༢༠༡༠ ཟླ་ ༡༠ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་ཨ་རིའི་མངའ་སྡེ་ཁལ་ལི་ཕོར་ནི་ཡའི་མཚོ་འགྲམ་ས་ཁུལ་ (10 Bay Area Counties) དུ་གནས་སྡོད་ཨེ་ཤི་ཡའི་མི་རིགས་ས་ཡ་ ༡།༤ ཙམ་ལ་རྒྱང་སྲིང་ཞུ་རྒྱུའི་བརྙན་འཕྲིན་བརྒྱུད་ལམ་ (KTSF) ཞེས་པའི་ཆེད་དོན་དྲི་བར་བཀའ་ལན་སྩལ། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སཊྣ་ཕོཌ་གཙུག་ལག་སློབ་གྲྭའི་(Memorial Auditorium) དྲན་རྟེན་ཚོགས་ཁང་དུ། ཚན་རིག་གི་ལམ་ནས་བྱམས་བརྩེ་དང་གཞན་ཕན་གྱི་བློ་འཚོལ་བ། (Scientific Exploration of Compassion and Altruism) ཞེས་པའི་བརྗོད་གཞིའི་ཐོག་བགྲོ་གླེང་གི་ཚོགས་མགོན་དུ་ཆིབས་སྒྱིུར་བསྐྱངས། སྐབས་དེར་སཊྣ་ཕོཌ་བྱམས་བརྩེ་དང་གཞན་ཕན་གྱི་བསམ་བློ་ཉམས་ཞིབ་བསྟི་གནས་ཁང་ ( Centre for Compassion and Altruism Research and Education) གིས་གོ་སྒྲིག་འོག་ཉམས་ཞིབ་པ་གྲགས་ཅན་མང་པོས་མཉམ་བཞུགས་གནང་ཡོད།
སྐབས་དེར་བྱམས་བརྩེ་དང་གཞན་ཕན་གྱི་བསམ་བློ་སྐྱེ་རྒྱུར་ཀླད་ཁམས་དང་སྐྱེ་ལྡན་འཕེལ་རིམ་གྱི་རྨང་གཞི་གཙོ་བོ་ཇི་ཡིན་དང། ཉེན་ཁར་མ་འཛེམས་པར་གཞན་དོན་ཆེད་བྱ་བ་བརྩམ་གྱི་ཡོད། བསམ་བློ་དེར་བརྒྱུད་སྐུལ་གང་གིས་བྱེད་ཀྱི་ཡོད། གཞན་དོན་ཆེད་བྱ་བ་བརྩམ་རྒྱུའི་ནུས་པ་དེ་གང་འདྲ་སྐྱེ་གི་ཡོད། ཅེས་སོགས་ཀྱི་གནད་དོན་སྐོར་བགྲོ་གླེང་ཚོགས་ཡོད། བགྲོ་གླེང་ཚོགས་འདུ་དེ་ཚོགས་ཐེངས་བཞི་ཚོགས་ཡོད། དེ་ཡང་སྔ་དྲོ་ཚོགས་ཐེངས་གཉིས་དང། ཉིན་རྒྱབ་ཚོགས་ཐེངས་གཉིས་ཚུགས་ཡོད། བགྲོ་གླེང་དབུ་འཛུགས་མ་གནང་གོང་ (Stanford Institute for Neuroinnovation and Translational Neuroscience) ཞེས་པའི་ཀླད་ཁམས་ཚན་རིག་ཚན་པའི་འགན་འཛིན་སྐུ་ཞབས་སྒེ་རི་སཊྣ་བྷཱག་ལགས་ནས་ངོ་སྤྲོད་ཀྱི་གསུང་བཤད་གནང་བ་དང་སྦྲགས།
༸གོང་ས་མཆོག་གིས་ཚན་རིག་པ་དང་ལྷན་བགྲོ་གླེང་གི་ཚོགས་འདུར་ལྷན་ཞུགས་མཛད་པར་འཚམས་འདྲིའི་བཀྲ་ཤིས་བདེ་ལེགས་ཞུས་པ་མ་ཟད། ཁོང་རང་ཉིད་ནང་པ་ཞིག་མིན་ནའང་ནང་ཆོས་ནང་རྒྱུ་མཚན་དང་མངོན་སུམ་གྱི་མྱོང་བའི་ཐོག་ནས་གནད་དོན་འཚོལ་ཞིབ་བྱེད་རྒྱུར་བསྔགས་བརྗོད་ཞུ་གི་ཡོད་སྐོར་གསུངས། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ངོས་རང་སྐྱེས་དུས་འཛམ་གླིང་དམག་ཆེན་གཉིས་པ་འགོ་འཛུགས་གྲབས་བྱེད་ཀྱི་ཡོད། དམག་ཆེན་དེའི་སྐབས་ཧི་རོ་ཤི་མ་དང་ན་ག་ས་ཀིའི་ནང་རྡུལ་ཕྲན་མཚོན་ཆ་བེད་སྤྱོད་བཏང་ཡོད། རྡུལ་ཕྲན་གྱི་དངོས་ཁམས་རིག་པ་དེ་བཞིན་ཚན་རིག་གི་ཡར་རྒྱས་ཚད་མཐོན་པོ་སོན་པ་ཞིག་ཡིན། ཚན་རིག་ཡར་རྒྱས་ཀྱིས་མི་ཚེའི་ནང་ཤུགས་རྐྱེན་ཆེན་པོ་ཐེབས་མུས་ཡིན། ཨ་རིའི་ནང་ ༩་༡༡ གི་དོན་རྐྱེན་སྐབས་སུའང་ཚན་རིག་ཡར་རྒྱས་ཀྱི་འཕྲུལ་ཆས་གནམ་གྲུ་མཚོན་ཆར་བེད་སྤྱོད་བཏང་ཡོད་ཅེས་སོགས་བཀའ་སློབ་སྩལ། མཐར་མགོན་པོ་གང་ཉིད་མཆོག་གིས་བཀའ་སྩལ་དོན། ཚན་རིག་དང་འཕྲུལ་ཆས་ཡར་རྒྱས་ཀྱིས་བདེ་སྐྱིད་བསྐྲུན་པའི་ངེས་གཏན་གང་ཡང་མེད། དེར་བརྟེན་ཚན་རིག་པ་ཚོས་ནང་སེམས་ཀྱི་རྣམ་གཞག་ཐོག་དོ་སྣང་ཆེ་ཙམ་སྤྲོད་དགོས་སྐོར་བཀའ་སློབ་སྩལ། དེ་རྗེས་བགྲོ་གླེང་ཚོགས་ཐུན་དང་པོར། ཤེས་ཡོན་དང་སྤྱི་ཚོགས་རྒྱ་ཁྱབ་ཏུ་བྱམས་བརྩེའི་ལས་འགན། ཞེས་པའི་བརྗོད་གཞིའི་ཐོག་བགྲོ་གླེང་སྐབས་མི་སྒེར་གྱི་མི་ཚེ་དང་སྤྱི་ཚོགས་རྒྱ་ཁྱབ་ཀྱི་གནད་དོན་དཔེར་ན། སྤྱི་ཚོགས་འདྲ་མིན་གྱི་རིག་གཞུང་དང་མི་མང་ཕན་ཚུན་དབར་བསམ་ཤེས་བྱ་རྒྱུ་དང། མ་འོངས་ཤེས་ཡོན་གྱི་གནས་སྟངས་སོགས་དང་བྱམས་བརྩེའི་འབྲེལ་བ་ཇི་ཡོད། དེ་བཞིན་བྱམས་བརྩེ་དང་གཞན་ཕན་གྱི་བསམ་བློ་སོགས་ཤེས་ཡོན་ལམ་ལུགས་དང་སྤྱི་ཚོགས་ཀྱི་སྒྲིག་འཛུགས་ནང་འཇོག་རྒྱུའི་ཐབས་ལམ་དང་དགེ་མཚན་ཇི་ཡོད་སྐོར་བགྲོ་གླེང་གནང་ཡོད། སྐབས་དེར་སྐུ་ཞབས་ཧམ་མོན་ཌོ་ལགས་ཀྱི་པཱ་ལོ་ཨལ་ཊོའི་སློབ་གྲྭའི་ནང་བྱམས་བརྩེའི་སྐོར་སློབ་ཁྲིད་བྱས་ཚུལ་དང་དེས་སློབ་ཕྲུག་ཚོར་བཟང་ཕྱོགས་ཀྱི་ཤུགས་རྐྱེན་ཇི་འདྲ་ཐེབས་མིན་སྐོར་གསུངས། ཚོགས་ཐུན་གཉིས་པའི་སྐབས་བྱམས་བརྩེའི་བསམ་བློར་ཉམས་ཞིབ་དང་ཚོད་ལྟ། ཞེས་པའི་བརྗོད་གཞིའི་ཐོག་བགྲོ་གླེང་གནང་། སྐབས་དེར་བྱམས་བརྩེ་དང་གཞན་ཕན་གྱི་བསམ་བློ། དེ་བཞིན་སྤྱི་ཚོགས་ཀྱི་བསམ་བློ་མ་སྨིན་པའི་བྱིས་པའི་སེམས་ཚོར་བཅས་དང་འབྲེལ་བའི་ཀླད་ཁམས་དང་རིགས་རྒྱུན། སྤྱོད་ཚུལ་གྱི་རྣམ་པ་བཅས་ལ་སཊྣ་ཕོཌ་གཙུག་ལག་སློབ་གྲྭའི་བྱམས་བརྩེ་དང་གཞན་ཕན་གྱི་བསམ་བློ་ཉམས་ཞིབ་བསྟི་གནས་ཁང་ (Centre for Compassion and Altruism Research and Education) གིས་ཉམས་ཞིབ་བྱས་པའི་སྙན་ཐོ་གསལ་བཤད་གནང་ཡོད་པ་མ་ཟད། གཞན་ཡང་སྙན་ཐོ་དེའི་ནང་ཉམས་ཞིབ་བསྟི་གནས་ཁང་ནས་ནུ་གསོའི་སེམས་ཅན་གྱིས་རང་གི་ཕྲུ་གུ་གསོ་སྐྱོང་བྱ་རྒྱུ་དེ་སྐྱེ་ལྡན་འཕེལ་རིམ་ནང་ཐོག་མར་དར་རྒྱས་བྱུང་ཚུལ་དང་རིམ་པས་ཡར་རྒྱས་འགྲོ་ཚུལ། དེ་བཞིན་ཀླད་ཁམས་དང་འབྲེལ་བའི་སེམས་ཁམས་རིག་པ། བྱམས་བརྩེའི་བསམ་བློ་སྐྱེ་གཞིའི་ཀླད་རྩའི་རྣམ་པ་སོགས་ལ་དཔྱད་དོན་རྣམས་སྙན་སྒྲོན་ཞུས་ཡོད།
ཚོགས་ཐུན་གསུམ་པའི་སྐབས་སུའང་བྱམས་བརྩེའི་བསམ་བློར་ཉམས་ཞིབ་དང་ཚོད་ལྟ། ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད། སྐབས་དེར་སྦྱོང་བརྡར་ཕན་ནུས་ལྡན་པ་ཞིག་གི་ཐོག་ནས་བྱམས་བརྩེའི་བློ་སྐྱེ་རྒྱུར་ཕན་ཐོགས་ཡོད་པ་སཊྣ་ཕོཌ་གཙུག་ལག་སློབ་གྲྭའི་བྱམས་བརྩེ་དང་གཞན་ཕན་གྱི་བསམ་བློ་ཉམས་ཞིབ་བསྟི་གནས་ཁང་གིས་ཉམས་ཞིབ་གནང་བའི་སྙན་ཐོ་སྙན་སྒྲོན་ཞུས་ཡོད། ཚོགས་ཐུན་བཞི་པའི་སྐབས། འབྱུང་འགྱུར་བྱམས་བརྩེ་དང་གཞན་ཕན་གྱི་བསམ་བློར་ཉམས་ཞིབ་བྱ་རྒྱུའི་ཚན་རིག་གི་དྲི་བར་དཔྱད་པ། ཞེས་པའི་བརྗོད་གཞིའི་ཐོག་བགྲོ་གླེང་གནང་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སྩལ་དོན། བྱམས་བརྩེའི་བསམ་པ་བསྐྲུན་རྒྱུ་དེ་རང་ཉིད་ལའང་ཕན་ཐོགས་ཡོད་པ་ལས་བྱམས་བརྩེའི་བསམ་བློ་བརྗོད་སྐབས་རང་དོན་ཡལ་བར་དོར་བའི་གོ་དོན་དུ་བསམ་པའི་གོ་བ་ལོག་པ་དེ་སེལ་དགོས་ཞེས་བཀའ་སྩལ་བ་མ་ཟད། མགོན་པོ་གང་ཉིད་མཆོག་གིས་བགྲོ་གླེང་སྐབས་གླེང་རྒྱུའི་གནད་དོན་མང་པོ་ཞིག་བོད་པའི་སྤྱི་ཚོགས་ནང་དོ་སྣང་སྤྲོད་རྒྱུར་ཐུགས་བརྩོན་མཛད་བཞིན་ཡོད་སྐོར་དང་། ད་ཆ་བོད་སྐད་ནང་གནའ་བོའི་བོད་ཀྱི་ནང་པའི་བསམ་བློ་དང་དེང་དུས་ཚན་རིག་གི་བསམ་བློ་ཟུང་འབྲེལ་གྱི་ཚན་རིག་ཀུན་བཏུས་ཤིག་བཟོ་རྒྱུའི་ལས་གཞི་འགོ་བརྩམས་ཟིན་ཡོད་སྐོར་དང་། ཚན་རིག་ཀུན་བཏུས་དེ་ལྟ་བུ་སློབ་གཉེར་བྱེད་མཁན་དེ་ནང་པ་ཞིག་ཡིན་དགོས་ཀྱི་མེད་ཅེས་སོགས་ཀྱི་བཀའ་སློབ་སྩལ། ཚོགས་འདུའི་མཇུག་བསྡོམས་གསུང་བཤད་སྐབས་སྐུ་ཞབས་ཇེམ་སི་ལགས་ཀྱིས་གསུངས་དོན། དེང་སྐབས་བྱམས་བརྩེ་བསམ་པ་དེ་རྒྱས་སྤྲོས་ཀྱི་བསམ་བློ་ཞིག་མིན་པར་འགྲོ་བ་མི་རྣམས་ལ་དགོས་མཁོ་ཞིག་ཆགས་ཡོད་པ་ངོས་འཛིན་བྱེད་བཞིན་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཛམ་གླིང་ཁྱོན་ཡོངས་སུ་མི་མང་པོར་བློ་སྤོབས་སྐྲུན་གནང་མཛད་པར་ངས་སྙིང་ཐག་པ་ནས་ཐུག་རྗེ་ཆེ་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང་བ་དང་སྦྲགས་བགྲོ་གླེང་ཚོགས་འདུ་གྲོལ། མགོན་པོ་གང་ཉིད་མཆོག་ཕྱི་ཚེས་ ༡༦ ཉིན་གྱི་སྔ་དྲོར་པཱ་ལོ་ཊོ་ནས་ཨ་རིའི་མངའ་སྡེ་ཨེ་ཊ་ལེན་ཊར་ཆིབས་ཞལ་བསྒྱུར།།
