༢༠༡༠ ཟླ་ ༩ ཚེས་ ༡༡ རེས་གཟའ་སྤེན་པ།
༄༅། །རང་རིགས་དང་སློབ་རྣམས་ནས་ལོ་ལྟར་མཧཱ་གུ་རུའི་འབུམ་ཚོགས་འབུལ་ཤོམ་ཞུས་མུས་ལྟར་བོད་རྒྱལ་ལོ་ ༢༡༣༧ རབ་གནས་ལྕགས་སྟག་ལོའི་བོད་ཟླ་ ༨ ཚེས་ ༣ ནས་ ༨ ཕྱི་ལོ་ ༢༠༡༠ ཟླ་ ༩ ཚེས། ༡༡ ནས་ཚེས་ ༡༥ བར་ཉིན་གྲངས་ལྔའི་རིང་༸རྒྱལ་བའི་སྐུ་ཕྱྭ་དང་། བོད་དོན་བདེན་མཐའ་གསལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་བཤམས་ཐོག་མཧཱ་གུ་རུའི་འབུམ་ཚོགས་དབུ་འཛུགས་གནང་ཡོད། དེ་ཡང་རང་རིགས་དང་སློབ་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་གོང་ཚེས་ཉིན་གྱི་སྔ་དྲོ་ཆུ་ཚོད་ ༧།༣༠ ཐོག་དང་སློབ་ཀྱི་རུ་དཔོན་དཀར་རྒྱུགས་ཆོས་འཕེལ་ལགས་དང་མདའ་དཔོན་ཚེ་རིང་ཆོས་འཕེལ་ལགས་གཉིས་ཀྱིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་མཧཱ་གུ་རུའི་འབུམ་ཚོགས་ཀྱི་མགོན་དུ་དབུ་བཞུགས་ཐོག་རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོོག་དང་། རྣམ་གྲྭ་འདུས་ཚོགས། དེ་བཞིན་ཁྲིམས་ཞིབ་པ་གཞན་གཉིས་དང་། བཀའ་བློན་ཁྲི་པས་དབུས་བཀའ་བློན་རྣམ་པ། ལྷན་ཁང་ཁག་གི་དྲུང་ཆེ་ཁག་གཅིག བོད་མི་མང་སྤྱི་འཐུས་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ། གློ་བུར་ལྷགས་པའི་དགེ་བཙུན་སྔགས་གསུམ་བཅས་ཁྱོན་མི་གྲངས་ ༤༠༠ བརྒལ་བ་རྣམས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་གནང་འགོ་ཚུགས་ཡོད། ཉིན་ལྔའི་རིང་གི་མཧཱ་གུ་རུའི་འབུམ་ཚོགས་སྨིན་སྒྲུབ་ཞུ་སྐབས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་། བཞེས་བག གུང་ཚིགས་དཀར་སྐྱོང་། དགེ་བཙུན་སྔགས་གསུམ་ལ་སྐུ་འགྱེད་བཅས་འབུལ་རྒྱུ་ཡིན་འདུག་མ་ཟད། སྔ་དྲོ་ཆུ་ཚོད་ ༦།༣༠ ནས་ ༡༢།༠༠ བར་ཆོས་ཐུན་གཅིག་དང་། ཉིན་རྒྱབ་ཆུ་ཚོད་ ༡།༣༠ མས་ ༤།༣༠ ཆོས་ཐུན་གཅིག་འཚོགས་རྒྱུ་ཡིན་པ་བཅས།