དཔར་ལེན་རྫོགས་སངས།
༢༠༡༠ ཟླ་ ༡༠ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༢ ཉིན་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོང་ཁྱེར་མ་ཡ་མི་ནས་ཁེ་ཎ་ཌར་ཆིབས་སྒྱུར་བསྐྱངས་ཏེ་ཉིན་དེའི་སྔ་དྲོ་ཁེ་ཎ་ཌའི་གྲོང་ཁྱེར་ཊོ་རོན་ཊོའི་གནམ་ཐང་དུ་༸ཞབས་སོར་འཁོད་སྐབས་ཁེ་ཎ་ཌའི་གྲོང་ཁྱེར་སྤྱི་ཁྱབ་པ་སྐུ་ཞབས་ཌེ་ཝིཌ་མིལ་ལར་མཆོག་དང་བཀའ་ཟུར་བློ་བཟང་ཉི་མ་མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དཔར་ལེན་རྫོགས་སངས།
དེ་རྗེས་མགོན་པོ་གང་ཉིད་མཆོག་ཊོ་རོན་ཊོའི་གཙུག་ལག་སློབ་གྲྭའི་ཚན་རིག་གི་ཚོགས་འདུ་ཞིག་ལ་ཆིབས་སྒྱུར་སྐྱོང་སྐབས་ཊོ་རོན་ཊོའི་གཙུག་ལག་སློབ་གྲྭའི་འགན་འཛིན་སྐུ་ཞབས་ཌེ་ཝིཌ་ཨར་པི་ཊར་སན་མཆོག་དང་བཀའ་ཁྲི་ཟམ་གདོང་རིན་པོ་ཆེ་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ནས་ཕེབས་བསུ་གཟབ་རྒྱས་ཞུས་ཡོད། དེ་ཡང་མགོན་པོ་གང་ཉིད་མཆོག་གཙུག་ལག་སློབ་གྲྭའི་ཚོོགས་ཁང་དུ་ཚན་རིག་གི་ཚོགས་མགོན་དུ་༸ཞབས་སོར་འཁོད་མཚམས།
དཔར་ལེན་རྫོགས་སངས།
ཐོག་མར་གཙུག་ལག་སློབ་གྲྭའི་འགན་འཛིན་མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཊོ་རོན་ཊོའི་གཙུག་ལག་སློབ་གྲྭར་ཆིབས་སྒྱུར་བསྐྱངས་པར་གཙུག་ལག་སློབ་གྲྭའི་དགེ་ལས་སློབ་ཕྲུག་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་སོགས་ཀྱི་ཕེབས་བསུའི་གསུང་བཤད་གནང་གྲུབ་བསྟུན། ཚན་རིག་གི་ཚོགས་འདུ་དབུ་འཛུགས་གནང། ཚོགས་འདུའི་སྐབས་གཏམ་བཤད་གནང་མཁན་གཙོ་བོ་ཚན་རིག་པ་བཞི་ཡོད་པ་རྣམས་ནི། ཊོ་རོན་ཊོ་གཙུག་ལག་སློབ་གྲྭའི་སེམས་ཁམས་རིག་པའི་སློབ་དཔོན་ལྕམ་སྐུ་ལོ་ར་ཨན་པེ་ཊི་ཊོ་ལགས་ (Laura Ann Petitto) དང་། ཊོ་རོན་ཊོ་གཙུག་ལག་སློབ་གྲྭའི་སེམས་ཁམས་རིག་པའི་ཕྱག་སྦྲེལ་གྱི་གཙུག་ལག་སློབ་དཔོན་སྐུ་ཞབས་ཨེ་ཌམ་ཨེན་ཌར་སན་ (Adam Anderson) ལགས། ཊོ་རོན་ཊོ་གཙུག་ལག་སློབ་གྲྭའི་སེམས་ནད་བཅོས་ཐབས་པ་དང་སེམས་ཁམས་རིག་པ་བ་སྐུ་ཞབས་ཛིན་ཌེལ་སེ་གྷལ་ (Zindal Segal) ལགས། ཊོ་རོན་ཊོ་གཙུག་ལག་སློབ་གྲྭའི་སེམས་ནད་བཅོས་ཐབས་ཀྱི་སྡེ་ཚན་དང་ནང་ཆོས་སྡེ་ཚན། སེམས་ཁམས་རིག་པའི་སྡེ་ཚན་བཅས་ཀྱི་ཕྱགས་སྦྲེལ་གྱི་གཙུག་ལག་སློབ་དཔོན་སྐུ་ཞབས་ཊོ་ནི་ཊོ་ནེ་ཊོ་ (Toni Toneatto) བཅས་ཡིན་འདུག གོང་བརྗོད་གཙོ་སྐྱོང་བ་བཞིས་གཏམ་བཤད་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་འདུའི་གཏམ་བཤད་གནང་མཁན་བཞི་པོར་བསྔགས་བརྗོད་མཛད་པ་དང་སྦྲགས་བཀའ་སློབ་སྩལ་དོན།
དཔར་ལེན་རྫོགས་སངས།
གདོད་མའི་སྤྱི་ཚོགས་སྐབས་མི་རྣམས་རང་གི་འདོད་དོན་བསྒྲུབ་རྒྱུར་སྨོན་ལམ་རྒྱག་རྒྱུ་ཙམ་ཡིན། འདས་པའི་ལོ་ཉིས་བརྒྱའི་ནང་ཚན་རིག་ཡར་རྒྱས་ཕྱིན་པའི་ཐོག་ནས་མི་རྣམས་ཀྱིས་རང་གི་འདོད་དོན་དེ་དག་ཚན་རིག་གིས་སྒྲུབ་ཐུབ་ཀྱི་རེད་བསམ་པའི་རེ་བ་བཅོལ་ཡོད། འོན་ཀྱང་དུས་རབས་ ༢༠ པའི་མཇུག་ཏུ་ཚན་རིག་གི་ནུས་པ་དེ་ཚད་གཞི་ངེས་ཅན་ཞིག་ཡིན་པ་ར་འཕྲོད་བྱུང་སྟེ་ད་ཆ་ནང་སེམས་ཀྱི་ཚན་རིག་ལ་དོ་སྣང་སྤྲོད་འགོ་བཙུགས་ཡོད། འདས་པའི་དུས་སུ་ཚན་རིག་པ་ཚོས་ཕྱི་དངོས་པོའི་གནས་ལུགས་རྐྱང་པར་དོ་སྣང་སྤྲད་ཡོད། ད་ཆ་ཁོང་ཚོས་ནང་བསམ་བློར་ཡང་དོ་སྣང་སྤྲོད་འགོ་བཙུགས་པ་དེས་དེང་དུས་ཀྱི་ཚན་རིག་དེ་ཆ་ཚང་པོ་ཞིག་ཆགས་ཐུབ་ཡོད། ནང་བསམ་བློའི་ཚན་རིག་གི་ལམ་ནས་ལུས་སེམས་ཀྱི་འཕྲོད་བསྟེན་ཡར་རྒྱས་གཏོང་ཐུབ་པ་མ་ཟད། ནུབ་ཕྱོགས་ནས་དར་བའི་དེང་དུས་ཚན་རིག་དང་ཤར་ཕྱོགས་ནས་དར་བའི་ནང་བསམ་བློའི་རྣམ་གཞག་དེ་གཉིས་ཟུང་འབྲེལ་བྱུང་བ་དེས་འགྲོ་བ་མི་སྤྱི་ལ་ཕན་ཐོགས་རྒྱ་ཆེ་བ་སྒྲུབ་ཐུབ་སྐོར་སོགས་ཀྱི་བཀའ་སློབ་ཟབ་རྒྱས་སྩལ་ཡོད་པ་བཅས།
