༢༠༡༠ ཟླ་ ༩ ཚེས་ ༨ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཤར་ཨེ་ཤི་ཡའི་དད་ལྡན་པ་ཁག་གཅིག་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༠ ཟླ་ ༩ ཚེས་ ༨ ནས་ ༡༠ བར་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཤར་ཨེ་ཤི་ཡ་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་ཤེས་རབ་སྙིང་པོ་དང་ལག་ལེན་སོ་བདུན་མའི་ཆོས་འབྲེལ་དབུ་འཛུགས་མཛད་ཡོད། དེ་ཡང་ཚེས་ཕྱི་ ༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ལྷོ་ཤར་ཨེ་ཤི་ཡའི་དད་ལྡན་རྣམ་པའི་འཐུས་མི་གཉིས་ཀྱིིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་རྗེས་རྒྱ་སྐད་ཐོག་ནས་ཤེས་རབ་སྙིང་པོ་གསུང་འདོན་གནང་། དེ་ནས་མགོན་པོ་གང་ཉིད་མཆོག་གིས་དེར་འདུས་ལྷོ་ཤར་ཨེ་ཤི་ཡའི་ཆོས་ཞུ་བ་ ༣༠༠ བརྒལ་བ་དང་། དེ་བཞིན་བཀའ་ཆོས་ཞུ་མཁན་མི་མང་ ༣༦༧༣ བཅས་ཁྱོན་མི་གྲངས་ ༥༠༠༠ བརྒལ་བ་རྣམས་ལ་ཐོག་མར་ནང་ཆོས་ངོ་སྤྲོད་མཛད་དོན། འཛམ་གླིང་འདིའི་ནང་མི་འབོར་ཐེར་འབུམ་ ༦ ཙམ་ཡོད། ངོས་ཀྱི་འབད་བརྩོན་གཙོ་བོ་དེ་མི་འབོར་ཐེར་འབུམ་ ༦ ཡོད་པ་ཚོའི་བདེ་དོན་རེད། ནང་ཆོས་ཉམས་ལེན་བྱེད་མཁན་ཞིག་ཡིན་པའི་ཆ་ནས་སེམས་ཅན་ཐམས་ཅད་བདེ་སྐྱིད་ལྡན་པ་ཞིག་ཡོང་བའི་སྨོན་ལམ་རྒྱག་བཞིན་ཡོད། འཛམ་གླིང་གཞན་དུ་ཡོད་པའི་སེམས་ཅན་དང་ང་ཚོའི་དབར་ཐད་ཀར་འབྲེལ་བ་མེད་ཀྱང་འཛམ་གླིང་འདིའི་སྟེང་ཡོད་པའི་སེམས་ཅན་རྣམས་ང་ཚོར་འབྲེལ་བ་ཡོད། ང་ཚོ་མི་རེ་ངོ་རེའི་མ་འོངས་པའི་བདེ་དོན་དེ་འཛམ་གླི༝ང་མི་འབོར་ཐེར་འབུམ་དྲུག་དང་འབྲེལ་བ་ཡོད། གལ་ཏེ་འགྲོ་བ་མིའི་སྤྱི་ཚོགས་ཁྱོན་ཡོངས་ཀྱི་གནས་སྟངས་དེ་ཞི་བ་དང་བདེ་སྐྱིད་ལྡན་པ། རྙོག་གྲ་ཉུང་བ་ཞིག་བྱུང་ན་མི་སྒེར་སོ་སོར་ཕན་ཐོགས་ཧ་ཅང་ཆེན་པོ་ཡོད། ངོས་རང་གང་དུ་ཕྱིན་ནའང་ཐོག་མར་འཛམ་གླིང་མི་མང་ཐེར་འབུམ་དྲུག་ཡོད་པའི་ནང་ནས་གཅིག་ཡིན་བསམ་དྲན་གྱི་ཡོད། ང་ཚོ་འགྲོ་བ་མི་ཐེར་འབུམ་དྲུག་ཡོད་པ་རྣམས་མིའི་ལུས་ཕུང་ལས་གྲུབ་པ་གཅིག་མཚུངས་ཆགས་ཡོད། བསམ་བློ་དེ་ཡང་མིའི་བསམ་བློ་གཅིག་མཚུངས་ཤིག་ཆགས་ཡོད། སེམས་ཚོར་དེ་ཡང་མིའི་སེམས་ཚོར་ཡོད་པ་གཅིག་མཚུངས་ཆགས་ཡོད། དེ་ལས་གལ་ཆེ་བ་ང་ཚོ་ཚང་མར་མི་ཚེ་བདེ་སྐྱིད་ལྡན་པ་ཞིག་དང་སྡུག་བསྔལ་མི་འདོད་པ་གཅིག་མཚུངས་ཤིག་ཆགས་ཡོད། རྙོག་གྲ་སུ་ལའང་མི་དགོས་པ་ཞིག་ཡིན། དེར་བརྟེན་མི་ཚང་མར་མི་ཚེ་བདེ་སྐྱིད་ལྡན་པ་ཞིག་དོན་དུ་གཉེར་རྒྱུའི་ཐོབ་ཐང་ཡོད། སྤྱིར་ང་ཚོས་མི་ཚེ་བདེ་སྐྱིད་ལྡན་པ་དེ་ཕྱི་དངོས་པོའི་ཐོག་ནས་འཚོལ་ཐབས་གཙོ་བོ་བྱེད་ཀྱི་ཡོད། དེར་བརྟེན་ང་ཚོའི་བདེ་སྐྱིད་དེ་ཕྱི་དངོས་པོའི་ཐོག་ནས་ཡོང་གི་ཡོད་པ་ལྟ་བུ་ཡོད། ཕྱི་དངོས་པོའི་རིན་ཐང་དེ་གལ་ཆེན་པོ་ཡིན་པས་ང་ཚོར་དགོས་མཁོ་ཞིག་ཡིན་ནའང་ཕྱི་དངོས་པོ་གཅིག་པུས་ནང་སེམས་ཀྱི་ཞི་བདེ་བསྐྲུན་མི་ཐུབ། ཕལ་ཆེར་ཁྱེད་ཚོར་ཉམས་མྱོང་ཡོད་མདོག་ཁ་པོ་རེད། མི་ཚེའི་ནང་ལམ་ལྷོང་བྱུང་སྐབས་དངུལ་འབེལ་པོ་ཆགས་ནས་འདོད་རྔམ་དང་ཁྲག་དོག དོགས་པ་རྣམ་རྟོག་ཆེ་རུ་འགྲོ་གི་ཡོད། དེར་བརྟེན་ཕྱི་དངོས་པོ་ཁོ་ནས་མཚམས་རེ་སེམས་ལ་དཀའ་ངལ་དང་དངངས་སྐྲག སེམས་འཕྲལ་འཕར་མ་བཟོ་གི་ཡོད། ང་ཚོའི་བདེ་སྐྱིད་ཀྱི་འབྱུང་ཁུངས་རྩ་བ་དེ་ནང་གི་བསམ་བློའི་རིན་ཐང་ཡིན་ཞེས་སོགས་ཀྱི་བཀའ་སློབ་སྩལ་གྲུབ་བསྟུན་ཆོས་འབྲེལ་དངོས་གཞི་དབུ་འཛུགས་མཛད།།
