་མཁན་ཁྱེད་རང་ཚོ་ཡུལ་ཁག་འདྲ་མིན་ནས་ཕེབས་པའི་སྐུ་མགྲོན་རྣམ་པ་ཚོ་ང་ཚོས་འདི་གར་དུས་དྲན་བྱས་ནས་ལོ་ལྔ་བཅུ་འགྲོ་གི་ཡོད། ཁྱེད་རང་ཚོ་རོགས་རམ་བྱེད་མཁན་ཚོ་ཡང་རྒད་པོ་རྒད་མོ་ཆགས་ཡོད། གང་ལྟར་བོད་པའི་གྲོགས་པོ་གྲོགས་མོ་བློ་ཐུབ་ཆགས་ཡོད་པས་ཁྱེད་རྣམས་ལ་དམིགས་བསལ་འཚམས་འདྲི་དང་ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་ལས་བསྡོམས་ནང་ཞིབ་ཚགས་པོ་ཡོད་པ་ལྟར་ཧ་ཅང་ཡག་པོ་བྱུང་འདུག ཡིན་ཡང་ང་རང་ཚོའི་ལས་ཀ་མང་པོ་ཞིག་ལ་འགོ་སྟོད་ཚགས་ཚུད་པོ་ཡོད་པ་གང་ཞིག་ལོ་མང་པོ་སོང་བའི་རྗེས་སུ་འཆར་ཅན་ཐོག་ཕྱིན་ཏེ་ཕྲན་བུ་འཐུས་ཤོར་འགྲོ་རྒྱུ་དེ་འདྲ་ཡོང་སྲིད་པ་རེད། དེ་ཚོའི་གྲས་ལ་དམིགས་བསལ་གཟབ་གཟབ་བྱེད་དགོས། ངོས་ཀྱིས་སྒྲིག་འཛུགས་ཡོད་པ་ཚང་མར་བརྗོད་བཞིན་ཡོད། དུས་རྒྱུན་གཏན་ནས་ང་རང་ཚོའི་ཡག་ས་དང་སྟོད་ར་གཏོང་ཡུལ་དེ་དག་མི་གཞན་ལ་གཏོང་དུ་བཅུག ང་རང་ཚོ་ནང་ཁུལ་ལ་སྐྱོན་ཆ་དང་འཐུས་ཤོར་འགྲོ་བའི་ཉེན་ཁ་ག་པར་འདུག དེ་དག་གི་ཐོག་ལ་བསམ་བློ་གཏོང་རྒྱུ་དེ་གལ་ཆེན་པོ་རེད་སྙམ་སྟེ་རྟག་པར་འབོད་སྐུལ་བྱེད་ཀྱི་ཡོད། དེར་བརྟེན་འཐུས་ཤོར་འགྲོ་ས་དེ་དག་ལ་ཞིབ་ཚགས་བལྟས་ཏེ་ཁ་ཐུག་ཁ་ཐུག་ལ་འབྲེལ་ཡོད་སོ་སོར་དེ་དག་ངོ་སྤྲོད་བྱས་ཏེ་འདི་འཐུས་ཤོར་འགྲོ་གི་འདུག་པས་གཟབ་གཟབ་བྱེད་དགོས་ཀྱི་འདུག་ཅེས་འབོད་སྐུལ་བྱེད་རྒྱུ་གལ་ཆེན་པོ་རེད། དཔེར་ན། ད་ལྟ་ལས་བསྡོམས་ནང་བཤད་སོང་ལ་ཉེ་ཆར་རྡ་ཤོད་བོད་ཁྱིམ་སློབ་གྲྭའི་ནང་ཟས་དུག ལྟ་བུ་བྱུང་སྟེ་མ་གིར་འཚུབ་པོ་འདུག་ཅེས་ངོས་ལ་ཐུགས་དམ་གསར་པ་ཞིག་འབྱོར་བྱུང་། ངོས་ཀྱིས་ཡིག་ཚང་ལ་བརྗོད་རྒྱུ་བྱུང་། དེ་འཚུབ་མ་འཚུབ་ཀྱི་སྐད་ཆ་མ་རེད། སོ་སོས་ལས་ཀ་ཚགས་ཚུད་མ་བྱས་པར་འཐུས་ཤོར་བཏང་སྟེ་དེ་བར་ཆད་རེད་ཅེས་བརྗོད་ན་ནོར་འཁྲུལ་རེད། དེར་ཞབས་བརྟན་བྱས་ནས་ཕན་ཐོགས་མེད། དཔེར་ན། ང་ཚོ་བོད་ཀྱི་ལུང་པ་སྤྱིའི་གནས་ཚུལ་l ཆ་བཞག་ན། ང་ཚོའི་མི་ཐོག་གོང་མ་ཚོས་མ་འཇོན་པར་དངོས་ཡོད་གནས་ཚུལ་དེ་དག་ལ་དོ་སྣང་མ་བྱས་པར་ཞབས་བརྟན་ལྟ་བུ་སྒྲུབ་ནས་བསྡད་དེ་སོ་སོས་མ་བྱས་པ་བརྟེན་ནས་སྐྱོན་ཆ་བྱུང་བ་རེད་མ་གཏོགས་དེ་བར་ཆད་བྱུང་ནས་ཡོང་བ་ཞིག་མིན། དེར་བརྟེན་ཁ་སྔོན་ཁྱེད་རང་ཚོར་སྐྱོན་ཆ་བྱུང་བ་དེ་ཚོའི་གྲས་ནམ་རྒྱུན་ནས་ཁ་ལག་གི་རྒྱུ་ཆ་དང་ཐབ་ཚང་ནང་གི་གཙང་སྦྲ་སོགས་གང་ཅིའི་ཐད་ལ་དོ་སྣང་བྱས་ཏེ་ཚགས་ཚུད་པོ་བྱས་ཡོད་ན་དེ་འདྲ་ཡོང་གི་མ་རེད། ཚགས་མ་ཚུད་པ་བྱས་པའི་རྐྱེན་གྱིས་སྐྱོན་ཆ་བྱུང་བ་རེད། དེར་འཚུབ་པོ་འདུག་ཅེས་བརྗོད་ན་ནོར་འཁྲུལ་རེད། དེ་ནི་ལག་པ་ཕྱི་རྒྱུའི་སྐད་ཆ་རེད། ང་ཚོ་བོད་པའི་ལུགས་སྲོལ་ལ་འཐུས་ཤོར་སོ་སོས་བཏང་ཡང་གཞན་ཞིག་གིས་གཅིག་བྱས་སོང་མདོག་མདོག་ཤོད་རྒྱུ་དེ་ཡག་པོ་མི་འདུག ཡིན་གཅིག་མིན་གཅིག་སྐྱོན་ཆ་དང་འཐུས་ཤོར་མ་འགྲོ་བའི་ཆེད་གཟབ་གཟབ་བྱེད་རྒྱུ་ཧ་ཅང་གལ་ཆེན་པོ་ཡིན། འདི་གཅིག་བརྗོད་འདོད་བྱུང། དེ་རིང་འདིར་བཀའ་བློན་ཁྲི་ཚབ་ཆོས་དོན་བཀའ་བློན་མཆོག་གིས་དངོས་གནས་བསམ་པ་རྣམ་དག་འགན་ཁུར་ཡོད་པའི་གསུང་བཤད་གནང་སོང། དེ་ལས་ལྷག་པ་ངོས་ལ་ཤོད་རྒྱུ་གང་ཡང་མེད། གང་ལྟར་དེ་རིང་ཁྱེད་རང་གིས་འདི་ཤོད་སྐབས་ངོས་ནས་འདི་དྲན་བྱུང། དངོས་གནས་ང་ཚོ་མང་གཙོའི་ཐོག་བསྐྱོད་ནས་ངོས་ཀྱི་གནས་སྟངས་དེ་རྒས་ཡོལ་རྗེས་མཐུན་པའི་སྟེང་འགྲོ་བཞིན་ཡོད། ད་ཆ་རིམ་པས་རྒས་ཡོལ་སྟེང་འགྲོ་རྒྱུའི་མཚམས་ལ་བསླེབས་ཡོད། དེར་བརྟེན་འདིར་ཁྱེད་རང་ཚོ་འགན་འཁྱེར་མཁན་ཚོས་དངོས་གནས་བསམ་པ་རྣམ་དག་གིས་འགན་འཁྱེར་ཏེ་དུས་རྒྱུན་དུ་འགན་ཁུར་ཡོད་པར་བརྟེན་གནད་དོན་ཚང་མ་མགོ་ཚོས་ཀྱི་ཡོད། ནམ་རྒྱུན་འགན་ཁུར་མེད་ན་དེ་ཙམ་ཧ་གོ་རྒྱུ་ཁག་པོ་རེད། དེར་བརྟེན་ཡག་པོ་ཞེ་དྲག་བྱུང་འདུག་པས་ངོས་རང་ཧ་ཅང་དགའ་པོ་བྱུང། དངོས་གནས་འགན་ཁུར་བླངས་པའི་རྟགས་མཚན་གསལ་པོ་རེད་བསམ་པའི་ཧ་ཅང་དགའ་པོ་བྱུང་། དེ་ལས་ལྷག་པ་ངོས་ལ་ཤོད་རྒྱུ་གང་ཡང་མེད། བཤད་ནས་ཕན་ཐོགས་གང་ཡང་མི་འདུག ལོ་དེ་དག་རིང་ལ་སྐད་ཆ་མང་པོ་བཤད་ཡོད། བཤད་པ་དེ་དག་ཡིག་རྙོག་ལྟ་བུ་བྱས་ཏེ་བསྡད་ན་དགོས་པ་མི་འདུག དེར་བརྟེན་ང་ཚོ་མི་རེ་རེས་རང་ཉིད་བོད་པ་ཡིན་བསམ་པའི་འདུ་ཤེས་འཛིན་པའི་ཐོག་བོད་སྤྱི་པའི་འགན་ཞིག་འཁྱེར་དགོས། གཞིས་ལུས་རྒྱ་ཆེའི་མི་མང་དེ་དག་དཀའ་ངལ་དེ་འདྲ་ཞིག་གི་འོག་ནས་རང་དབང་ལུང་པར་ཡོད་མཁན་ཚོར་རེ་བ་ཞིག་གཏོད་ཀྱི་ཡོད། རེ་བ་གཏོད་སའི་ཡུལ་ཞིག་ཆགས་ཡོད་སྟབས་དེ་ཡིན་བསམ་པའི་ཐོག་ནས་ཚང་མས་འགན་ཁུར་ལེན་དགོས། ཚིག་སྐམ་པོ་རེ་བཤད་ན་ཕན་ཐོགས་གང་ཡང་མི་འདུག དོན་ངོ་མའི་ཐོག་ནས་སྤྱི་སེམས་དང་སྤྱི་འཁུར་བླངས་ཏེ་གཟབ་གཟབ་བྱེད་རོགས་བྱེད་ཅེས་ཟེར་རྒྱུ་ཡིན། དེ་བཞིན་ཚོགས་གཙོ་གཞོན་པས་གསུང་བཤད་གནང་བ་དེ་དག་ཞེ་དྲག་ཡག་པོ་བྱུང་སོང་། ཁྱེད་རང་ཚོའི་དེ་སེམས་ནང་འཇོག་དགོས། ཁོང་ཚོའི་གསུང་བཤད་ནང་མ་ཐོན་པ་ཞིག་ངོས་རང་ནས་གཅིག་བཤད་འདོད་བྱུང། ཁྱེད་རང་ཚོ་ཚང་མས་ཤེས་ཀྱི་རེད། ངོས་རང་ནང་པའི་ཆོས་པ་ཞིག་ཡིན་པའི་ཆ་ནས་ཞོགས་པ་གཉིད་བསད་པ་དང་སེམས་ཅན་ཐམས་ཅད་ཅེས་སྨོན་ལམ་བརྒྱབ་ཀྱི་ཡོད། སེམས་ཅན་ཐམས་ཆད་ཟེར་རྒྱུ་དེ་འཛམ་གླིང་གང་གཱའི་རླུང་གི་བྱེ་མ་ཉིད་ཀྱི་འཛམ་གླིང་ཡོད་པ་དེ་དག་ནི་ཐག་རིང་པོ་ཞེ་དྲག་རེད་སྨོན་ལམ་རྒྱག་རྒྱུ་ཙམ་མ་གཏོགས་བྱེད་རྒྱུ་གང་ཡང་མེད། འཛམ་གླིང་འདིའི་སྟེང་ང་ཚོ་དངོས་དང་བརྒྱུད་པའི་ཐོག་ནས་འབྲེལ་བ་ཆགས་ཡོད། དེ་འདྲ་ཡིན་དུས་འཛམ་གླིང་འདིའི་སྟེང་བདེ་བ་སྡུག་བསྔལ་ཟེར་རྒྱུ་དེ་འཛམ་གླིང་གི་མི་ཚང་མར་འབྲེལ་བ་ཡོད་པ་ཞིག་ཆགས་ཡོད། དེ་འདྲའི་འདུ་ཤེས་ཀྱི་ཐོག་ནས་འཛམ་གླིང་འདིའི་སྟེང་གི་བདེ་བ་སྡུག་བསྔལ་གྱི་ཐོག་ལ་སོ་སོའི་ལྷག་བསམ་འཁྱེར་བའི་ཐོག་ནས་བསམ་འཆར་ལྟ་བུ་བཤད་བྱེད་ཀྱི་ཡོད། གང་ལྟར་འཛམ་གླིང་སྤྱིའི་བདེ་སྐྱིད་ཡོང་རྒྱུའི་རྩ་བར་ནང་སེམས་ཀྱི་བྱམས་བརྩེ་ཞེས་པ་དེ་གལ་ཆེན་པོ་འདུག་ཅེས་ནམ་རྒྱུན་དུ་ནས་ཤོད་ཀྱི་ཡོད། དེ་བཞིན་ཆོས་ལུགས་མཐུན་སྒྲིལ་གྱི་སྐོར་ལ་ཤོད་ཀྱི་ཡོད། དེ་གཉིས་པོའི་ཐོག་ལ་ངོས་ཀྱིས་སེམས་འཁུར་གཙོ་བོ་འཁྱེར་གྱི་ཡོད། འདས་པའི་ལོ་སྟོང་ཕྲག་གསུམ་བཞིའི་དུས་ཡིན་དེར་ཕྱིར་མིག་ཅིག་བལྟས་ན་ལོ་སྟོང་ཕྲག་གསུམ་བཞིའི་རིང་ལ་འཛམ་གླིང་གང་སར་དཀའ་ངལ་འཕྲད་སྐབས་རང་ཉིད་ཀྱི་དཀའ་ངལ་དེ་སེལ་རྒྱུའི་ནུས་པའི་རེ་བ་བསྡད་ཡོད་སྟབས། དད་པ་བྱས་ཏེ་སོ་སོའི་སྐྱབས་གནས་ལ་ཡིད་ཆེས་བྱས་ཏེ་དེར་གསོལ་བ་སྨོན་ལམ་བཏབ་ནས་དེའི་སྡུག་བསྔལ་སེལ་གྱི་རེད་བསམ་སྟེ་སྡོད་ཀྱི་ཡོད། འདས་པའི་ལོ་ཉིས་བརྒྱ་ཙམ་ནས་ཚན་རིག་དང་འཕྲུལ་ཆས་གཞི་ནས་རིག་གནས་གསར་པ་ཞིག་རྙེད། དེ་དག་གི་ཐོག་ནས་དེ་སྔ་ལོ་སྟོང་ཕྲག་རིང་ལ་སྨོན་ལམ་བརྒྱབ་ནས་སྡོད་རྒྱུའི་དོན་དག་མང་པོ་ཞིག་ཚན་རིག་དང་འཕྲུལ་ཆས་ཀྱི་ཐོག་ནས་ད་ལྟ་ད་ལྟ་གྲུབ་འབྲས་མཐོང་རྒྱུ་ཡོད་པ་ཞིག་བྱུང་ཡོད། དེར་བརྟེན་འདས་པའི་ལོ་ཉིས་བརྒྱ་རིང་ལ་མི་ཚོས་གཞི་ནས་དངོས་པོ་ཡར་རྒྱས་དང་དེའི་ཐོག་ལ་ཡིད་འཕྲོག་ནས་དེ་གའི་སྟེང་ཤུགས་བརྒྱབ་ཏེ་ཕྱིན་ཡོད། ཡང་འདས་པའི་དུས་རབས་ ༢༠ པའི་སྨད་ཙམ་ནས་གཞི་ནས་དངོས་པོ་ཡར་རྒྱས་རྐྱང་པར་ཡིད་ཆེས་བྱས་ནས་བསྡད་ན་དེས་སེམས་ལ་བདེ་སྐྱིད་སྤྲོད་ཐུབ་ཀྱི་མེད་པ། དངོས་པོ་ཡར་རྒྱས་ཇི་ཙམ་ཕྱིན་པར་དེའི་ཚོད་ཀྱི་འདོད་སྲེད་ཆེ་རུ་ཕྱིན་པའི་ཐོག་ནས་གཡོ་སྒྱུ་དང་རྫུན། དེ་བཞིན་མ་རབས་ཀྱི་སྤྱོད་པ་བྱེད་རྒྱུ་མང་དུ་ཕྱིན། དཔལ་འབྱོར་གྱི་མཐུན་རྐྱེན་ཧ་ཅང་ཡག་པོ་ཡོད་མཁན་ཚོ་ཡང་སེམས་མ་སྐྱིད་པ་ཡོད་པའི་ཉམས་མྱོང་དེ་དངོས་སུ་ཡོང་གི་ཆགས་ཡོད་པས། གཞི་ནས་འདས་པའི་ལོ་ཉིས་བརྒྱའི་རིང་ལ་ཕྱི་དངོས་པོའི་ཡར་རྒྱས་ལ་བློ་རྩེ་གཅིག་ཏུ་གཏད་ནས་སྡོད་རྒྱུ་དེ་རིམ་པས་བློ་རྩེ་ནང་དུ་གཏད་ནས་མིའི་སེམས་ཀྱི་བདེ་སྐྱིད་དེ་སེམས་ཀྱི་ནང་ནས་སྒྲུབ་དགོས་རྒྱུའི་དོ་སྣང་གསར་པ་ཞིག་བསླེབས་ཡོད། གཉིས་ནས་ཚན་རིག་གི་ཐོག་ནས་ཡིན་ནའང་མིའི་ཀླད་པའི་རྫས་དང་བསམ་བློ་གཉིས་པོ་ཞེ་དྲག་གི་འབྲེལ་བ་ཡོད་པ་དང། དེའི་ཐོག་ནས་མིའི་ལུས་པོའི་འཕྲོད་བསྟེན་ཡང་སེམས་ཀྱི་ཞི་བདེ་བག་ཕེབས་ཡོད་མེད་ཀྱི་ཐོག་ནས་འབྲེལ་བ་ཤུགས་ཆེན་པོ་ཡོད་པ་ཞིག་གཞི་ནས་མཐོང་ཡོང་སྐབས་ནང་སེམས་ཀྱི་ཡར་རྒྱས་གཏོང་རྒྱུ་དང་ཞི་བདེ་ཡོང་རྒྱུར་དོ་སྣང་གསར་པ་ཞིག་བྱེད་ཀྱི་ཡོད། འདས་པའི་ལོ་སུམ་ཅུ་ལྷག་ཙམ་རིང་ལ་ཚན་རིག་པ་དང་ལྷན་ང་ཚོ་ཐུག་སྟེ་རྒྱ་གར་གྱི་གནའ་རབས་ཀྱི་གཞུང་ནང་སེམས་ཀྱི་རྣམ་གཞག་དེ་ཞིབ་ཚགས་པོ་དང་རྒྱས་པོ་ཞེ་དྲག་ཡོད། དེ་དག་གི་ཐོག་ནས་ཚན་རིག་པའི་མཉམ་དངོས་པོའི་གནས་ཚུལ་དེ་དག་ཚན་རིག་པས་ང་ཚོར་ཚུར་སློབ་སྦྱོང་བྱེད་རྒྱུ་དང་ནང་སེམས་ཀྱི་རྟོགས་པ་དང་འབྲེལ་བའི་རྣམ་གཞག་དེ་དག་སྤྱིར་ཤར་ཕྱོགས་རྒྱ་གར་གྱི་གནའ་རབས་ཀྱི་ལོ་རྒྱུས་ནང་ཡོད་པ་ཞིག་རེད། རྒྱ་གར་གྱི་ཆོས་བརྒྱུད་ནང་བསམ་གཏན་ཞི་གནས་སྒོམ་རྒྱུ་ཡོད། བསམ་གཏན་སྒོམ་རྒྱུའི་ཆོས་ལུགས་དེའི་ནང་སེམས་ཀྱི་བྱམས་པ་དང། ཤེས་བཞིན། རྩེ་གཅིག་པའི་ཏིང་ངེ་འཛིན་ཟེར་བ་དེ་ཚོའི་གྲས་ཏེ་བསླབ་ཡོང་སྐབས་སེམས་ཀྱི་རྣམ་གཞག་དེར་འགྲེལ་བཤད་མང་པོ་ཡོང་གི་ཡོད། དེའི་ནང་ཚན་ནས་སངས་རྒྱས་པའི་ཆོས་ཀྱི་ནང་སེམས་ཀྱི་རྣམ་གཞག་ཞེ་དྲག་ཐོན་གྱི་ཡོད། དེར་བརྟེན་ངོས་ཀྱིས་སེམས་ཀྱི་རྣམ་གཞག་དང་རྡུལ་ཕྲ་རགས་ཀྱི་རྣམ་གཞག ནང་པའི་བསྟན་བཅོས་ནང་ཡོད་པ་དེ་དག་ནང་པའི་ཚན་རིག་རེད་ཅེས་ལོགས་སུ་དབྱེ་བ་ཕྱེ། དེ་བཞིན་ནང་པའི་གཞུང་ནང་ཡོད་པའི་ལྟ་གྲུབ་སྐོར་དེ་དག་ཀྱང་ལྟ་གྲུབ་ཅེས་ལོགས་སུ་དབྱེ་བ་ཕྱེ། དེ་ནས་ནང་པའི་ཆོས་ཞེས་ལོགས་སུ་དབྱེ་བ་ཕྱེ་སྟེ་ནང་པའི་ཆོས་ཞེས་བརྗོད་ན། ནང་པ་བྱེད་མཁན་ཚོར་འབྲེལ་བ་ཡོད། ནང་པ་མིན་མཁན་ལ་འབྲེལ་བ་མེད། ནང་པའི་མདོ་བསྟན་བཅོས་ཁག་ནས་ཐོན་པའི་སེམས་ཀྱི་རྣམ་གཞག་དང་གཅིག དེ་དང་འབྲེལ་བའི་ལྟ་གྲུབ་ཀྱི་རྣམ་གཞག་དེ་དག་འཛམ་གླིང་སྤྱི་ལ་འབྲེལ་བ་ཡོད་པ་ཞིག་དང་ཤེས་ཡོན་གྱི་སྡེ་ཚན་ནང་ཡོང་རྒྱུ་ཞིག་རེད། དེར་བརྟེན་སངས་རྒྱས་པའི་གཞུང་ནས་ཐོན་པའི་སེམས་ཀྱི་རྣམ་གཞག་དེ་དག་སངས་རྒྱས་པའི་ཚན་རིག་གི་སྡེ་ཚན་ནང་བཞག་སྟེ་ཚན་རིག་པ་དང་མཉམ་དུ་འབྲེལ་བ་བྱས་པ་དེ་འདྲ་རེད། དེ་འདྲ་བྱས་ནས་ལོ་གང་ཙམ་ཕྱིན་པའི་རྗེས་གཞི་ནས་ཕྱོགས་གཅིག་ནས་འཛམ་གླིང་ཁོ་རང་དངོས་ཡོད་ཀྱི་ཉམས་མྱོང་གི་ཐོག་ནས་དངོས་པོ་རྐྱང་པའི་ཡར་རྒྱས་ལ་མཐའ་ཡོད་པ་དང་ཚད་ཅན་ཡིན་པའི་ཉམས་མྱོང་ཞིག་བསགས། དེ་འདྲ་ཞིག་ནས་ནང་སེམས་ཀྱི་ཞི་བདེ་གལ་ཆེན་ཡིན་པ་དངོས་འཛིན་གསར་པ་ཞིག་ཐུབ་པའི་ཁ་ཐུག་ལ་སེམས་ཀྱི་རྣམ་གཞག་འགྲེལ་བཤད་ཞིབ་ཚགས་པོ་ཡོད་པའི་རྒྱ་གར་གྱི་རིག་གནས་སྤྱི་དང་ལྷག་པར་སངས་རྒྱས་པའི་གཞུང་ནང་ལ་དེ་འདྲ་ཡོད་པ་མཐོང་ཡོང་སྐབས་དེ་ལ་དམིགས་བསལ་གྱི་དོ་སྣང་གསར་པ་ཞིག་བསླེབས་ཏེ། འདས་པའི་ལོ་ཕལ་ཆེར་བཅུ་གྲངས་ཤིག་གི་ནང་ལ་གཞི་ནས་ཚན་རིག་པ་སྙན་གྲགས་ཡོད་པ་དེ་འདྲས་་དངོས་སུ་སེམས་ཀྱི་སྦྱོང་བརྡར་བྱེད་སྟངས་སྐོར་ལ་དོ་སྣང་གསར་པ་ཞིག་བསླེབས། དྲན་པ་ཉེར་གཞག་སྒོམ་རྒྱུ་ལྟ་བུ་དེ་དང་དེས་མཚོན་པའི་བྱམས་བརྩེ་དམིགས་བསལ་གྱི་སྒོམ་རྒྱུ་ལྟ་བུ། དེ་འདྲ་ཞིག་ལ་ཉམས་ཞིབ་བྱས་ཡོང་སྐབས་ར་སྤྲོད་པོ་ཞིག་དང་བྱམས་བརྩེའི་སྦྱོང་བརྡར་བདུན་ཕྲག་ཁ་ཤས་ཤིག་སྤྲད་ན། མི་དེའི་བསམ་བློ་གཏོང་སྟངས་དེ་ལྷོད་དུ་འགྲོ་གི་ཡོད་པ། སེམས་གུ་དོག་པོ་དེ་སངས་འགྲོ་གི་ཡོད་པ། རང་ཉིད་ཀྱི་སེམས་གུ་དོག་པོ་དེ་སངས་ཡོང་སྐབས་མི་གཞན་དག་ལ་འབྲེལ་བ་བྱེད་རྒྱུ་དེ་ཡང་གུ་ཡངས་སུ་ཕྱིན་ཏེ། དཀའ་ངལ་མ་འཕྲད་པའི་ཁྱད་པར་ཆེན་པོ་འདུག་ཅེས་ཤོད་ཀྱི་འདུག གཉིས་ནས་སེམས་ཀྱི་སྦྱོང་བརྡར་ཐོག་ནས་ཀླད་པའི་རྫས་ལ་འགྱུར་བ་འགྲོ་གི་ཡོད་པ་དེ་གནས་ཚུལ་གསར་པ་ཞིག་ཤེས་པ་རེད། སྔ་མོ་ཡིན་ན་ཀླད་པའི་འགྲོ་སྟངས་གཏན་འབེབས་ཡོད་པ་དེ་མ་གཏོགས་ཞེ་དྲག་གི་འགྱུར་བ་འགྲོ་རྒྱུ་མེད་པའི་མཐོང་ཚུལ་དེ་འགྱུར་ཏེ་སེམས་ཀྱི་སྦྱོང་བརྡར་བྱས་ན་ཀླད་པའི་རྫས་ཁ་ཤས་འགྱུར་བ་འགྲོ་གི་ཡོད་པརབརྟེན་ཀླད་པའི་རྫས་ལ་སེམས་ཀྱི་རྣམ་རྟོག་གི་ཕར་དབང་སྒྱུར་བྱེད་ཀྱི་ཡོད་པ་ཞིག་གཞི་ནས་མཐོང་ཚུལ་གསར་པ་ཞིག་ཡོང་གི་འདུག ཉེ་ཆར་ངོས་རང་ཨ་རི་ནས་རྡ་སར་བསླེབས་ཙམ་ཡིན། ཨ་རིར་བདུན་ཕྲག་གཉིས་ཙམ་གྱི་རིང་ལ་གཙུག་ལག་སློབ་གྲྭ་ཨི་མོ་རི་གཙུག་ལག་སློབ་ཁང་ (Emory University) དང་གཅིག ས་ཊན་ཕོཌ་གཙུག་ལག་སློབ་གྲྭའི་ (Stanford University) ཞེས་པ་དེ་དང་གཉིས། ཁ་སྔོན་ངོས་རང་ཨ་རིར་འགྲོ་སྐབས་ཝི་སི་ཀོན་སིན་ (Wisconsin University) ཞེས་དེ་དག་ལ་གང་ལྟར་བར་སྐབས་ཚན་རིག་པ་ཚོས་སེམས་ཀྱི་སྦྱོང་བརྡར་ཐོག་ལ་བརྟག་དཔྱད་བྱས་པའི་གྲུབ་འབྲས་དེ་དག་འགྲེལ་བཤད་བརྒྱབ་ཡོང་གི་འདུག ཧ་ལས་པའི་ཞེ་དྲག་ཡག་པོ་བྱུང་འདུག ཐ་ན་ཨ་རིའི་མངའ་སྡེ་ཝི་སི་ཀོན་སིན་ནང་ཕལ་ཆེར་(Public School) མི་མང་གི་སློབ་གྲྭ་བརྒྱ་ནས་ཉིས་བརྒྱའི་བར་ཞིག་ལ་ཁ་སྔོན་ཟླ་བ་དགུ་པ་ནས་སློབ་གྲྭའི་འཛིན་ཁང་ནང་ལ་སེམས་ཀྱི་སྦྱོང་བརྡར་བྱེད་རྒྱུ་དེ་འདྲ་མངའ་སྡེ་ཡོངས་རྫོགས་ལ་དེ་འདྲ་ཞིག་གཏན་འབེབས་བྱས་ནས་ལག་ལེན་བསྟར་གྱི་འདུག དེ་ཚོའི་གྲས་འདས་པའི་ལོ་ཡུན་དེའི་རིང་ལ་ཚན་རིག་པ་དང་ལྷན་དུ་འབྲེལ་བ་བྱས་ཏེ་ཚན་རིག་པ་ཚོས་ཚུར་དོ་སྣང་གསར་པ་བྱེད་རྒྱུ་ཞིག་ཆགས། དོ་སྣང་དེ་ཡང་ཁྱད་མཚར་མཚར་གྱི་ཐོག་ནས་དོ་སྣང་བྱས་པ་མ་ཡིན་པར། ཕན་ཐོགས་ཡོད་པ་ཞིག་དང་དེ་ནས་ཚུར་གནད་འགག་བསླབ་རྒྱུ་ཡོད་པ་ཞིག་བརྩིས་ཏེ་དེ་དག་ལ་ཉམས་ཞིབ་བྱས་པའི་མཐའ་མ་དེ་ངོ་ཐོག་ལ་ཕན་ཐོགས་ཡོད་པའི་གྲུབ་འབྲས་ཡོད་པ་ཞིག་མཐོང་ཡོང་སྐབས། གོང་དུ་བརྗོད་པ་ལྟར་ཝི་སི་ཀོན་སིན་མངའ་སྡེའི་ནང་དེ་འདྲ་ཞིག་གཏན་འབེབས་བྱེད་རྒྱུ་ཞིག་བྱུང་ཡོད། དེར་བརྟེན་བོད་གངས་ཅན་གྱི་ལྗོངས་ལ་སྔར་མཁན་སློབ་ཆོས་གསུམ་གྱི་སྐབས་ནས་བཟུང་སྟེ་དཔལ་ནཱ་ལེནྡྲའི་ཆོས་བརྒྱུད་རྒྱ་ཆེ་བ་གཏིང་ཟབ་པ་དེ་འདྲ་ཞིག་བོད་ལ་དར་སྤེལ་གནང་སྟེ་དེ་འདྲ་ཞིག་དུས་ད་ལྟ་བར་དུ་ང་ཚོས་ཟིན་ནས་བསྡད་ཡོད། དེས་འཛམ་གླིང་སྤྱི་ལ་གང་ལ་གང་འཚམས་ཀྱི་ཞབས་འདེགས་སྒྲུབ་ཐུབ་རྒྱུའི་གནས་ཚུལ་ཞིག་ཡོང་གི་ཡོད། ཕར་ཕྱོགས་དེར་རྒྱ་མི་གུང་ཁྲན་གྱིས་འགོ་སྟོད་ཚན་རིག་གི་ཤེས་ཚད་ཡར་རྒྱས་ཕྱིན་ན། ཆོས་ཀྱི་རྨོངས་དད་རང་བཞིན་ཡལ་འགྲོ་གི་རེད་ཅེས་ཟེར་རྒྱུ་དེ་ལྡོག་ཕྱོགས་ལྟ་བུ་ཆགས་ཡོད། ཚན་རིག་པས་གཞི་ནས་སངས་རྒྱས་པའི་ཆོས་སྤྱི་དང་ལྷག་པར་བོད་ཀྱི་སངས་རྒྱས་པའི་ཆོས་ཀྱི་ནང་ནས་གནས་ཚུལ་དང་ལེགས་བཤད་ལེན་རྒྱུའི་གནས་ཚུལ་ཞིག་ཆགས་ཡོད། དེ་བཞིན་ཆོས་ལུགས་མཐུན་སྒྲིལ་སྐོར་ལ་ཆ་བཞག་ནའང་། ཧ་ལམ་འདས་པའི་ལོ་བཞི་བཅུ་ལྷག་ཙམ་གྱི་རིང་ལུང་པ་ག་པར་བསླེབས་པ་ཡིན་ཡང་ཆོས་བརྒྱུད་མི་འདྲའི་མི་སྣ་དེ་དག་ཐུག་སྟེ་ག་དུས་ཡིན་ཡང་འཆར་ཅན་བྱས་ཏེ་ཐུག་རྒྱུའི་གོ་སྐབས་ཤིག་ཡོང་གི་ཡོད། ཚང་མས་དགའ་པོ་བྱེད་རྒྱུའི་ཕན་ཐོགས་གང་ཙམ་བྱུང་བ་ལྟ་བུ་ཞིག་ཡིན། དེར་བརྟེན་འདས་པའི་ལོ་དེ་དག་རིང་ལ་ང་ཚོ་བོད་པའི་ཆོས་དང་རིག་གཞུང་གི་ཐོག་ནས་ང་ཚོས་བོད་མི་རང་ཉིད་ཀྱིས་བདག་པོ་རྒྱག་རྒྱུའི་གནས་ཚུལ་ཙམ་མ་ཡིན་པར་འཛམ་གླིང་སྤྱི་ལ་ང་ཚོའི་ཆོས་དང་རིག་གཞུང་ཐོག་ནས་འགྲོ་བ་མི་སྤྱི་ལ་ཞབས་འདེགས་སྒྲུབ་རྒྱུ། དེ་བཞིན་ཁོར་ཡུག་ཐོག་ཞབས་འདེགས་སྒྲུབ་རྒྱུ་གང་ཙམ་བྱེད་རྒྱུའི་ནུས་པ་ཞིག་ཡོད། ནུས་པ་ཡོད་པ་དེ་ཡང་གོ་སྐབས་ཤིག་བཙལ་ཏེ་གོ་སྐབས་དེ་གང་ཙམ་ཐོན་ཡོད་པ་ལྟ་བུ་ཞིག་རེད། དེ་ཡང་ངོས་རང་གི་ལས་བསྡོམས་སྙན་ཞུ་ལྟ་བུ་ཞིག་ཁྱེད་རང་ཚོ་ཕྲུ་གུ་ཚོར་རྐང་ཟེར་རྒྱུ་ཞིག་ཡིན། དེར་བརྟེན་ང་རང་ཚོས་ནམ་རྒྱུན་བོད་ཀྱི་ཆོས་དང་རིག་གཞུང་ཞེས་བརྗོད་སྐབས་རིག་གཅིག་གིས་ང་ཚོས་གཞས་ཞབས་བྲོ་འཁྲབ་རྒྱུ་དེ་དག་གཙོ་བོ་ཡིན་པ་ལྟ་བུ་ངོས་འཛིན་བྱེད་ཀྱི་འདུག དེ་དག་གལ་ཆེན་པོ་རེད། འོན་ཀྱང་ང་ཚོའི་བོད་ཀྱི་ཆོས་དང་རིག་གཞུང་གི་ཞག་ཚི་ངོ་མ་ཡོད་ས་དེ་སངས་རྒྱས་པའི་ལྟ་གྲུབ་དེ་རེད། སངས་རྒྱས་ཀྱི་ལྟ་གྲུབ་ཅེས་བརྗོད་ཡོང་དུས་དེ་འདྲའི་སངས་རྒྱས་པའི་ལྟ་གྲུབ་འཛིན་སྐྱོང་སྤེལ་གསུམ་བྱེད་རྒྱུ་དེ་སྔ་མོ་ཡིན་ན་རབ་བྱུང་གི་སྡེས་གཙོ་བོ་བྱེད་རྒྱུ་ལྟ་བུ་ཞིག་ཡིན། ང་ཚོ་དུས་རབས་གསར་པ་འདིའི་ནང་སེར་སྐྱ་ཡོངས་རྫོགས་ཀྱིས་ཤེས་ཡོན་སྦྱོང་བརྡར་བྱས་ནས་ཡར་རྒྱས་གཏོང་རྒྱུའི་དུས་ཚོད་ཅིག་སླེབ་ཡོད་སྟབས། སངས་རྒྱས་པའི་ཆོས་འདྲེས་པའི་ལྟ་གྲུབ་ཀྱི་རིག་གཞུང་དེ་ཡང་སེར་སྐྱ་དབྱེར་མེད་ཐོག་ནས་དོ་སྣང་དང་སློབ་སྦྱོང་བྱེད་དགོས་པ་ཞིག་ཡིན། དེར་བརྟེན་ང་ཚོའི་སློབ་གྲྭ་ཁག་ནང་སྐབས་རེ་ཆོས་དགེས་ཆོས་བསླབ་ཅེས་བརྗོད་དུས་འདོན་པ་འདོན་རྒྱུ་ཞིག་བསླབས་ཏེ་ཚིག་འགྲེལ་ཏོག་ཙམ་བརྒྱབ། དེ་འདྲ་བྱས་ནས་འགྲོ་རྒྱུ་དེས་འདང་གི་མེད། སངས་རྒྱས་པའི་ཆོས་ཀྱི་སྒྲོམ་གཞི་གང་འདྲ་ཡིན་པ། གཙོ་བོ་སངས་རྒྱས་པའི་ཆོས་དེ་སེམས་འདུལ་ཐབས་བྱས་ནས་སེམས་མ་འདུལ་བ་འདུལ་བ་བྱེད་རྒྱུ་དང་མ་ཞི་བ་ཞི་བར་བྱེད་རྒྱུ་ཞིག་ཡིན། སེམས་མ་འདུལ་བ་འདུལ་བ་བྱེད་རྒྱུ་དང་མ་ཞི་བ་ཞི་བར་བྱེད་རྒྱུ་ཟེར་བ་དེ་ཡང་སེམས་ཁོང་རང་གི་ཐོག་ནས་བློ་གྲོས་དང་ཡིད་ཆེས། མཐོང་ཚུལ་གསར་པ་ཞིག་སླེབ་སྟེ་བསྒྱུར་བཅོས་གཏོང་རྒྱུ་རེད་མ་གཏོགས་སྨོན་ལམ་བརྒྱབ། དད་པ་སྒོམ་པ་གཅིག་པུས་བསྒྱུར་བཅོས་གཏོང་ཐུབ་རྒྱུ་ཁག་པོ་ཡིན། དེར་བརྟེན་སློབ་གྲྭའི་ནང་སངས་རྒྱས་པའི་ཆོས་ཀྱི་སྒྲོམ་གཞི་གང་འདྲ་ཡིན་པ་དང་དོན་དག་སངས་རྒྱས་པའི་ཆོས་ཀྱི་འགྲོ་སྟངས་གང་འདྲ་ཡིན་པ་དེ་ངོ་སྤྲོད་དང་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཡིན། ཆོས་བྱས་དང་མ་བྱས་སོ་སོའི་འདོད་པ་ཡིན། དེ་གནས་ཚུལ་ཁག་ཁག་རེད། དེར་བརྟེན་སློབ་འཁྲིད་བྱེད་རྒྱུ་དེ་ཧ་ཅང་གལ་ཆེན་པོ་ཡིན། སློབ་འཁྲིད་བྱས་པའི་ཁ་ཐུག་ལ་གནས་ཚུལ་གང་དང་གང་ཡིན་ཡང་གནས་ཚུལ་བདར་ཤ་གཅོད་རྒྱུའི་གལ་ཆེ་ཤོས་དེ་རིགས་ལམ་རེད་འདུག་པས་སློབ་གྲྭ་ཁག་ནང་རིགས་ལམ་བསླབ་རྒྱུ་དེ་གལ་ཆེན་པོ་འདུག་ཅེས་བརྗོད་རྒྱུ་དེ་གནད་འགག་དེ་ལ་ཐུག་ཡོད། འདི་དེ་རིང་ཁྱེད་རང་ཚོར་ཁོང་རྣམ་པ་གཉིས་ཀྱི་གསུང་བཤད་ནང་མ་ཐོན་པ་ཞིག་ངོས་ཀྱིས་བཤད་ན་མ་གཏོགས་འགྲིག་གི་མ་རེད། དེ་མིན་གྱི་གནས་ཚུལ་གཞན་དག་ད་ལྟ་ཆོས་དོན་བཀའ་བློན་གྱིས་གསུངས་པ་དེ་ལས་ལྷག་པ་ཞིག་ངོས་ལ་ཤོད་རྒྱུ་ཚིག་གཅིག་མེེད། ཁྱེད་རང་ཚོ་ཚང་མས་ཧུར་ཐག་བྱེད་རོགས་ཞེས་བརྗོད་རྒྱུ་ཡིན། བཀྲིས་ལེགས་བདེ་ཐུགས་རྗེ་ཆེ་ཞེས་བཀའ་སློབ་ཟབ་རྒྱས་སྩལ་ཡོད།

དེ་རྗེས་ངོ་ལོ་ལྔ་བཅུའི་བཀའ་དྲིན་རྗེས་དྲན་མཚོན་སླད་བོད་ཁྱིམ་སྤྱི་ཡོངས་ཀྱི་རྒན་བདག་བློ་གྲོས་རྒྱལ་མཚན་དང་སྐལ་བཟང་སྒྲོལ་དཀར་གཉིས་ནས་༸གོང་ས་མཆོག་དང་ཨ་མ་རྗེ་བཙུན་པདྨ། བོད་ཕྲུག་ཁྱིམ་སྡེ་བཅས་ལ་ཆེ་བསྟོད་ཀྱི་ཡིག་བྱང་ཕུལ་མཚམས་༸གོང་ས་མཆོག་གིས་བོད་ཁྱིམ་ནང་དུས་ཡུན་རིང་པོ་ནས་རྒྱབ་སྐྱོར་གནང་མཁན་སྦྱིན་བདག་རྣམས་ལ་དྲན་རྟེན་ཕྱག་རྟགས་དང་བོད་དོན་སྐོར་སྐྱོད་པ་ལྷག་པ་ཚེ་རིང་ལགས་སུ་མཇལ་ཁ་སྩལ་གྲུབ་བསྟུན་བོད་ཁྱིམ་སློབ་ཟུར་ནས་ལྔ་བཅུའི་དུས་དྲན་གྱི་གཟེངས་རྟགས་ཞེས་པ་ཞིག་ཁྲིམས་ཞིབ་པ་ཆེ་བ་མཆོག་གིས་བོད་ཁྱིམ་ནང་ལྷག་བསམ་གཡོ་མེད་ཀྱི་ཐོག་ནས་དུས་ཡུན་རིང་ཤོས་ཞབས་འདེགས་སྒྲུབ་མཁན་རྒན་ལེགས་བཤད་བསྟན་པ་ལགས་དང་། སྤྱི་ཚོགས་ཞབས་ཞུ་བ་གཟེངས་ཐོན་ཞུ་མཁན་ཅན་ལྡི་གྷར་ཡོད་པའི་ཚེ་རིང་སྒྲོལ་དཀར་ལགས་སུ་གནང་། དེ་རྗེས་ཞབས་ལོ་ཉི་ཤུ་འཁོར་བའི་ལས་བྱེད་རྣམས་ལ་གཟེངས་བསྟོད་གནང་གྲུབ་བསྟུན་ཕྱི་ལོ་ ༢༠༡༠ བོད་ཁྱིམ་སྤྱི་ཡོངས་སློབ་གྲྭ་ཁག་གི་འཛིན་རིམ་ལྔ་པ་དང་བརྒྱད་པ། དེ་བཞིན་རྒྱལ་ཡོངས་འཛིན་རིམ་བཅུ་པ་དང་བཅུ་གཉིས་ཀྱི་ཡིག་རྒྱུགས་གྲུབ་འབྲས་རྩེར་སོན་རྣམས་ལ་བྱ་དགའ་ལེགས་སྐྱེས་དང་ཤེས་རིག་ལས་ཁུངས་ཀྱིས་ཤེས་སྤྱོད་འཕྲོད་གསུམ་ལྡན་པའི་སློབ་མ་གཉིས་ལ་གཟེངས་བསྟོད་ཕྱག་འཁྱེར་བྱ་དགའ་བཅས་གནང། དེ་ནས་སློབ་ཕྲུག་རྣམས་ནས་མཉམ་གཞས་མཁྱེན་པའི་ཡེ་ཤེས་སོགས་གཞས་སྣ་ཁག་དང་སློབ་གྲྭ་ཆེ་འབྲིང་ཆུང་གསུམ་ནས་ལུས་རྩལ་མཉེད་སྦྱོང་སོགས་རྩེད་ཐང་དུ་གཟིགས་འབུལ་ཞུས་རྗེས་རྡ་སྟེང་བོད་ཁྱིམ་འགན་འཛིན་ཚེ་རིང་ཕུན་ཚོགས་ལགས་ནས་ཐུགས་རྗེ་ཆེ་ཞུས་ཏེ་མཛད་སྒོ་དངོས་གཞི་གྲོལ་བ་བཅས་སོ།།