༢༠༡༠ ཟླ་ ༩ ཚེས་ ༧ རེས་གཟའ་མིག་དམར།
༄༅། འདི་གར་བཙན་བྱོལ་བོད་གཞུང་ཆོས་རིག་ལས་ཁུངས་ནས་བཏང་གནས་ནང་འཁོད་དོན། བཙན་བྱོལ་བོད་གཞུང་ཆོས་རིག་ལས་ཁུངས་ཀྱིས་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དང་། ཝ་ཎ་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གཉིས་སུ་ཟླ་བ་དྲུག་རིང་རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་བརྒྱུད་ནང་བསྟན་གྱི་རིས་མེད་བསྟན་བདག་བླ་ཆེན་རྣམ་པའི་ཐུགས་བསྐྱེད་མཛད་འཕྲིན་ལ་བརྟེན་ནས་འཛམ་གླིང་ཡུལ་གྲུ་གང་སར་ནང་བསྟན་དར་ཁྱབ་ཤུགས་ཆེར་འགྲོ་བཞིན་ཡོད་པ་དང་། ཨ་རི་གཙོ་གྱུར་ཤར་ནུབ་རྒྱལ་ཁབ་མང་པོའི་མཐོ་རིམ་གཙུག་ལག་སློབ་ཁང་མང་པོའི་ནང་ནང་པའི་ལྟ་གྲུབ་དང་རིག་གནས་ཀྱི་སྡེ་ཚན་ཟུར་འཛུགས་བྱུང་དང་འབྱུང་བཞིན་ཡོད་པ། ལྷག་པར་རྒྱ་གར་གྱི་མཐོ་རིམ་གཙུག་ལག་སློབ་ཁང་མང་པོའི་ནང་དུ་ནང་པ་སངས་རྒྱས་པའི་ལྟ་གྲུབ་དང་རིག་གཞུང་སློབ་གཉེར་གྱི་ལས་རིམ་སྔར་མེད་གསར་འཛུགས་དང་སྔོན་ཡོད་གོང་སྤེལ་གཏོང་རྒྱུའི་དུས་སྐབས་གསར་པ་ཞིག་འཆར་བའི་སྐབས་འདིར། རང་ཅག་བོད་ཀྱི་ནང་པ་རྣམས་ཀྱི་ངོས་ནས་དུས་འགྲོས་གསར་པ་དེའི་སྣ་འཁྲིད་དང་གཞོགས་འདེགས་ཀྱི་འགན་ཁུར་ཆེ་ལེན་ཐུབ་པ་དགོས་རྒྱུ་གལ་གནད་ཆེ་བར་བརྟེན། རྒྱ་གར་གྱི་མཐོ་རིམ་གཙུག་ལག་སློབ་ཁང་ཁག་ཏུ་དགོས་གལ་ནམ་བྱུང་དང་། ནང་པ་སངས་རྒྱས་པའི་ལྟ་གྲུབ་དང་རིག་གཞུང་རྣམས་རྒྱ་གར་གྱི་སྤྱི་སྐད་གཙོ་བོ་ཧིན་དིའི་སྐད་ཡིག་ཐོག་ནས་ངོ་སྤྲོད་དང་སློབ་སྟོན་ཐུབ་པའི་མཐུན་རྐྱེན་བསྐྲུན་རྒྱུ་དང་། དེའི་སླད་དེ་ལྟར་ལེགས་པར་ཐུབ་པའི་དགེ་རྒན་མཁོ་འདོན་དང་བསྐོ་གཏོང་ཐུབ་པའི་ཆེད་དུ་དམིགས་སྟེ། བཙན་བྱོལ་བོད་མིའི་ཆོས་སྡེ་ཁག་གི་ཁོངས་ནས་ནང་པའི་གཞུང་ཆེན་སློབ་གཉེར་གྱི་གྲུབ་འབྲས་བཟང་ལ། ཧིན་དིའི་སྐད་ཡིག་རང་རྐྱ་འཕེར་ངེས་ཡོད་པའི་གྲ་བཙུན་གྲངས་ ༢༥ དྲག་འདེམས་ཀྱིས་དམིགས་བསལ་འོས་སྦྱོང་གི་ལས་རིམ་ཞིག་ཕྱི་ལོ་ ༢༠༡༠ ཟླ་ ༩ ཚེས་ ༥ ཉིན་བཞུགས་སྒར་གྱི་ཉེ་འདབས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་གོ་སྒྲིག་དང་འབྲེལ་ཉིན་དང་པོའི་དབུ་འབྱེད་མཛད་སྒོར་ཐོག་མར་ས་རཱ་མཐོ་སློབ་ཀྱི་སློབ་སྤྱི་དང་། དཔལ་ལྡན་ཆོས་རིག་བཀའ་བློན་རྣམ་གཉིས་ནས་ཚོགས་འདུ་དང་འབྲེལ་བའི་གསུང་བཤད་རྗེས་དཔལ་ལྡན་བཀའ་བློན་ཁྲི་པ་སློབ་དཔོན་ཟམ་གདོང་རིན་པོ་ཆེ་མཆོག་སྐུ་མགྲོན་གཙོ་བོར་ཆེད་ཕེབས་ཀྱིས་འོས་སྦྱོང་བ་རྣམས་ལ་ལམ་སྟོན་གསུང་བཤད་ཟབ་མོ་གནང་བ་དང་། དེ་ཉིན་བཀའ་བློན་ཕྱག་རོགས་རྣམ་པའང་མཛད་སྒོར་ཕེབས་ཞུགས་གནང་ཡོད་པ་བཅས།།
