༢༠༡༠ ཟླ་ ༡༠ ཚེས་ ༡༢ རེས་གཟའ་མིག་དམར།
པར་ལེན་པ་རྒྱུད་སྟོད་བློ་བཟང་དབང་འདུས།
༄༅། །འདི་གར་ཨ་རིའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༠ ཚེས་ ༡༡ ཉིན་གྱི་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིིའི་ཁལ་ལི་ཕོར་ནི་ཡའི་མངའ་སྡེའི་གྲོང་ཁྱེར་སན་ཕ་རན་སིསི་ཁོའི་གནམ་ཐང་དུ་༸ཞབས་སོར་འཁོད་སྐབས་ཨ་རིའི་བོད་གཞུང་སྐུ་ཚབ་དོན་གཅོད་བཀའ་ཟུར་བློ༞་བཟང་སྙན་གྲགས་མཆོག་དང་ཨ་རིར་རྟེན་གཞི་བྱས་པའི་རྒྱ་གར་གཞུང་ཚབ་མཆོག་ནས་ཕེབས་བསུ་གཟབ་རྒྱས་ཞུས་འདུག དེ་རྗེས་༸གོང་ས་མཆོག་གནམ་ཐང་ནས་སན་ཇོ་སི་ (San Jose) ཞེས་པའི་གྲོང་ཁྱེར་དུ་ཆིབས་སྒྱུར་བསྐྱངས་ཏེ་བཞུགས་གནས་མགྲོན་ཁང་དུ་༸ཞབས་སོར་འཁོད་མཚམས་རྒྱུད་སྟོད་གསང་སྔགས་ཆོས་ཚོགས་ཀྱི་འགན་འཛིན་སྐུ་ཞབས་ཐུབ་བསྟན་དོན་ཡོད་ལགས་དང་། སེར་སྨད་མཁན་ཟུར་བློ༞་བཟང་འཇམ་དབྱངས་མཆོག བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་བཀའ་ཟུར་པདྨ་ཆོས་འབྱོར་མཆོག སཊྣ་ཕོ་ཌ་གཙུག་ལག་སློབ་གྲྭའི་ (Stanford University) འབྲེལ་ཡོད་ལས་བྱེད། བྱང་ཁལ་ལི་ཕོར་ནི་ཡའི་བོད་རིགས་ཚོགས་པའི་ཚོགས་གཙོ་དང་དྲུང་ཆེ། གཞན་ཡང་ས་གནས་བོད་རིགས་དང་བོད་དོན་རྒྱབ་སྐྱོར་བ་ཁག་གཅིག་བཅས་ནས་མགོན་པོ་གང་ཉིད་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
པར་ལེན་པ་རྒྱུད་སྟོད་བློ་བཟང་དབང་འདུས།
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༡༢ ཉིན་གྱི་སྔ་དྲོར་སན་ཇོ་སི་ཀོན་ཝེན་ཤན་ཚོགས་ཁང་ཆེན་མོའི་ནང་བྱང་ཁལ་ལི་ཕོར་ནི་ཡའི་ས་གནས་བོད་མི་ཚོར་མཇལ་ཁ་དང་བཀའ་སློབ་སྩལ་གནང་མཛད་རྒྱུ་དང། ཉིན་རྒྱབ་ཚོགས་ཁང་དེའི་ནང་ཕྱི་ནང་དད་ལྡན་ཆོས་ཞུ་བ་ ༡༢༠༠༠ ཙམ་ལ་བློ་སྦྱོང་ཚིགས་བརྒྱད་མ་དང་སེམས་བསྐྱེད་སོགས་ཀྱི་ཆོས་འབྲེལ་སྩལ་གནང་མཛད་རྒྱུ་ཡིན་འདུག ཕྱི་ཚེས་ ༡༣ ཉིན་གྱི་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་སན་ཇོ་སི་གཙུག་ལག་སློབ་གྲྭའི་ཚོགས་ཁང་ (San Jose State University Center) དུ་འོད་དཔག་མེད་ཀྱི་རྗེས་གནང་སྩལ་གནང་མཛད་རྒྱུ་དང། ཕྱི་ཚེས་ ༡༤ ཉིན་གྱི་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གིས་པཱ་ལོ་ཨལ་ཊོའི་ (Palo Alto) སཊྣ་ཕོཌ་གཙུག་ལག་སློབ་གྲྭའི་ཚོགས་ཁང་ཆེན་མོའི་ནང་སྒེར་གྱི་མི་ཚེ་དང་སྤྱི་ཚོགས་ནང་བྱམས་བརྩེའི་གལ་གནད། ཅེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་གནང་མཛད་རྒྱུ་ཡིན་འདུག ཕྱི་ཚེས་ ༡༥ ཉིན་མགོན་པོ་གང་ཉིད་མཆོག་བྱམས་བརྩེ་དང་གཞན་ཕན་བསམ་བློར་ཚན་རིག་གི་ལམ་ནས་འཚོལ་བ་ཞེས་པའི་བརྗོད་གཞི་དང་འབྲེལ་བའི་ཚོགས་འདུར་ཆིབས་སྒྱུར་བསྐྱང་སྟེ་ཚན་རིག་པ་དང་ལྷན་བགྲོ་གླེང་མཛད་རྒྱུ་ཡིན་འདུག་པ་བཅས།།
