༢༠༡༠ ཟླ་ ༨ ཚེས་ ༢༠ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༨ རེས་གཟའ་ལྷག་པའི་ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཨ་རིའི་ཕྱི་སྲིད་ལས་ཁུངས་ཀྱི་ཕོག་གི་བྷོ་ཊམ་ (Foggy Bottom) ཞེས་པའི་ཚོགས་ཁང་ནང་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་དང་ཨ་རིའི་ཕྱི་སྲིད་ལས་ཁུངས་ཀྱི་ལས་བྱེད་བགྲེས་པ་སྐུ་ཞབས་ཨེ་རིག་ཤི་ཝ་ཛི (Eric Schwartz) རྣམ་གཉིས་མཇལ་འཕྲད་གནང་ཡོད། སྐབས་དེར་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་སྐུ་ཞབས་ཨེ་རིག་མཆོག་དང་ལྷན་བོད་མི་སྐྱབས་བཅོལ་བའི་གནས་སྟངས་ཐོག་བཀའ་མོལ་གནང་ཡོད། དེ་ཡང་ཁོང་རྣམ་གཉིས་དབར་མཇལ་འཕྲད་མ་གནང་སྔོན་ཙམ་དུ་སྐུ་ཞབས་ཨེ་རིག་མཆོག་གིས་གསར་འགོད་པ་ཚོར་གསུང་དོན།
ངའི་སྐད་ཆ་ཤོད་རྒྱུ་དེ་འགྲོ་བ་མིའི་དཀའ་ངལ་གྱི་གནས་སྟངས་འདྲ་མིན་ཡོད་པའི་ནང་ནས་སྐྱབས་བཅོལ་བའི་སྐོར་ཡིན། ཨ་རི་སྲིད་གཞུང་གིས་དཀའ་ངལ་དེ་དག་སེལ་ཆེད་རྒྱལ་སྤྱིའི་ཚོགས་པ་ཁག་བརྒྱུད་རྒྱབ་སྐྱོར་དང་རོགས་རམ་ཧ་ཅང་གནང་བཞིན་ཡོད། ས་གནས་བོད་མི་སྐྱབས་བཅོལ་བ་ཚོའི་གནས་སྟངས་ཐོག་དཀའ་ངལ་ཇེ་ཆེར་འཕྲད་བཞིན་ཡོད་པར་བརྟེན་དམིགས་བསལ་སྐུ་ཚབ་དང་ང་གཉིས་དབར་གྱི་ཚོགས་འདུའི་སྐབས་སྐད་ཆ་ཤོད་རྒྱུའི་གནད་དོན་མང་ཆེ་བ་དེའི་སྐོར་ཆགས་རྒྱུ་ཡིན་པ་བསམ་བཞིན་ཡོད་ཅེས་བརྗོད་ཡོད།
དེ་བཞིན་ཁོང་ནས་༸གོང་ས་ཏཱ་ལའི་བླ་མའི་དམིགས་བསལ་སྐུ་ཚབ་དང་ཐུག་འཕྲད་ཐེངས་དང་པོ་མིན་པ་དང་། ཨ་རིའི་སྲིད་གཞུང་གི་མི་སྣ་ཁག་ནས་དམིགས་བསལ་སྐུ་ཚབ་དང་ཡང་ཡང་ཐུག་འཕྲད་གནང་བཞིན་ཡོད་སྐོར་གསུངས་འདུག སྐུ་ཞབས་ཨེ་རིག་མཆོག་ནི་ཨ་རིའི་ཕྱི་སྲིད་ལས་ཁུངས་ཀྱི་མི་འབོར་དང་སྐྱབས་བཅོལ། གནས་སྤོ་བཅས་ཀྱི་ལྷན་ཁང་ནང་གི་ལས་དྲུང་གི་ཕྱག་ལས་གནང་མུས་ཡིན།
