༢༠༡༠ ཟླ་ ༡༠ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༠ ཉིན་ཨ་རིའི་སིན་སི་ནཱ་ཊིའི་ (Cincinnati) མངའ་སྡེའི་ནང་རྟེན་གཞི་བྱས་པའི་ (National Underground Railroad Freedom Center) ཞེས་པའི་ཞི་བའི་བསྟི་གནས་ཁང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་རང་དབང་གི་གཟེངས་རྟགས་ (International Freedom Conductor Award) ཞེས་པ་དེ་འབུལ་ལམ་ཞུས་ཡོད།
དེ་ཉིན་སྔ་དྲོ་མགོན་པོ་གང་ཉིད་མཆོག་ཨེ་ཊ་ལེན་ཊའི་བཞུགས་གནས་མགྲོན་ཁང་ནས་སིན་སི་ནཱ་ཊིར་ཆིབས་སྒྱུར་བསྐྱངས་ཏེ་སིན་སི་ནཱ་ཊིའི་གནམ་ཐང་དུ་༸ཞབས་སོར་འཁོད་སྐབས་ཞི་བའི་བསྟི་གནས་ཁང་དེའི་ཚོགས་གཙོ་སྐུ་ཞབས་ཌོ་ནལ་ཌི་མར་ཕེ་མཆོག་གིས་ཕེབས་བསུ་གཟབ་རྒྱས་ཞུས་ཡོད།
རྒྱལ་སྤྱིའི་རང་དབང་གཟེངས་རྟགས།
ཉིན་རྒྱབ་གཟེངས་རྟགས་ཀྱི་མཛད་སྒོ་དངོས་གཞི་ཚོགས་སྐབས་མཛད་སྒོའི་ཐོག་ཨ་རིའི་གྲོས་ཚོགས་འཐུས་མི་ལྕམ་སྐུ་ཇིན་མཆོག་(Jean) དང་སི་ཊི་ཕི་མཆོག་གི་གཙོས་གལ་ཆེའི་སྐུ་མགྲོན་མི་སྣ་ཁག་གཅིག་ཆེད་ཕེབས་གནང་ཡོད།
དེ་ཡང་ཚོགས་བཅར་བ་རྣམས་ཚོགས་ཁང་ནང་བཞུགས་གྲལ་དུ་འཁོད་མཚམས་ཡེ་ཤུའི་སློབ་དཔོན་སྐུ་ཞབས་ཌ་མོན་ལིན་ཆི་ (Rev. Damon Lynch) མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་རང་དབང་གི་གཟེང་རྟགས་དེའི་དངུལ་འཛིན་ཨ་སྒོར་སྟོང་ཕྲག་ ༢༥ འབུལ་ལམ་ཞུས་ཡོད་ཀྱང་མགོན་པོ་གང་ཉིད་མཆོག་གིས་དངུལ་དེ་ཞི་བའི་བསྟི་གནས་ཁང་ལ་གསོལ་རས་སྩལ།
དེ་རྗེས་༸གོང་ས་མཆོག་གིས་མཛད་སྒོ་དང་འབྲེལ་བའི་བཀའ་སློབ་སྩལ་དོན། ངོས་ལ་གཟེངས་རྟགས་འདི་འདྲ་ཞིག་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། གཟེངས་རྟགས་འདི་གཞན་དོན་དང་ལྷག་པར་མགོན་མེད་རྣམས་ལ་གཟིགས་རྟོགས་གནང་མཁན་གྱི་བསྟི་གནས་ཁང་ཞིག་ནས་གནང་བར་བརྟེན་དམིགས་བསལ་དགའ་ཚོར་ཆེན་པོ་བྱུང། ཚོགས་ཁང་དུ་མ་བཅར་སྔོན་ཙམ་དུ་བསྟི་གནས་ཁང་གི་འགྲེམས་སྟོན་ཚོགས་ཁང་དུ་བསྐྱོད་སྐབས་འཛམ་གླིང་གང་སར་ཚེ་གཡོག་དང་བུད་མེད་ལ་བརྙས་བཅོས་བཏང་བ། དེ་བཞིན་དཀའ་སྡུག་མྱོང་བའི་དཔར་རིགས་ཁག་གཅིག་མཐོང་དུས་ཡ་ང་བའི་འཚོར་སྣང་ཞིག་སྐྱེས་བྱུང། ངོས་རང་རྒྱུན་དུ་འཛམ་གླིང་ནང་མི་གྲངས་ཐེར་འབུམ་དྲུག་ཡོད་པའི་ནང་ནས་མི་གཅིག་ཡིན་བསམ་པ་དྲན་གྱི་ཡོད། རང་གི་བདེ་དོན་དེ་གཞན་ལ་རྟེན་ཡོད་པས་རང་དོན་གྱི་བསམ་པ་ཁོ་ནའི་ཐོག་ནས་བལྟས་ཀྱང་གཞན་དང་མཐུན་སྒྲིལ་བྱེད་དགོས་པ་ཆགས་ཡོད། དེར་བརྟེན་མི་གཞན་དང་མཐུན་སྒྲིལ་བྱེད་སྐབས་བཅོས་མིན་གྱི་ཡིད་ཆེས་དང་མཛའ་བརྩེའི་བསམ་པ་རྣམ་དག་ཅིག་དགོས། ཡིད་ཆེས་དེ་དངུལ་དང་དབང་ཆ། སྟོབས་ཤུགས། བཙན་དབང་བཏང་ནས་ཉོ་མི་ཐུབ། ཡིད་ཆེས་ཡོང་བར་གཞན་གྱི་བདེ་སྡུག་ལ་ཁ་ཞེ་གཉིས་མེད་ཀྱི་སེམས་ཁུར་ཡོད་པའི་རྣམ་པ་གསལ་སྟོན་གྱིས་ཏེ་གཞན་གྱི་ཐོབ་ཐང་ལ་བརྩི་བཀུར་བྱས་པ་དེས་ཡིད་ཆེས་བསླེབས་ཀྱི་ཡོད་སོགས་ཀྱི་བཀའ་སློབ་གྲུབ་བསྟུན་ཚོགས་བཅར་བས་རང་དབང་གི་གོ་དོན་དང་༸གོང་ས་མཆོག་བཙན་བྱོལ་དུ་སྐུ་འཚོ་བཞུགས་མཛད་སྐབས་རང་དབང་ལོངས་སུ་སྤྱོད་ཐུབ་ཡོད་མེད། སྐུ་ཞབས་ལིའུ་ཞའོ་པོ་ལ་ནོ་བེལ་ཞི་བདེའི་གཟེངས་རྟགས་ཕུལ་བར་རྒྱ་ནག་གཞུང་གི་བསམ་ཚུལ་ཐོག་༸གོང་ས་མཆོག་གི་དགོངས་ཚུལ་ཇི་ཡོད། ཁོང་ལ་ནོ་བེལ་ཞི་བདེའི་གཟེངས་རྟག་ཕུལ་བ་དེས་བོད་ཀྱི་གནད་དོན་ལ་ཕོག་ཐུག་འགྲོ་གི་ཡོད་མེད། ཆོས་སྲིད་གཉིས་ཐ་དད་འབྱེད་རྒྱུའི་སྐོར་དགོངས་ཚུལ། ཨ་རིའི་སྤྱི་ཚོགས་ཀྱི་དཀའ་ངལ་སེལ་ཆེད་༸གོང་ས་མཆོག་གི་ལེགས་བཤད་ཇི་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་སྟོབས་ཀྱི་འབྱུང་ཁུངས་ཇི་ཡིན་བཅས་ཀྱི་དྲི་བ་ཁག་གཅིག་ཕུལ་བར་མགོན་པོ་གང་ཉིད་མཆོག་གིས་ཐུགས་དགྱེས་འཚོར་ཆེན་པོས་བཀའ་ལན་སྩལ་གྲུབ་བསྟུན། ཉེ་འགྲམ་ཨོ་སི་ཕོཌ་གྲོང་ཁྱེར་དུ་ཆིབས་སྒྱུར་བསྐྱངས་ཏེ་མ་ཡཱ་མིའི་ (Miami University) གཙུག་ལག་སློབ་གྲྭའི་ནང་ཕྱི་ཚེས་ ༢༡ ཉིན་མང་ཚོགས་ལ་དེང་དུས་འཛམ་གླིང་ནང་གི་བཟང་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་སྩལ་གནང་མཛད་རྒྱུ་མ་ཟད། གཙུག་ལག་སློབ་གྲྭས་༸གོང་ས་མཆོག་ལ་ཕྱག་འཁྱེར་ཞིག་ཀྱང་འབུལ་ལམ་ཞུ་རྒྱུ་ཡིན་འདུག་པ་བཅས།།
