༢༠༡༠ ཕྱི་ཟླ་ ༦ ཚེས་ ༢༨ རེས་གཟའ་ཟླ་བ།
༄༅། །འདི་གར་ཨོ་སི་ཊོ་ལི་ཡའི་བོད་གཞུང་སྐུ་ཚབ་དོན་གཅོད་ལས་ཁང་ནས་བཏང་གནས་ནང་གསལ། ཕྱི་ལོ་ ༢༠༡༠ ཕྱི་ཟླ་ ༦ པའི་ནང་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིང་ནིའུ་ཛི་ལེན་ཌི་དང་ཨོ་སི་ཊོ་ལི་ཡའི་རྒྱལ་ཁབ་གཉིས་ནང་འཚམས་གཟིགས་སུ་ཕེབས་སྐབས། ཁུལ་དེའི་གནས་སྡོད་བོད་མི་དང་བོད་དོན་རྒྱབ་སྐྱོར་གནང་མཁན་ཚོས་ངོ་རྒོལ་གྱི་སྐད་འབོད་བྱས་ཡོད་པ་རེད། དེ་ཡང་ཞི་ཅིན་ཕིང་ནིའུ་ཛི་ལན་ཌིའི་གྲོས་ཚོགས་སུ་བསྐྱོད་སྐབས་གྲོས་ཚོགས་འཐུས་མི་སྐུ་ཞབས་རུའུ་སལ་ནོར་མན་ལགས་ཀྱིས་བོད་ཀྱི་རྒྱལ་དར་མཁའ་དབྱིངས་སུ་འཕྱར་ནས། བོད་མིར་རང་དབང་སྤྲོད་དགོས་པའི་སྐད་འབོད་བྱེད་སྐབས་རྒྱ་ནག་གི་འཐུས་ཚབ་དང་ཉེན་སྲུང་མི་སྣས་ཁོང་ལ་འབུད་རྒྱག་དང་རྒོལ་འཛིན་བྱས་ཡོད་པ་རེད། སྐུ་ཞབས་རུའུ་སལ་ལགས་ཀྱིས་རྗེས་སུ་གྲོས་ཚོགས་ལ་གནས་ཚུལ་དེ་གླེང་སློང་དང་འགྲེལ་བརྗོད་གནང་སྐབས། ཕྱིའི་རྒྱལ་ཁབ་ཀྱི་སྐུ་སྲུང་བས་གྲོས་ཚོགས་དེའི་ཚོགས་མི་ཞིག་གྲོས་ཚོགས་ཀྱི་མདུན་ཐང་ནས་ཕྱིར་འབུད་སྐབས། ཁོ་པ་ཁོང་ཁྲོ་ཆེན་པོས་བོད་མི་རྣམས་ལ་རང་བཙན་དགོས་པའི་སྐད་འབོད་བྱས་པ་ཡིན། ཁོང་གིས་ད་དུང་ཁོ་པའི་དམིགས་ཡུལ་ནི་འགྲོ་བ་མིའི་ཐོབ་ཐང་ལ་དོ་སྣང་དང་གཡོ་འགུལ་ཞིག་ཐེབས་པའི་ཆེད་དུ་ཡིན་པ་འགྲེལ་བརྗོད་གནང་ཡོད། ཕྱི་ཟླ་ ༦ ཚེས་ ༢༡ ཉིན་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིང་ཨོ་སི་ཊོ་ལི་ཡའི་རྒྱལ་ས་ཀན་བྷེ་རའི་གྲོས་ཚོགས་ནང་འཚམས་གཟིགས་སུ་བསྐྱོད་སྐབས། ཨོ་སི་ཊོ་ལི་ཡའི་གྲོས་ཚོགས་གོང་མའི་ཚོགས་མི་དང་ལྗང་གུ་ཚོགས་པའི་ཚོགས་གཙོ་སྐུ་ཞབས་ Bob Brown སྦོབ་སྦོ་རོན། བོད་རིགས་སྤྱི་མཐུན་ཚོགས་པའི་འཐུས་མི་བསམ་མཁར་མི་འགྱུར་རྡོ་རྗེ་ལགས། རྒྱ་ནག་མང་གཙོ་ཚོགས་པའི་ཚོགས་གཙོ་སྐུ་ཞབས་ཆིན་ཅིང་བཅས་ནས་གསར་འགོད་ལྷན་ཚོགས་ཞིག་སྐོང་ཚོགས་གནང་སྟེ། བོད་ལ་རང་དབང་དགོས་པ་དང་བོད་ཀྱི་གནད་དོན་ཞི་མོལ་ཐོག་གང་མགྱོགས་སེལ་ཐབས་དགོས་པ། རྒྱ་ནག་ལ་མང་གཙོ་དགོས་ལུགས་སོགས་ཀྱི་གཏམ་བཤད་ནན་པོ་གནང་ཡོད་པ་མ་ཟད། ཨོ་སི་ཊོ་ལི་ཡའི་བོད་དོན་ཚོགས་པ་ནས་ཨོ་སི་ཊོ་ལི་ཡའི་སྲིད་བློན་དང་ཕྱི་སྲིད་བློན་ཆེན་གྱིས་མཚན་ཐོག་འབོད་སྐུལ་གྱི་ཞུ་སྙན་ཞིག་ཕུལ་བའི་ནང་རྒྱལ་ཁབ་གཉིས་ཀྱི་དབུ་ཁྲིད་ཐུག་འཕྲད་སྐབས་བོད་དོན་གླེང་སློང་དགོས་པའི་འབོད་སྐུལ་ཞུས་ཡོད། དེ་བཞིན་བོད་རིགས་སྤྱི་མཐུན་ཚོགས་པའི་ངོས་ནས་འཚམས་གཟིགས་སུ་ཕེབས་པའི་རྒྱ་ནག་སྲིད་འཛིན་ལ་ཞུ་སྙན་ཞིག་ཕུལ་ཏེ། གཉིས་མོལ་གྱིས་བོད་དོན་དཀའ་རྙོག་སེལ་དགོས་པའི་འབོད་སྐུལ་ཡང་ཞུས་ཡོད། ཉིན་དེར་ད་དུང་སི་ཌི་ནི་དང་ཀན་བྷེ་རའི་བོད་མི་དང་བོད་དོན་རྒྱབ་སྐྱོར་བ། དེ་བཞིན་རྒྱ་ནག་མང་གཙོ་དོན་གཉེར་བ། ཆོས་སྐོར་སྒོམ་སྒྲུབ་སོགས་མི་གྲངས་ ༢༠༠ ལྷག་གྲོས་ ཚོགས་ཀྱི་མདུན་ཐང་དུ་གཞི་རྒྱ་ཆེན་པོའི་ངོ་རྒོལ་འདུ་འཛོམས་ཀྱིས་ལས་འགུལ་ཞིག་སྤེལ་ཡོད་པ་རེད། གཞན་ཡང་ཕྱི་ཟླ་ ༦ ཚེས་ ༢༤ ཉིན་ཨོ་སི་ཊོ་ལི་ཡའི་ངལ་རྩོལ་ཚོགས་པ་ནས་ལྕམ་སྐུ་ཇུ་ལི་ཡ་གྷི་ལ་ཀྲི་རྒྱལ་ཁབ་དེའི་བུད་མེད་སྲིད་བློན་དང་པོར་བསྐོ་གཞག་གནང་བར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འདྲིའི་གསུང་འཕྲིན་ཞིག་ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁུངས་བརྒྱུད་ནས་སྩལ་ཡོད་པ་དང།
དེ་བཞིན་སྲིད་བློན་ཟུར་པ་སྐུ་ཞབས་ཀན་ཝན་རོ་ཀྲི་མཆོག་ལ་ཡང་གསུང་འཕྲིན་ཞིག་སྩལ་ཡོད། ཨོ་སི་ཊོ་ལི་ཡ་སྐུ་ཚབ་དོན་གཅོད་ལས་ཁང་ནས་སྲིད་བློན་གསར་པ་ལྕམ་སྐུ་ཇུ་ལི་ཡ་གྷི་ལ་ཀྲི་མཆོག་ལ་འཚམས་འདྲི་བཀྲ་ཤིས་བདེ་ལེགས་ཞུས་པ་དང་ཆབས་ཅིག ཨོ་སི་ཊོ་ལི་ཡ་གཞུང་ཕྱོགས་ནས་བོད་མི་སྐྱབས་བཅོལ་བར་ལོ་ལྟར་གཞིས་ཆགས་ཀྱིས་རོགས་རམ་གནང་བར་ཐུགས་རྗེ་ཆེ་ཞུས་པ་དང་སྦྲགས་༸གོང་ས་མཆོག་གིས་བོད་ཀྱི་དཀའ་རྙོག་སེལ་ཆེད་དབུ་མའི་ལམ་གྱི་སྲིད་བྱུས་ཐོག་རྒྱ་ནག་གཞུང་དང་མཉམ་ཞི་མོལ་ཡོང་ཐབས་སུ་རྒྱབ་སྐྱོར་གནང་རྒྱུའི་འབོད་སྐུལ་ཡང་ཞུས་ཡོད་པ་བཅས།
