༢༠༡༠ ཟླ་ ༧ ཚེས་ ༩ རེས་གཟའ་པ་སངས།
༄༅། ཕྱི་ལོ་ ༢༠༡༠ ཟླ་ ༧ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་སྲུང་བརྩི་ཞུ་སླད་ཨ་མར་ཨུ་ཇ་ལ་ཞེས་པའི་ཧིན་དྷིའི་གསར་ཤོག་ལས་ཁང་གིས་གོ་སྒྲིག་ཐོག་བོད་གཞུང་ཟློས་གར་ཚོགས་ཁང་དུ་ཧིན་བོད་རིག་གཞུང་འཁྲབ་སྟོན་ཞུས་ཡོད། དེ་ཉིན་ཕྱེད་ཡོལ་ཆུ་ཚོད་ ༢ ཐོག་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་དང་། ཁྲིམས་ཞིབ་པ་ངག་དབང་ཐུབ་བསྟན་མཆོག བོད་མི་མང་སྤྱི་འཐུས་ཚོགས་གཙོ་དང་ཚོགས་གཞོན་མཆོག སྤྱི་མཐུས་རྒྱུན་ལས། དྲུང་ཆེ། ཧི་མ་ཅལ་མངའ་སྡེའི་ཤེས་རིག་ཚོགས་གཙོ་མཆོག་དང་། ཀང་ར་རྗོང་གི་ཉེས་རྟོག་འགོ་འཛིན། ཀང་ར་རྗོང་གི་རྗོང་དཔོན་གཞོན་པ། རྡ་ས་ས་གནས་འགོ་འཛིན། རྡ་ཤོད་དང་ཀང་ར་ཁུལ་གྱི་རྒྱ་གར་མཐོ་སློབ་ཁག་གསུམ་གྱི་སློབ་ཕྲུག་བཅས་མི་གྲངས་ ༡༠༠ ལྷག་ལྷན་འཛོམས་ཐོག་ཨ་མར་ཨུ་ཇ་ལའི་གོ་སྒྲིག་འགན་འཛིན་གྱི་འཁྲབ་སྟོན་ངོ་སྤྲོད་གནང་རྗེས་བོད་གཞུང་ཟློས་གར་དང་། རྒྱ་གར་བའི་མཐོ་སློབ་ཁག་གི་སློབ་ཕྲུག ཐང་སྟོང་གླུ་གར་ཚོགས་པ་བཅས་ཀྱིས་གཞས་སྣ་རེ་འཁྲབ་སྟོན་ཞུས་རྗེས་བཀའ་ཁྲི་མཆོག་གིས་ཐུགས་རྗེ་ལེགས་འབུལ་གྱི་གསུང་བཤད་གནང་ཡོད། དེ་རྗེས་མུ་མཐུད་གཞས་སྣ་འཁྲབ་སྟོན་ཞུས་རྗེས་ཀང་ར་རྗོང་གི་ཉེས་རྟོག་འགན་འཛིན་གྱི་མཇུག་སྡོམ་གནང་ཡོད་པ་བཅས་ཀྱི་གནས་བསྡུས་སུ།།
