༢༠༡༠ ཟླ་ ༨ ཚེས་ ༡༧ རེས་གཟའ་མིག་དམར།

༄༅། །ཕྱི་ལོ་ ༢༠༡༠ ཟླ ༨ ཚེས་ ༡༩ ཉིན་སྨོན་ལམ་ཚིག་མཛོད་ཐོན་རིམ་དང་པོ་དང་འབྱུང་འགྱུར་བཟོ་འཆར་གྱི་ཚིག་མཛོད་ཆེན་མོའི་སྐོར་ལ་བགྲོ་གླེང་གནང་རྒྱུ་ཡིན་འདུག དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བཀའ་བློན་ཁྲི་པ་སློབ་དཔོན་ཟམ་གདོང་རིན་པོ་ཆེ་མཆོག་ཆེད་ཕེབས་གནང་རྗེས་དཔེ་མཛོད་ཁང་གི་འགན་འཛིན་གྱིས་ཚོགས་འདུའི་ངོ་སྤྲོད་སྙིང་བསྡུས་དང་བློ་བཟང་སྨོན་ལམ་ལགས་ནས་ཚིག་མཛོད་སྐོར་ངོ་སྤྲོད། དེ་བཞིན་བཀའ་ཁྲི་མཆོག་གིས་གསུང་བཤད་གནང་རྒྱུ་ཡིན་འདུག དེ་ནས་བོད་སྐད་ཀྱི་འགྲོས་དང་མཐུན་ཞིང་འཐུས་སྒོ་ཚང་བའི་ཚིག་མཛོད་ཅིག་བཟོ་བར་ཆ་རྐྱེན་གང་དག་ཚང་དགོས་མིན་ཐད་ཨ་ཅ་རྱ་ཀརྨ་སྨོན་ལམ་ལགས་ཀྱིས་གསུང་བཤད་དང་བགྲོ་གླེང་གནང་རྗེས་མིང་ཚིག་གཅིག་ལ་གྲུབ་མཐའ་དང་། ཆོས་བརྒྱུད། ཆོས་སྲིད། གནའ་དེང་གི་གོ་བ་སོ་སོར་ཡོད་རིགས་ཇི་ལྟར་བྱས་ཏེ་ཐག་གཅོད་གཏན་འབེབས་བྱ་རྒྱུའི་ཐོག་བློ་བཟང་དཀོན་མཆོག་རྒྱ་མཚོ་ལགས་ཀྱིས་གསུང་བཤད་དང་བགྲོ་གླེང་གནང་རྒྱུ། དེ་རྗེས་བོད་ཡིག་གི་མིང་ཚིག་བྱ་ཚིག་སྣ་ཚོགས་པར་དགོས་ངེས་ཀྱི་སྡེ་ཚན་ཇི་ལྟར་དབྱེ་དགོས་མིན་ཐད་བགྲོ་གླེང་གནང་རྒྱུ་དང་། ཉིན་རྒྱབ་ཕལ་སྐད་ཁྲོད་ཀྱི་མིང་ཚིག་རྣམས་ཚིག་མཛོད་དུ་བསྡུ་དགོས་མིན་ཐོག་ཀརྨ་སྨོན་ལམ་ལགས་ནས་གསུང་བཤད་དང་བགྲོ་གླེང་། དེ་བཞིན་དེང་དུས་ཀྱི་ཚན་རིག་གསར་པའི་ཐ་སྙད་ཁག་དང་། རྩོམ་རིག་གི་ཐ་སྙད་གསར་པ་ཁག་བསྡུ་ལེན་བྱེད་དགོས་མིན་ཐད་བློ་བཟང་དཀོན་མཆོག་རྒྱ་མཚོ་ལགས་ཀྱི་གསུང་བཤད་དང་བགྲོ་གླེང་གནང་རྒྱུ། དེ་ནས་མ་ཚིག་ལ་འགྲེལ་བཤད་སྐབས་ཚད་གཞི་མཐོ་དམན་གང་འདྲ་སྤྱད་ན་འོས་མིན་སྐོར་ཤེས་རབ་དར་རྒྱས་ལགས་ཀྱིས་གསུང་བཤད་དང་བགྲོ་གླེང་གནང་རྒྱུ་ཡིན་འདུག་པ་བཅས།